Sok tara paruguh, gantung dengeeun, tuluykeun atuh dongengna,.............................................
Naon huluna wungkul dongeng the, teu kaci ach........ -----Original Message----- From: [email protected] [mailto:[EMAIL PROTECTED] On Behalf Of oman abdurahman Sent: Wednesday, January 03, 2007 9:07 AM To: [email protected] Cc: [email protected]; [EMAIL PROTECTED]; [EMAIL PROTECTED]; [EMAIL PROTECTED]; [EMAIL PROTECTED] Subject: [Urang Sunda] Antara Do'a Nabi Ibrahim as jeung Talatah Prabu Wastukancana (1) Baraya, Minangka kakaren lebaran haji atawa 'Iedul Adha, urang ngaguar salah sahiji do'a Nabi Ibrahim as anu kaunggel dina Al Qur'an. Saha ari Nabi Ibrahim as? urang sadaya geus mafhum. Lalakonna anjeunna ampir dipastikeun salawasna diguar nalika urang mapag atawa dina der pisan mieling poean lebaran haji jeung ibadah-ibadah anu pakait di jerona. Ayat Al Qur'an anu dipilih dina kasempetan ieu nyaeta do'a Nabi Ibrahim anu kaunggel dina Surah Asy Syu'ara ayat 69 dugi ka 87(QS 26 : 69 - 87), khususna ayat ka 84-na. Saba'da nilik kana eusi ayat Al Qur'an 26 : 84, tetela aya tali anu nganteng kasaruan eusining talatah dina eta ayat jeung titinggal salah sahiji raja Sunda anu mashur, Prabu Wastukancana sakumaha kacatet dina Prasasti Kawali. Kukituna, pamugi kawidian ku sadayan, ieu mieling Nabi Ibrahim dina kakaren 'iedul Adha teh bade dikaitkeun sareng guaran ajen inajen anu kapendak dina salah sahiji paninggalan sajarah Sunda, manawi nepi ka anu dimaksud. 1. Nabi Ibrahim as jeung salah sahiji do'ana Anjeunna kasohor atawa meunang julukan salaku "pupuhuna tauhid" atawa "pupuhuna anu nanjeurkeun monotheisme". Eta gelaran lain seja ngaremehkeun pancen nabi-nabi sateuacanna dina nanjeurkeun agama Alloh. Namung, perjoangan Nabi Ibrahim as dina ngabela agama tauhid dibanding nabi-nabi samemehna as pangpanjangna. Oge sababaraha diantara paripolah anjeunna dina melaan katauhidan diabadikeun jadi ibadah atawa ritual umat Islam saalam dunya nepi ka ayeuna. Hal ieu, tangtu wae saba'da meunang pangukuhan ti nabi anu pamungkas, nyatana kangjeng Nabi Muhammad saw. Pondok carita, Nabi Ibrahim as nalika dina hiji kasempetan da'wah ka ramana katut umatna anu masih musyrik, anjeunna ngadugikeun sababaraha argumentasi ngeunaan perluna mangeranan ka Gusti Alloh anu Maha Esa. Hal ieu kaunggel dina Al Qur'an surah Asy Syu'araa ayat 69 dugi ka ayat 82. Runtuyan da'wah Ibrahim as dina mangsa harita, sakumaha digambarkeun dina surah Asy Syua'ara tadi, ditutup ku rengrengan do'a Nabi Ibrahim as (QS 26 : 83 - 87). Urang puseurkeun heula perhatian urang kana do'ana anu luyu jeung jejer ieu tulisan, nyaeta sakumaha do'a anjeunna anu kaunggel dina surah Asy Syu'ara ayat 83-84. Do'a Ibrahim as sakumaha anu dimaksud (QS 26 : 83-84) teh kieu unina (tarjamahan): "(Ibrahim ngado'a) : 'Nun Pangeran abdi, mugi Anjeun maparinan hikmah ka abdi sareng mugi Anjeun ngajantenkeun abdi kaasup golongan manusa-manusa anu saroleh; Jeung mugi Anjeun ngajantenkeun abdi kacapangan anu sae pikeun jelema-jelema (anu baris datang) saterusna'. Tina do'a Nabi Ibrahim as, anu kaunggel saparantos padungdengan tutur adu argumentasi anjeunna jeung ummatna ngeunaan saha satemanna anu kudu disembah ku manusa, nyongcolang talatah salah sahiji hal anu penting jadi eusi do'a urang. Kulantaran hakekat do'a teh diantarana papagon pikeun laku lampah sapopoe, nya eusi eta do'a oge ngarupakeun tuladan keur paripolah hirup sapopoe. Upama diringkeskeun, aya tilu papagon lakulampah sapopoe anu kacangking tina eusi do'a dina dua ayat Al Qur'an tadi. Anu 3 teh nyaeta: 1) sangkan urang salawasna neangan hikmah dina kahirupan, 2) usaha sangkan urang kaasup golongan manusa sholeh, 3) usaha sangkan urang jadi kacapangan (B.Ind: buah tutur yang baik) keur generasi saterusna. Nilik kana runtuyan amanah anu dikandung ku dua ayat Al Qur'an tadi, bisa jadi ditarik kacindekan sarupa kieu: pikeun nyangking kalungguhan salaku manusa anu jadi kacapangan atawa anu jadi carita hade saterusna, hiji jalma samemehna kudu bisa nyangking hikmah, jeung ngalakukeun amal sholeh salila hirupna. Kacindekan anu akhir bieu upama disirorotkeun kana alam jeung kahirupan budaya Sunda mangsa samemeh datangna pangjajah jeung sumebrana agama Islam di Tatar Sunda, tetela nurub cupu. Hal ieu kacangking upama urang nitenan naon anu jadi ajen-inajen poko kasundaan anu kapendak tina titinggal raja-raja Sunda, boh naskah kunona atawa prasastina. Diantarana, prasasti titinggal raja Sunda anu panglilana jadi raja (104 tahun), Prabu Wastukancana (abad 13 - 14 M), sakumaha tiasa kapaluruh dina prasasti Kawali (hiji wewengkon kacamatan anu kaasup wilayah Kabupaten Ciamis ayeuna) Cag heula, aya umu pareng urang teruskeun deui. baktosna, manAR
