Kormod ( Korban mang Emod
)
Di terminal Cicaheum mang Emod geus anyeucleu dina
angkot jurusan Ciroyom. Teu kungsi lila sulusup aya awewe duaan asup, gek diuk
pas pisan hareupeun mang Emod. Beungeut mang Emod ngadadak
ngalies lantaran nu diuk hareupeun teh make erok pondok senting
pisan, katambah erokna nyoropot kaluhur, aya kana dua
jengkal mah nyoropotna tina tuur. Saleuheung mun ngeplak
bodas mah, da ieu mah bleg we kawas bujur seeng, sareretan mah enya katingali
bodas da make stoking, ngan tetep we ari ceda bisul jeung borokna mah
katingali ngalangkang.
Ari nu saurang deui make calana panjang, ngan palebah
beuteungna ngaliglag da make kaosna rada merecet tur ngatung kaluhur.
Atuh puguh we bujalna anu rada dosol sangorong sagede jendolan
bonang, lamun kaparengan ngarenghap bujalna siga anu
ngarenyohan.
" Gila hareudang amat yah, padahal di Ciburayot mah
ngak ginih ginih amat !" ceuk nu make erok senting. Dampal leungeuna kikiplik
dipake gegeber.
" Iyah kawas di jakarta ajah !" tembal baturna
Ningali kitu mang Emod surti, sor ngasongkeun koran, pamikirna sugan we ari
dibere koran mah teu pakupis teuing leungeuna.
" Makasih !" pokna bari nampanan koran, terus dipake
gegeber. Mimiti mah gegeberna teh di sekitar wilayah dada, lila-lila jadi
nyorosot kahandap, ngageberan palebah tuurna.
" Heuheuy...beh na mah hareudang kajero-jerona !"
gerentes man Emod bari nyenghel. Dasar mang Emod tukang heureuy, teu hujan teu
angin ujug-ujug celengkeung we nanya ka nu make erok sauted.
" Neng tos terang guha Jepang ?" pokna bari melong
anteb.
" Teu acan mang, nya dimana kitu ?"
" Ari itu !" ceuk mang Emod, bari nunjuk ka palebah
sela-sela tuur manehna. Nu dierok sauted ngarenjag, buru-buru
ngarekepkeun sukuna, atuh ngageberna ge pindah kaluhur deui.
Lila lila mah panumpang angkot teh euyeub, sisi pada
sisi geus pinuh, kaayaan tambah hareudang wae kawantu keur tengah poe
jentrang jentring. Ngan edas ari geus der ngetem teh, angkot mah
sok pikakeuheuleun panumpang, sakitu geus padedet, pajarkeun
teh can jangkep.
" Punten sajalmi deui, geser...geser...!" ceuk supir
angkot, ngomong sunda tapi logat batak. Dumadakan nungguan panumpang saurang ge lila pisan, atuh
puguh we anu gegeber dijero angkot teh beuki rea wae, komo anu make
kurudung mah siga nu ripuh pisan, leungeun katuhu kikiplik kukipas leutik,
leungeun kencana gegetret kana sirahna, renyem ku katombe sigana
mah. Enya sok hayang seuri ari hulu dikekeben ku karudung, ari beuheung cena
tembong, behna mah meh katingali make kongkorong, gedena badis rante
pajingjing kueh regal. Komo ningali palebah leungeun jeung sukuna mah,
leungeuna pinuh ku geulang koroncong atuh sukuna make gengge, bleg we toko
emas keliling.
" Jurig...bau kelek saha ieu teh ?" ceuk mang Emod
bari ungas ingus kakenca jeung kakatuhu. Awewe nu make baju lekbong,
kaparengan diukna kencaeun mang Emod siga nu kaisinan, terus irungna ungas
ingus ka palebah kelekna.
" Na da nu abdi mah teu bau mang, nembe pisan nganggo
reksona roll-on !" Kitu deui nu belah katuhu, saurang ibu ibu, potongana
mah siga istri pajabat eselon hiji, buukna digelung, sinjang dilamban, make
kabaya bungur, diimplik-implikan kacamata hideung badag. Teu pati malire,
jongjon we gegeber ku salindangna.
" Beu ieuh istri pajabat bet nyasar kana angkot !"
hate mang Emod noroweco. Enya pantesna dandanan samodel kitu mah nyelegon dina
jok bebiben, ngan meureun bebibena mogok, nya kapaksa naek angkot da meureun
bisi dikocok manten arisana.
" Haling ah nek pindah ka angkot tukang !" ceuk
mang Emod bari tuturubun kaluar, panumpang sejena ngan bati olohok.
Heuleut sababaraha menit, saurang panumpang nu naek dina angkot tukang, gura
giru pindah kahareup.
" Geuning ngalih kapayun, rusuh panginten nya ?" nu
gigireun manehna nanya
" Sanes rusuh rusuh teuing matak ngalih kadieu
teh !" jawabna
" Nya kunaon kitu neng ?" ceuk panumpang ampir
bareng.
" Itu jalmi nu ngalih ti angkot ieu, sugan mah teu
acan ibak....teu kiat bauuuu !"
Beu ari mang Emod, era ku ceuli anu ditindik tur make
anting-anting, era ku tato naga anu ngajeblag dina leungeun, era ku kumis anu
baplang, sihoreng awak bau tujuh rupa da jarang mandi.(SR)
Komunitas Urang Sunda
--> http://www.Urang-Sunda.or.id
Komunitas Urang Sunda --> http://www.Urang-Sunda.or.id
Yahoo! Groups Links
