[Urang Sunda] Sataun Rumah Baca Buku Sunda

[MSasmita]

SATAUN MUKA “RUMAH BACA BUKU SUNDA”   Diitung-itung nepi ka bulan Pebruari 2005 geuning geus sataun muka Rumah Baca Buku Sunda teh, umur sataun lamun dina umur budak mah kakara rek lelengkah halu, kakara rek diajar leumpang. Tapi ari keur hiji pabukon mah sigana geus kaitung lila, saheunteuna kudu geus bisa dicokot datana pikeun bahan evaluasi atawa bahan pikeun nitenan nu maca jeung anu dibacana. Jero sataun teh nu datang ngahaja boh rek maca didinya boh rek nginjeum dijumlah jamleh teh aya 41 urang, boh kolot boh budak boh awewe boh lalaki, jumlah buku anu dibaca/ diinjeum aya 112 buku, lilana nginjeum nu pangsakeudeungna ngan ukur dua poe anu panglilana tilu minggu, malah kungsi aya nu nepi ka sabulan leuwih. Buku anu diinjeum panglobana nyaeta buku Carita/ Novel jeung buku kumpulan Carita Pondok, terus kana wawacan. Nu nginjeum lolobana sabudeureun imah bae, bisa disebutkeun lingkungan sa-RW, aya eta ge anu datang ti lembur sejen ( lain RW) tapi teu loba. Lamun nitenan nu nganjang ngan ukur 41 urang, rarasaan mah asa saeutik pisan, asa jauh tina sawangan, tadina boga harepan nu nganjang naha nu ngan sakadar rek maca atawa nu rek nginjeum buku bakal leuwih loba, tapi geuning ngan sakitu buktina.   Sok mindeng kadenge atawa maca yen neangan buku Sunda teh kaitung hese, nya kuayana eta anggapan pisan pangna kuring lahlahan muka Rumah Baca Buku Sunda teh, maksudna mah leuleutikan mere nyaho ka balarea yen buku Sunda teh aya keneh, bisi rek maca mah yap daratang kadieu, bisi rek maca mangga, bisi rek nginjeum mangga, teu kudu mayar. Puguh ge asa patojaiah ceuk cenah neangan buku Sunda teh hese, ari geus disampakeun geuning nu maca teh teu pati loba, duka teuing boa nu jadi alesan teh pedah Rumah Baca Buku Sunda ayana di pasisian jauh ngajugjugna atawa memang nu resep maca buku Sunda geus ngurangan. Bisi enya nu resep maca buku Sunda teh geus ngurangan tangtu kudu aya tarekah sangkan ngajaul deui, sangkan nu resep maca buku Sunda ngalobaan deui, ieu tarekah teh teu kudu dipadungdengkeun dina gempungan anu rohaka teu kudu disawalakeun sagala, tinggal der ngalobaan Rumah Baca Buku Sunda. Upamana di unggal bumina para inohong Sunda, di bumina para pangarang Sunda, dibumina para budayawan Sunda, dibumina para politisi Sunda der ngadegkeun Rumah Baca Buku Sunda, pira ge tinggal nyieun plang nu unina Rumah Baca Buku Sunda jeung nyadiakeun rohangan saeutik keur nyimpen buku bukuna, risikona mah da teu aya pira ge bumi teh bakal kagiridig ku balarea, jamak we sakitu mah, atuh bukuna teu kudu loba sapuluh dua puluh ge cukup. Ngasongkeun ieu tarekah teh bane we teu kudu make waragad anu gede, da tangtu para inohong Sunda, para pangarang Sunda, para budayawan Sunda, para politisi Sunda teh ari buku Sunda mah geus boga tinggal derna jeung kudu jembar manah.   WANDA BUKU SUNDA NU MACA/ NGINJEUM DINA SATAUN % Novel 30 27% Kumpulan Carpon 18 16% Sajak 9 8% Wawacan 16 14% Pantun 0 0% Majalah (Mangle, Cupumanik, Gondewa, Parahyangan, Sunda) *) 8 7% Sajarah 4 4% Musik/Tembang 5 4% Bacaeun Barudak 12 11% Inohong (biografi) 0 0% Referensi (Ensiklopedi Sunda, Kamus) 4 4% Pelajaran basa/sastra 6 5% JUMLAH 112 100% *) Salian ti Mangle jeung Cupumanik nu sejena majalah heubeul       Taun ieu hayang rada diundakeun, maksud teh nu rek diagulkeun lain bae buku basa Sunda tapi buku sejena, basa Indonesia jeung basa sejenna tangtuna ge nu aya pakuat pakait jeung Sunda. Ceuk hiji panalungtikan nu dilaksanakeun ku koran nasional nu dimuat dina bulan pebruari 2005, nyebutkeun yen buku fiksi/novel, sastra panglobana nu maca nepi ka 21,1% , buku agama 13,6% jste, ari buku basa daerah mah teu disebut-sebut. Dumasar kana eta sigana keur nambah panarik rek nyobaan nyadiakeun buku buku novel basa Indonesia nu kawentar mangsa kiwari, sugan bari milihan buku basa Indonesia maenya teu direret mah buku basa Sunda-na. Aya gerentes dina hate boa boa enya basa Sunda teh keur muguran.     MSasmita Rumah Baca Buku Sunda Perumahan Margawangi Jl Margawangi VII No.5 Margacinta Bandung Tlp 022-7511914 Email : [EMAIL PROTECTED]     Komunitas Urang Sunda --> http://www.Urang-Sunda.or.id Yahoo! Groups Sponsor ADVERTISEMENT Yahoo! Groups Links To visit your group on the web, go to: http://groups.yahoo.com/group/urangsunda/   To unsubscribe from this group, send an email to: [EMAIL PROTECTED]   Your use of Yahoo! Groups is subject to the Yahoo! Terms of Service.