Ngeunaan HBH
Lian ti kopdar, kongres, jeung pabukon, salah sahiji produk unggulan Kusnet
nyaeta HBH halal bil halal. Mun teu salah, ti mimiti ngadegna Kusnet, ieu
produk teh tiap taun tara poho dilaunching atawa diproduksi --
dilaksanakeun.
Di antara sawatara HBH nu kungsi diiluan, keur kuring -- persisna mah keur
maksud pangacaprukan ieu -- HBH Cibatu nu pangalusna. Tempatna di pasantren,
hiji ruang publik atawa malah hiji pusat kabudayaan atawa pusat pengembangan
masyarakat pisan. Kituna teh, pasantren nu dipilihna lain bae pasantren nu
kawentar, tapi oge aya di pilemburan teu nyengceling atawa aya di tengah kota
pisan. Leuwih ti kitu, acarana kawilang reumbeuy: Lian ti aya acara kasenian
jeung parasmanan, dibarungan ku bakti sosial mangrupa sidqoh papakean jeung
duit keur urang lembur jeung seniman-seniman nu mercayakeun hirupna kana
kasenian nu dianggap buhun atawa geus loba nu teu nolih deui.
Kakurangannana, perkara bakti sosial eta -- alatan waktu jeung rarancang
(perencanaan atawa, malah, gayana mah konsepna pisan) katingalna kurang
kagarap. Dina harti, masih nandeuskeun kumaha satemenna urang resep ngahuma,
anteng sorangan papada urang, atawa malah tikelebuh kana padu rame atawa
seseremonian jeung citra (wungkul). Sirikna, geus ngarasa cukup mun kagiatan
urang geus diwartakeun dina koran atawa disorot kamera teve. Maksud kuring:
Kunaon acara kasenian nu aya, boh nu beurang boh nu peuting, teu dirancang
jeung diajangkeun keur lingkungan nu leuwih lega? Dina hal ieu (oge) keur kumna
urang Keresek teu ekslusif, ngan keur urang Kusnet wungkul. Nepi ka bakti
sosial tadi lain bae mangrupa mere papakean jeung duit. Tapi, oge diembohan ku
hiburan atawa pintonan kasenian. (Perkara longserna rehe, eta mah lain soal).
Bener, udagan poko HBH taya lian ti silaturahmi sasama wargi Kusnet. Tapi,
nya ieu satemenna nu jadi mataholang pangacaprukan kuring ieu: Salila ieu,
satemenna, urang asyik papada urang sorangan. Sundek, introvet atawa ego
sentris pisan. Di mana teu kitu ge, urang kurang bisa ngaropea hiji kagiatan
kalayan optimal, nu bisa ngaguar jeung ngaropea udagan nu leuwih jero, nu
leuwih jembar jeung strategis bari subtantif.
Bisi lieur, saencan ngacapruk leuwih jauh, idinan heula kuring negeskeun deui
posisi kuring pakait jeung Kusnet: Keur kuring, taya bedana jeung maksud nu
aya dina jargon-jargon nu nyampak di ieu milis ti mimiti Urang Sunda Hudang,
Euy! nepi ka Halik ku Aing (Poma ulah dikosewadkeun jadi Paaing-aing, komo
Kumaha aing mah) -- Kusnet lain sakadar tempat ngawangkong. Tapi, hiji media
konsolidasi urang Sunda (nu jadi anggota Kusnet) dina raraga nyanghareupan
pasoalan nu disanghareupan sarerea. Ti mimiti perkara basa jeung kasenian
Sunda, nepi ka pasoalan sosial, ekonomi, politik, hukum, lingkungan, jeung
sajabana. Mun diudag leuwih jero, eta sakabeh pasoalan teh museur dina hiji
perkara: Kualitas (visi jeung kapercekaan) SDM Sunda dina ngokolakeun hiji
kagiatan (boh mangrupa disiplin elmu atawa nu naon disebut profesi).
Logikana: Mun SDM Sunda unggul dina widang politik, misalna, urang moal
luhlah soal anggota DPRD nu umumna lain pituin Sunda. Mun urang Sunda perceka
dina perkara lingkungan jeung teknologi, urang moal rumahuh ngeunaan sawah nu
arucutan jadi real estate atawa kawasan industri. Mun urang tapis dina ekonomi,
urang moal ngacapruk ngeunaan kios-kios di pasar nu dieusian ku urang peuntas.
Moal ngirung mun sakalina ngobrol perkara pendidikan, moal jamotrot mun
sakalina aya nu ngomong rada beda ti urang, jste.
Kukituna, logis pisan mun sagala kagiatan nu aya di lingkungan Kusnet teh
intina mah migeykeun SDM Sunda, dina hal ieu nya SDM nu aya di lingkungan
Kusnet sorangan. (Kukituna deui, pilihan MJ jeung Ua Sas milih ngaran Perceka
keur ngaran yayasan nu diaaradegkeunnana, sabenerna mah geus pas. Tinggal...).
Tapi, naon hubungannana jeung HBH?
Teges pisan: HBH taya lian ti media atawa wadah pikeun ngasah kapercekaan SDM
Kusnet dina ngokolakeun hiji kagiatan. Lain ukur wadah silaturahim sanajan
ieu oge ulah nepi ka kapopohokeun. Keur kuring, mun kagiatan HBH ieu dilakonan
kalawan tigin, teu pamohalan alumni-alumnina bisa ngadegkeun usaha manajemen
kagiatan atawa EO mun daek. Kari ngobah skala jeung ambahannana. Sabab, naon
nu dilakonananna taya bedana jeung EO. Mikirkeun kadaharan naon nu rek
diasongkeun, saha nu nyieunna, pintonan naon bae nu rek dipidangkeun, sabaraha
beayana, kumaha karulemna, kumaha mun aya nu ngadadak rieut atawa nyeri huntu,
mun butuh tenda, tenda kumaha nu kuat, pantes, jeung ekonomis, kumaha mun aya
tamu dadakan nu teu mere konfirmasi heula, jste. Kituna teh, jelema (jeung
waragad) nu dikokolakeun dina HBH teh lain saeutik.
Maman Gantra
Jalan Salemba Tengah 51,
Jakarta 10440.
0812-940-5441
---------------------------------
Ahhh...imagining that irresistible "new car" smell?
Check outnew cars at Yahoo! Autos.
