Ajo Sur jo kel di Leiden, Iyo ambo mandanga barita NHK patang tu di Eropa Timur minus 50 darajat. Iyo takajuik mandanganyo sbb trus ado korban nan alah sampai 300 urang. Ibo wak mandanga.
Ambo do'akan lakeh udaro barubah rancak supayo indak ado kasulitan laih di subaliak bumi ten. Mungkin kok dapek kalo indak paralu bana indak usah ka lua rumah daulu. Ndak usahlah dikana2 sate piaman, sala lauak atau teh talua nan dikampuang wak tun dulu. Payah lo mangamehi aia mato bikoh. Mamak Ajo Duta jo keluarga di Amrik, Maampiang ka nagari Rantau sinan tun iyo jadi salah ciek cito2 nakan du Mamak. Kok lai kalapangan nantik InsyaAllah. Tadi malam ambo mambaco buku perjalanan partamo kaliliang dunia Kapa Dewa Ruci nan ditulih dek awak kapanyo Cornelis Kowaard asal Minahasa tahun 1964 silam. Ambo mambayangan nagari Mamak nan disusuri dek Kapa Dewa RUci ko sarato perjalanan darat mereka di kota2 nan sabana segeh planning pembangunannyo sajak dari jaman saisuak tun. Iyo raso bajalan lo awak samo2 jo mereka disinan. Salain itu ado basobok urang awak nan tacampak kasinan batamu jo mereka indak ado kesempatan untuak pulang dek banyak hal, sampai batangih2an jo awak kapa. Hanyo dek mandanga lagu2 daerah di kampuang dilaguan awak kapa di ateh kapa. Iyo sato tairuik lo inguih dek e Mak. Mungkin lagu Nyiur Melambai usahlah dinyanyian di nagari jauah tun yoh Mak, banyak sapu tangan abih dek e :) Raso ka dicabiak peta kok iyo bisa malangkah pulang ka nagari awak nan karambie e iyo malambai2 manyuruah anak nagarinyo pulang. Pak Heri Tanjuang di Paris, Mungkin alun saat no tibo untuak mancangkua jo mangaia bada di tabek di kampuang awak Pak. Makan bajamba sakaluarga. Batahan agak sakaciak ari lai mungkin labiah baguno. Susuik sen aia mato nan diam2 kalua pabilo takah itu candonyo jo ujuang baju duluh. Icak2 awak kalimpanan goeh. Untuak panghibur diri mungkin pantun ko cocok Karatau madang di hulu Babuah babungo balun Marantau bujang daulu Dikampuang baguno balun Tapi kok indak tatahan juo, yo ambuilah bola dunia ko buliah lakeh sampai di kampuang hehe.. Pak Mulyadi jo keluarga di Juruman, Alhamdulillah, sanang mandanga berita kondisi kesiapan Apak sekeluarga di Juruman ten. Baa Pak? Lai ka sampai kamai nak ka makan Gonggong Lauik? Hanyo sajo lauik kami disiko indak saroman bbrp taun nan silam laih. Nalayan alah banyak mangaluah. Aia lauik indak janiah mambiru laih alah lamo. Kecek barita banyak hasia lauik nan saroman kerang nan sangaik bamacam-macam jinihnyo disiko alah manganduang merkuri. Baa li kaka duh. Sadangkan kapa sagadang-gadang gunuang mancorek an karaia itam no di tangah lauik di sakuliliang kapulauan kami ko. Padoal patroli banyak juo nan ilia mudiak. Antahlah ka disabuik iah... Musim batalua ikan-ikan alah sakahandak ati ikan se kini. Dek suasana lauik no indak takode dek mereka laih. Takah 4 tahun nan silam ikan dingkis salalunyo barombongan dalam kondisi batalua bisa ditangguak di lauik baranang2 barombongan ampia sadono batalua pas di malam sabalun Imlek. Nan biasono harago ikan tun 15 ribu kutiko indak musim batalua, tapi kalo pas hari Imlek batalua bisa dijua 200-300 ribu sakilo no. Itu nan diarokkan nalayan pulau2 di nugari pulau2 di tampaik ambo untuak anak sikola, panuka jariang nan alah rapun atau panumbok i rumah nan alah condong dek angin ribuik. Utang ka tangkulak juo nan kadiarok no. Yo ibo awak sebab kini angan2 dapek panen dingkis dari lauik tun tingga mimpi sen laih, indak bara nan baruntuang basobok jo rombongan ikan ko. Maaf babagi carito sadiah ko pagi ko.. Mudah2an nan sadang giat di bidang nan akan malapuakkan bumi, hutan jo lauik kito ko bisa mancaliak hal iko untuak dipalajari. Baa caro no supayo indak lakeh lapuak bumi kito ko. Saroman musim dingin nan kini iyo bana manjadi, apoko iyo ado hubungan baiak lo nyo jo bumi nan samakin lapuak ko dek ulah technology kito sandiri di bumi ko. Mak Ngah di Santa Kuruih, Ambo tatap manungguan kaba dari Mak Ngah Baa lah kaba Mak Ngah kini du..? Lai siaik sin Mak Ngah di subaliak bumi ten?? Salam hangat kami sakaluarga Rina, 34, batam (InsyaAllah ampiang manateh) -----Original Message----- From: [email protected] [mailto:[email protected]] On Behalf Of Muljadi Ali Basjah Sent: Wednesday, February 08, 2012 10:28 PM To: [email protected] Subject: Re: [R@ntau-Net] Es katam Waalaikumsalam Wr.Wb. yth. Ibu Rina Permadi. Sato ambo manjawab saketek bu Rina Permadi, kabatulen record sajak 1956 di Juruman bagian timua-lauik hinggo -28,2°C. Digunuang (+600 m ateh muko lauaik) diDangau ambo, hari Sinayan 06.02.2012, rekordnyo -21°C wakatu Subuah; katiko pukua 7:30 kabarangkek kasawah, ambo caliak diThermometer wakatu baru naiak Gurabak -18°C. Rasonyo agak dingin samiangnyo, tapi nan paralu pakai panutuik kapalo, pakai Schal (palilik lihia, co Salendang), pakai pakaian dalam untuak musim dingin (long John istilahnyo). Biasonyo tagantuang jo salero dan ekonomie masiang2, nan gak elok yo tantu sajo wool dari Anggora (sa-spesies jo Kelinci tapi bulunyo ditaek wakatu musim dingin), deh tipih dan lambuik co kapeh,tapi effektnyo tinggi. Sayang salain haragonyo relativ tinggi, sasudah winter habih, msuak musim semi, musti dipaliharo/disikek supayo effekt lambuik jo resistens dingin nyo indah bakurang. Pakai baju kauih woll biasonyo dari Kashmir, yo Jacket dan Mantel (biasonyo nan gak luxus babulu anak Domba, co rompi fooring, nan bisa dilapehkan kalau indak dingin bana) ), bisa dari woll (agak barek) stelan klassik, bisa dari synthetik sporty/moderen, co pakaian athlet Olympia Winter. , yo la sapato winter, biasonyo boot, nan dalamnyo biasonyo babulu anak Domba. Kalau ambo acok mambao Spike didalam Gurabak(sabanso tingkelek nan baduri)supayo indak taguliciak, anti slip. Ban gurabak tantu sajo musti ban winter, selain itu Rantai untuak ban-gurabak tatap ado dibagasi, prefentiv kalau licin bana. Gubuak ambo didusun diateh digunuang, jadi mandaki Gunuang wakatu winter, jikok panuah salju, kalau alun dikamehi dek Buldozer (panyapu salju/es). Last but not least, dalam Gurabak ambo tatap ado 3-buah Salimuik (Kain Saok), kabetulan dari bulu Unto/Kamel. Kalau emergensi kan musti sadio2, tapi insya Allah hinggo kini alun ado doo. Salam jo Mas Uda sakaluargo. Wassalam, Muljadi Ali Basjah -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
