Resep pisan maca lalakon lalampahan neng Agi ka Ciptagelar. Nambih wawasan pribados. Ieu mah sakedik mairan bagian pargaraf Gerak dinamis jeung erotis eta teh kungsi meunang sentilan peureus ti nu lalajo nu datang ti Bandung. Ngan, da kumaha atuh, cenah ge: Di mana langit di pijak, di situlah langit dijunjung. Numutkeun pribados, dimana bumi di pijak, di situlah langit di junjung teh paribasa urang Minang. Paribasa ieu biasana dianggo ku urang Minang anu ngumbara tebih ti ranah Minang, upami teu lepat maksadna urang Minang kedah mawa diri (menyesuaikan diri) luyu sareng adat istiadat di tempat ngumbara. Naha paribasa ieu cocog upami diterapkeun ka masarakat cipta gelar? Jigana henteu kumargi urang Cipta Gelar henteu ngumbara teras menyesuaikan diri sareng adat sejen. Paribasa anu langkung cocog digunakeun panginten ngigelan jaman atanapi ngindung ka waktu, mibapa ka jaman. Kumargi ayeuna jamanna jaipong dungdat nya jaipong dungdat oge dibudayakeun di eta wewengkon. Sanes kitu? Saneeees saur manuk meni reang. Harepan pribados mah mugia seni budaya asli di Ciptagelar tiasa lastari henteu ilang kadesek ku budaya kontemporer (sapertos pongdut) supados kabeungharan seni budaya di tatar Sunda oge lastari. Salam, Asep
agni malagina <[EMAIL PROTECTED]> wrote: Seri Road to Holy Land: pongdut vs debus, Seren Taun Ciptagelar Agustus 2007 agni malagina, diterjemahkeun ku Kang Mumu Si kuring miluan lalampahan ka Ciptagelar bareng jeung kasepuhan Sindangbarang, tgl 4-5 Agustus 2007.Lalampahan salila 7 jam ti Bogor teh matak kaget si kuring. Daerah tarahal kudu disorang sanggeus Palabuan Ratu ka Ciptagelar ngaliwatan desa Cengkuk jeung Ciptarasa. Meh 3 jam awak dioyag-oyag dina mobil narabas leuweung ngaliwatan jalan batu jeung taneuh nu lungkawing. Naha kudu kieu lalampahan nalungtik budaya Sunda teh? Naha kudu kieu lalampahan neangan jati diri teh? Luar biasaaa.. Tabuh 4 pasosore. Si kuring spk nepi ka Ciptagelar. Sukurlah...si kuring spk nepi ka nu dijugjug kalayan sehat padahal daerah nu kaliwatan teh sakitu matak meres tanaga. Kaayaan di Ciptagelar haneuteun pisan. Land Rover ngajajar, bikers-bikers markirkeun sapeda-sapedana. Rame .Tiris stabil mimiti karasa ku si kuring. Ngan wae tirisna eta daerah Gunung Halimun teh ngadadak nyingray basa si kuring ngadenge ramena pongdut di lapangan Ciptagelar beulah handap. Naluri dangduters si kuring buru-buru mawa ieu suku ngalengkah neangan eta karamean. Ngaliwatan pakampungan nu rame, ngaliwatan tenda para padagang nu ngajual rupa-rupa barang karajinan masarakat adat nepi ka Coca Cola....geuning, Coca Cola ge nepi ka Ciptagelar. Luar biasa Amerika, euy Kacida helokna si kuring sanggeus nepi ka deukeut panggung pongdut tea...nu nyanyi dangdut teh make kostum warna biru gutak-gitek, ngagual-geolkeun imbitna. Hebat...manehna make hotpants jeans jeung kemben warna biru. Gerakanana erotis nuturkeun pamaen musik nabeuh lagu Kucing Garong. Teu disangka, teu dinyana...samemeh Upacara Seren Taun...saencan upacara adat nu geus lumangsung salila 600 taunan, aya pintonan pongdut nu sakitu dahsyatna. Teu katinggaleun saweran ge dimimitian...1000, 10000, nepi ka 50000. Pongdut memang mesin duit nu produktip. Hebat... Poe beuki nyerelek, tambah sore jeung tiris. Lapar ge datang. Si kuring jeung salah saurang sobat mutuskeun kaluar tina karamean pikeun neangan hawa seger jeung suasana simpe. Si kuring duaan manggihan nu keur balap naek jambe. Rame pisan. Lalaki, awewe, kolot, ngora, silihbantu pikeun nyokot hadiah-hadiah nu ngagantung di puncak kai jambe, kaasup nyokot sabotol Coca Cola. Nempo Coca Cola ngagantung, si kuring duaan langsung ngarasa geus kudu buru-buru neangan tamba haus. Si kuring turun ngaliwatan taneuh garing pinuh ku kekebul nuju ka sisi sejen pakampungan Ciptagelar. Sinyal kuat si kuring duaan nangkep prekuensi mi instan nu digodog. Buru-buru si kuring duaan nyampeurkeun warung leutik deukeut leuit-leuit nu ngabadega kalayan angkuh nu jumlahna puluhan... Ceu, nganggo sangu, nya... Mangga, Neng. Tuang di bumi wae yu, supaya rineh. Nuhun Ceu, enakan di warung. Teu lila datang dua mangkok mi godog jeung sapiring sangu beas beureum. Neng, di dieu mah teu kenging ngajual sangu. Ngan Eneng tiasa nyuhunkeun sangu sakahoyong Eneng. Wah....hatur tengkyu, Ceu. Luar biasa. Beuki poek, peuting, tiris. Si Kuring spk istirahat di Wisma Sudin Budpar Sukabumi bari ngareungeukeun sora pintonan Jipeng di panggung deukeut wisma budpar. Tapi beuki lila ceuli si kuring rada kaget ngareungeu lagu Kucing Garong nu kawasna mah kaluar ti speaker gede di panggung Jipeng. Si Kuring ngawaskeun tina jandela jeung waaw pongdut berjaya deui. Si kuring kahudang deui rasa panasaranna pikeun nempo pintonan di panggung Jipeng. Jeung memang bener...sanajan seniman Jipeng masih dariuk dina panggung, tapi pintonan geus diganti ku pongdut Ciptagelar. beuki peuting, beuki tiris, gerak erotis dangduters oge beuki motah... Lalaki-lalaki oge geus wani naek ka panggung milu ngibing bareng jeung nu nyanyi. Teu kawas dina panggung waktu beurang...katempo pada areraan. Gerak dinamis jeung erotis eta teh kungsi meunang sentilan peureus ti nu lalajo nu datang ti Bandung. Ngan, da kumaha atuh, cenah ge: Di mana langit di pijak, di situlah langit dijunjung. Cek si kuring mah, fenomena Pongdut di Kampung Masyarakat Adat Ciptagelar bisa jadi kajian budaya ditilik ti multidisiplin. Peuting beuki tiris, tiris oge nu maksa si kuring ninggalkeun karamean panggung. Si kuring milih ngabungkus awak make sleeping bag...tibra dina mongklengna peuting. Upacara Seren Taun dilaksanakeun jam 9. Arak-arakan rame pisan. Debus, rengkong, angklung gubrag, jadi kokojo arak-arakan Seren Taun Ciptagelar. Nepi oge ka tungtung acara, ritual majikeun (ngasupkeun) pare ka jero leuit Si Jimat nu dipingpin ku Abah Anom jeung dituturkeun ku istri munggaran sarta tilu budakna. Prosesi lumangsung kalawan hikmat. Pantun Sunda dihaleuangkeun pikeun muji Pangeran dibarengan ku jentrengna sora kacapi. Upacara rengse jeung acara Seren Taun Ciptagelar oge lekasan... Si Kuring ngan bisa nyokot sababaraha gambar jeung mikirkeun sababaraha masalah jeung karamean nu kapanggih dina lalampahan munggaran ka Ciptagelar...bisa jadi oge lalampahan pamungkas pikeun si kuring. Sababaraha lalakon jeung pemandangan nu kapanggih ku si kuring salila 14 jam di Ciptagelar nyababkeun si kuring bungah sakaligus bingung. Hahahaha....jeung, saperti biasa, nimbulkeun loba pananya dina uteuk si kuring.... Kumaha carana kulawarga Abah Anom bisa nepi ka Ciptagelar? Geus 600 taunan maranehna aya di suku Halimun, naha masih keneh aya kahayang balik deui ka tempat asal maranehna (Pakwan Pajajaran baheula)? Naha maranehna baris neangan akarna? Wanoja-wanoja di Ciptagelar sakitu beresih, bodas, jeung mibanda ciri pisik mirip etnis Cina, naha maranehna miboga hubungan pancakaki naon jeung ras Mongoloid? Pakampungan maranehna sakitu solidna, kumaha carana maranehna bisa cicing di tempat nu sakitu nenggangna? Kumaha carana maranehna bisa tetep survive? Kumaha tatagaul maranehna nu dumuk di eta tempat? Kumaha sistem duduluran (kekerabatan) jeung perkawinan antarpenduduk? Kumaha kahirupan awewe-awewe dina masarakat adat...ku sabab maranehna geus karawin dina umur nu masih ngarora keneh? Kumaha pangaruh Pongdut dina kasenian di lingkungan masarakat adat Ciptagelar? Kumaha kahirupan ruang publik di eta daerah? Kumaha memori kolektip masarakat Ciptagelar bisa tetep lumangsung nepi ka ayeuna? Naha tradisi dina kahirupan maranehna geus ngageser? Basa Pongdut leuwih dipikaresep tibatan kasenian saperti debus, jipeng, jll-na nu mekar di kampung adat.....duka teh teuing...loba keneh pananya teh.... Lalampahan si kuring spk Road to Holy Land mawa si kuring spk ka Ciptagelar jeung si kuring spk bakal terus neangan .. Salam, Agi <embed src="http://images.multiply.com/multiply/horizontal-headshot-badge.swf"; type="application/x- --------------------------------- Fussy? Opinionated? Impossible to please? Perfect. Join Yahoo!'s user panel and lay it on us. Asep --------------------------------- Park yourself in front of a world of choices in alternative vehicles. Visit the Yahoo! Auto Green Center.
