[Urang Sunda] SOLEH & SOLEH

[syam ridwan]

SOLEH & SOLEH   Rumasa munggaran ceceremed teh basa aya nu apel ka imah tatangga, ngadodoho sendal kulitna anu weuteuh keneh. Dasar papaok amatiran keneh, kurang lihey campur jeung geumpeur, ari nu didodoho sendal kulit, ari nu diringkid bakiak kai. Bedul ! Ari hate mah asa teu purun, jadi jalma panjang kokod teh, kahayang mah kawas batur, gawe dirohangan husus tur nyecep ku ac, tiis lir nyempod dina kulkas, gawena ngan ukur ngadangong dihareupeun komputer, siga nuheueuh sibuk, padahal keur noongan imel dina milis atawa keur ceting jeung wanoja anyar panggih, giliran abis bulan dompetna mudal tur merekis ku duit gepokan.   Kahayang tinggal kahayang, kahayang ngan ukur dina lamunan, bener ceuk babasan kaduhung mah tara tiheula, kaduhung baheula sakola  teu junun,ngaheulakeun beger, antukna lain pangarti anu kaala, tapi popotongan we ngaleutak. Enya sakapeung mah sok ngarasa hariwang, boga kalakuan kieu teh, boa enya hiji waktu mah bakal katewak, dibeberik, diuber, dikepung, ditareunggeulan, dijejeleh, maenya cenah kasep kasep boga kalakuan kitu patut. Keun bae ketah da ari nu kasep mah biasana sok aya nu ngabela. "Duh lebar temen boga rupa hade tapi kalakuanana teu hade, ah boa-boa matak kitu ge keur hilaf sigana mah !". Heueuh mending mun ngaromong kitu, boa kalahka nyarebut kieu " Hayang nyaho, nu kasep teh siga kumaha nya !" bari jekok peureupna nyayang kana cukang irung.   Heuheuy ....nya jadi ge-er kieu, kawas goong nabeuh maneh, tapi henteu kituna, sanajan enya sacara de jure can boga sertipikat kasep ti Badan Perkasepan Seluruh Pasundan, tapi sacara de facto pan geus diakui ku para wanoja, buktina geus teu kaitung wanoja nu kapengpeongan. Keun, tenang we can boga sertipikat kasep ge, da ari sertipikat mah bisa nyusul, najan teu kaluar aslina, pan bisa nyieun nu aspal, nu penting laku heula tur popotongan balatak dimana-mana. *******   Kaayaan lembur combrek tiiseun kawantu sorena tas hujan ngagebret, jalma-jalma loba nu milih ngagojod dijobong tur kerek patembalan patarik-tarik, padahal harita karek  jam satengah sapuluh peuting . Lamun keur lalajo tipi mah mimiti kalaluar iklan roko. Sabalikna pikeun kuring mah,kaayaan kitu teh kasempetan pikeun nyalurkeun hobi. Keteyep kuring ngadeukeutan gedong sigrong, terus noong tina sela sela pager. " Beu geuning ngaran nu boga imah teh sarua, Soleh, ngan ieu mah diimplik implikan haji !" hate ngagerentes bari melong kana papan nama anu nempel dina tembok. Enya sakapeung mah sok era sorangan, ari ngaran Soleh ari pagawean ngalakukeun nu salah. Tapi dalah dikumaha, da ari teu puak paok teh sok asa ateul sagala rupa, timimiti leungeun tug nepikeun ka bujur.    " Gusti mugia ulah kapanggih kusasaha !" hate ngagerentes deui. Mahiwal batur mah ngadu'a teh menta ditangtayungan kana jalan kasalemetan, ieu mah tibalik.  Sajeroning ngadu'a ,otak mah mimiti mikir neangan pijalaneun, sedengkeun sakuliringna ditembok tur luhurna make sarigsig beusi, jangkungna aya kana dua tangtungan mah. Bleg we kawas kantor kadutaan nu aya di Jakarta. " Beu asa pamohalan bisa asup, da lamun asup ge kudu mileykeun beusi uril heula anu sagede alaihim. Hanjakal atuh teu guguru heula ka Deddy Courbuzier, meureun bisa mileykeun beusi. Ah..balaka wae kitu yen kuring teh nek maling, enya mending kitu wae !".  Hate galecok noroweco. " Punten !" terus dipindo deui. "Sampurasun !" Horeng nu boga imahna mah keur cinekul we wirid, ditungtungan ku ngadoa  " Duh Gusti mugi sing di tebihkeun tina bala'i sareng diriksa ti jalmi-jalmi anu bade niat jahat !" parat ngado'a, terus ngojengkang muru lawang panto, bari nembalan. " Mangga, saha eta ?" ceuk haji Soleh. " Abdi nun !" " Abdi saha ?" " Abdi, tamu teu diondang tea, bade ngadon papaling didieu, kinten-kintena diwidian teu?" " Baruk !" haji Soleh ngahuleng, tarangna ngadadak karijut siga nu mikir. Dina jero hatena meureun ngagerentes, na aya maling jujur-jujur teuing. " Ke..ke..bapa mah asa karek manggihan maling jujur kieu, da biasa na mah maling mah tara ngaku sanajan barencut digebugan ge. Padahal jaman kiwari mah harga kajujuran teh mahal pisan !" sambungna deui.  " Kieu we atuh jang, ujang can gaduh avanza ? " Manawi matak rajin papaling ge kanggo nambihan meser eta !" " Terus katingali teu di garasi bapa aya mobil sabaraha ?" " Katingalna mah aya tilu, avanza, opel blazer, sareng honda jazz ?" " Terus ujang masih keneh lelengohan ?" " Numawi, ari popotongan mah di unggal pengkolan, namung can aya nu ngajodo !" " Terus apal teu anak bapa aya sabaraha ?" " Manawi teu acan apal !" " Bisi can can apal mah, anak bapa teh boga tilu, awewe kabeh, mun kembang mah keur sumedeng ligar, rupana aramucuy ngala ka indungna !" " Tos aya calonna pa ?" " Matakna can aya, cenah mah hese pisan neangan lalaki nu jujur teh !" " Teras naon hubunganana naroskeun lelengohan ka abdi ?" " Moal waka dijawab, sabab aya amanat ti nu ngarangna, mun aya pertanyaan samodel kitu ulah waka dijawab!" ceuk haji Soleh, matak gantung areuyeun.   syam ridwan. Komunitas Urang Sunda --> http://www.Urang-Sunda.or.id Yahoo! Groups Links To visit your group on the web, go to: http://groups.yahoo.com/group/urangsunda/   To unsubscribe from this group, send an email to: [EMAIL PROTECTED]   Your use of Yahoo! Groups is subject to the Yahoo! Terms of Service.