Tradisi mulih kukuta bas wari-wari raya tahpe wari kerja tahun jadi sada kesemalen i sebelang doni. Kede kopi kuta kemulihen reh riahna, ayo kade-kade mejerngas ceria ngalo-ngalo perlajangna. Jumpa teman sapih perlajang ras bagepe teman sitading ikuta. Lit siperlajang ngambor-ngambor serpi man kade-kade, lit ka deba rikutken maba luah taneh perlajangen nari. Danak-danak cirem-cirem natap luah kade2na, parang mbelin pe reh mekatepna ku kede kopi nemani kade-kadena si reh. Mehuli, tuhu melala simerandalna sirehna arah tradisi mulih kukuta nari.
Bas jaman demokrasi enda, kepeken tradisi mulih kukuta enggo ka tambah musimna, musim pilkada, musim pemilihen bupati kepala daerah. De enggo kenca seh musimna,melala simbisa perlajang ersikap-sikap mulih kukuta, lako ngikuti pilkada. Demi membangun kuta kemulihen nina deba erkata bana. Lit ka erbelas erkiteken rayat sirulo menghendaki nina ka (e arah kuta kalak ah nge, labo kutanta katangku le.) Jambor-jambor pe melala pajek i taneh perlajangen, ingan runggu-runggu encakapken pilkada kuta kemulihen ras bagepe ngerancang pembangunan daerah. Kerinana tujunna lako pehuliken kegeluhen daerah, gelah maka reh majuna kuta kemulihen. Io'oh jadi naring ate anak kuta me? Sekotanken kata bujur lanai lit kata sideban, bujur ninta idur ukur mehuli kalak perlajang si nggit mulih kukuta, singasup membangun kuta kemulihen. La kabo piga kalak perlajang sibage rupana. Musim pilkada tuhu-tuhu sada musim menarik, menarik ibas pengertin menarik putra daerah perlajang mulih kukuta. Raduken ras sie, jadi pengiket ka pe man cendekia putra daerah si sedekah enda tading i daerah lako tetap tading ikuta, ngikuti pilkada, segelah maka banci jadi pulu "pembangunan" daerah. Tek kita makana ugapa pe reh majuna me pembangunan kuta kemulihen ibas lima tahun sireh enda. Erlumba muat simehuli mbangun daerah antar putra daerah perantauan ras putra daerah yang setia tinggal di daerah. Sada tontonan menarik. Maka tempa bage ningku, putra daerah perantauan singasup ras nggit mulih membangun kutana teridah cukup melala. Encage, putra daerah si pentar, si sedekah enda tading idaerah la ka bo kurang teremna. Apaika de majekken jambor ingan runggu ncakapken pilkada dingen ngerancang pembangunen, nai nari jadi sada kepentaren anak kuta si la terpilasi. Kuinget ka merk bus si nai pe, "Maspersada", mari persada emas (kalak pentar cendekia) mbangun kuta kemulihen. Salam mulih kukuta
