Re: [Urang Sunda] SAKASAMPEURNA

Didin Kustandi Thu, 05 Aug 2004 18:43:06 -0700

Punten kang Oby, neda warti nu langkung teges :

1. Saur saha lagu Manangis nganggo laras sorog ?

2. Dupi eta rumpaka kengeng nyutat tina buku naon, karangan

saha, kaca sabaraha ?

3. Lagu Manangis, sering disebat Sinom Manangis, margi guguritanana nganggo aturan Pupuh Sinom (8a-8i-8a-8i-7i-8u-7a-8i-12a) contona sapertos dangdingan kang Dedy Windiagiri di hadap ieu : (haturan Teh Tien anu nuju sentimentil, nyanggakeun ieu guguritan)

Lir ciibun kapanasan 8a

beurang jeung peuting laleungit 8i

nu natrat gurat tapakna 8a

ukur kanyeri kapeurih 8i

geus kesel nganti-nganti 7i

tumpur leburna bangbaluh 8u

nu nalikung nyangkalak 7a

teu kalis ceurik ngageuri 8i

wegah seunggah maparah hanca lumampah 12a

Namung sok sanaos kitu, tiasa disebatkeun umum, panembang sok rada nyimpang tina aturan, nanging nyimpangna masih keneh kawatesanan nyaeta : padalisan anu 7 engang sok dirobih janten 8 engang. Alesanana, 7 engang teh (cenah) kagok nembangkeunana, hese nyenggolkeunana. Contona kieu :

Teureup hejo pilemburan, 8a

sono teh kaliwat leuwih, 8i

meong congkok mungging ranjang, 8a

cing atuh kumaha abdi, 8i

unem gede wadah cai, 8i

nya pikir asa kaduyung, 8u

reregan sabudeur imah, 8a

bati kasangsara diri, 8i

randu leutik, napas bati humandeuar 12a

Hatur uninga, wireh �generasi ngora� anu sayaga ngaraksa-ngariksa Tembang Sunda, sayaktosna regreg keneh. Ngan hanjakal, hirup-huripna teh lir ibarat pepetetan di pasir anu lungkawing, estuning macakal sorangan da tong boroning nu sejen, pamarentah daerahna oge teu katara daekeun malire ! Geura nya urang jojoan. Di Cianjur diasuh ku wargi urang nu ayeuna aya di Seoul, nyaeta �Keluarga Besar Wiradireja�. Nya kitu deui di Bandung, teu kirang-kirang nonoman asuhan kang Yus Wiradireja, atuh pakempelanana, aya di mana-mana da atuh guruna oge sajabina ti kang Yus teh seueur keneh nu sanesna. Kang Apung aya keneh, Teh Ida Widawati getol keneh, Kang Birin oge teu acan liren, nu sanesna oge seueur keneh. Malihan mah nembe pisan sim kuring nampi warti cenah di Bandung teh aya Padepokan (Tembang Sunda) anyar binaan salah sawios Seniman (Intelektual) Sunda anu janten gegeden Pemda Jawa Barat, nyaeta Bapa Ir. H. Setia Hidayat. Di Sukabumi aya Teh Imas Permas, di Bogor teu kirang seueur hasil atikan (almarhum) Bapa Bakang Abubakar, di Purwakarta aya kang Deden Guntari sareng kang Asep Sas, Ceu Neni, di Sumedang aya guruna guru-guru tembang nyaeta Ibu Enah Sukaenah Sobandi, Di Garut aya kang Barman Syahyana, kang Asep Kosasih, kang Ujang Bejo, kang Nyanjang sareng seueur deui nu sanesna. Kumaha di Bekasi, Karawang, Subang, Indramayu, Cirebon, aya ? Aya !

Nanging nyakitu, dugi ka kiwari teu acan aya oraganisasi (naon bae) anu kersa ngarintahkeun eta pepetetan kana lahan garapanana. Rupina, upami urang (oge) sami-sami teu (aya karep) malire, nya panginten angger bae bacacaran ! Kitu manawi kang Oby, hatur nuhun kana kamelangna.

Salam,

Kang Dien

bosetektea <[EMAIL PROTECTED]> wrote:

Jentreng kacapi jeung gelikna suling mirig haleuangna simojang geulis anu mamos cianjuran tembang manangis dina laras sorog : Seuweu putu pajajaran, Naha henteu katingali gunung, Nu rampag ngajajar, Eta minangka ajir, Ciri pakuning bumi, Tutunggul titinggal karuhun, Ulah tungkul kajongjonan, Pusaka pulihkeun deui, Unggulcukul, santosa cara baheula, (kumpulan tembang sunda, A. Tjitjah, Apung, SW) Beu,........bener-bener geuning aya di tatar sunda,di bali geusan ngajadi ,kumpul ngariung jeung dulur-dulur, lain sora koto jepang anu dipirig orkestra barat dina lagu serenade tosseli atawa drigo,najan sarua jentrengna jeung ngeunahna tapi angger sora waditra kacapi leuwih nyecep sumeleketkana jero ati lain pedah kuring urang sunda dalah pangakuan urang jepangna sorangan ahli musikologi,fumiko tamura ngaku lamun mamaos cianjuran teh pang alusna pang ngeunahna sadunya Memang siga nu teu sapira pangaruhna kana hirup jeung huripna budaya jeung basa sunda, pedaran sakasampeurna ieu, tapi lamun dilenyepan maH.....aya hiji rasa kamelang,aya hiji rasa karempan.....sieun......sieun.........jentreng kacapi jeung gelikna suling teu kadenge deui....... Cing baraya.......aya anu uninga generasi ngora anu neruskeun tapak lacak ahli kacapi atanapi ahli suling lian ti mohamad tan deseng di jalan malabar bandung anu kamari di dongdon ku pupuhu dprd bapa eka santosa.......??? Oby tea =========================================================================================== "Gabung INSTANIA, dapatkan XENIA. Daftar di www.telkomnetinstan.com, langsung dapat akses Internet Gratis.. Dan ..ikuti "Instan Smile" berhadiah Xenia,Tour S'pore, Komputer,dll, info hub : TELKOM Jatim 0-800-1-467826 " ===========================================================================================

Komunitas Urang Sunda --> http://www.Urang-Sunda.or.id

Do you Yahoo!?
New and Improved Yahoo! Mail - Send 10MB messages!

Komunitas Urang Sunda --> http://www.Urang-Sunda.or.id

Yahoo! Groups Sponsor

Yahoo! Groups Links To visit your group on the web, go to: http://groups.yahoo.com/group/urangsunda/ To unsubscribe from this group, send an email to: [EMAIL PROTECTED] Your use of Yahoo! Groups is subject to the Yahoo! Terms of Service.

Re: [Urang Sunda] SAKASAMPEURNA

Kirim email ke