Madura jeung Surabaya, ceuk buku sajarah karangan Graf, baheula keur jaman Mataram Sultan Agung, embung taluk, serah sumerah ka Sultan Agung. Sultan Agung terus ngirim bala tantara keur numpes nu barontak ieu. Tantara nu dikirim ku Sultan Agung teh asalna ti "divisi" Sumedang. Dipingpin ku Pangeran Rangga Gede, Madura jeung Surabaya bisa ditaklukeun. Pangeran Rangga Gede teh putrana Pangeran Geusan Ulun, raja Sumedang ti istrina nu namina Harisbaya. Asal-usul Harisbaya, aya sababaraha versi. Aya nu nyebatkeun yen anjeunna teh Putri ti Mataram sareng aya oge nu nyebatkeun yen anjeunna teh Putri ti Madura. Harisbaya saleresna "hadiah" ti Mataram kanggo Sultan Cirebon. Tapi nyaeta, dasar jaman baheula, Putri Harisbaya teh bet kasengsem ku Geusan Ulun, nu keur "masantren" di Cirebon. Harisbaya diculik dicandak ka Sumedang. Gara-gara istri, hubungan Cirebon jeung Sumedang kungsi pagetreng.
Tapi kuring, lain rek nyaritakeun sajarah. Ngan kamari basa ka Sumenep, ngaliwat ka kompleks makam-makam sultan Sumenep, Asta Tinggi (Astana luhur da tempatna dina mumunggang). Pas ngaliwat, tadina mah teu niat eureun, ngan pas ningali plangna, aya tulisan kompleks makam Sultan ........RA PANGERAN KORNEL. Kaget aya P. Kornel di Sumenep, kuring nitah eureun ka supir. Terus ngajak babaturan asup ka kompleks makam-makam Sultan ieu. Maksud teh rek tatanya saha ari P. Kornel di Sumenep teh. Tapi kulantaran tempat eta teh tempat jarah, atuh kapaksa kuring oge sapertos nu jarah, malah ku kuncen teh ditanya: timana, aya maksud jeung kahayang naon. Rada bingung oge nagjawabna, untung nu nganteur2 ngajawab ku basa Madura, teuing naon nu jawabanana, teu ngarti. Nu penting kuring terang P. Kornel nu di Sumenep. Ari pek teh P. Kornel di Sumenep mah teu aya hubunganana jeung Pangeran Kornel nu di Sumedang (Pangeran Kusumadinata). Tapi aya kasamianana, nyaeta sami-sami gaduh pangkat militer ti Walanda (tituler) nyaeta Kolonel. Jadi, jigana mah sami, antara basa Madura jeung basa Sunda jaman baheula, kecap Kolonel jadi "Kornel". Pangeran Kusumadinata ti Sumedang kenging pangkat Kolonel tituler, kumargi mimngpin pasukan di Priangan wetan, keur ngabendung Pasukan Diponegoro, bisi asup ka daerah Priangan. Tapi Pangeran Kornel nu di Sumenep mah, jigana leuwih kadieunakeun, sabab P. Kusumadinata mah sajaman jeung P. Diponegeoro jeung oge Sultan Abdurahman. Ari P. Kornel van Sumenep mah turunan katilu ti Sultan Abdurahman. Waktu rek kaluar ti kompleks makam, kuncen teh ngadoakeun ka kuring jeung babaturan, cenah kieu, muga-muga sagala kahayang anjeun, sanggeus jarah ka dieu, dikabul ku nu Maha Kawasa. Kuring teh unggeuk- unggeukan, nganuhunkeun didoakeun, padahal mah.....tadina mah teu niat jarah, pedah we aya makam Pangeran Kornel ......... Baktos, WALUYA Komunitas Urang Sunda --> http://www.Urang-Sunda.or.id Yahoo! Groups Links <*> To visit your group on the web, go to: http://groups.yahoo.com/group/urangsunda/ <*> To unsubscribe from this group, send an email to: [EMAIL PROTECTED] <*> Your use of Yahoo! Groups is subject to: http://docs.yahoo.com/info/terms/
