MEGA BODAS Ditulis ku: Kebo Hideung -Perum MB Kawalu Tasikmalaya
Kurang leuwih wanci janari gede kuring apruk-aprukan ka reuma dibarengan ku caangna purnama, ngaliwatan walungan anu caina herang. Cep karasa tiisna cai walungan, matak seger karasana mimiti tina dampal suku dugi kana bitis, kuring kukucuprakan meuntas walungan. Hanjat tina walungan kuring nuluykeun lalampahan mapay-mapay jalan satapak, netek nanjak ngaliwatan kebon sampeu anu keur meujeuhna hejo daun. Beak tanjakan kuring ngarenghap miceun kacape, alhamdulillah dugi oge ka puncak reuma. Dina akar kiara kuring diuk bari nyawang kaayaan dibeulah handap, kaciri luar-leorna walungan anu tadi kukuring kaliwatan, bentes caina gugurilapan katojo cahaya bulan. Ret ka lebah kenca katempo gerotna leuweung simagonggong, ret kalebah katuhu katenjo ngemploh hejona pasawahan dihias ku rentulna saung patani. Aya kana satengah jam kuring nempoan pamandangan ti luhur reuma, tuluy kuniang hudang maksud teh rek balik. Acan oge suku ngalengkah, SubhanAllah..SubhanAlloh....Allahu Akbar..Allahu Akbar...! kuring asa ngimpi tuluy gigisik...ah..lain ngimpi ieu mah tapi nyata. Mega bodas tiluhureun kuring diuk, nyirorot ka handap jlag-jleg mangrupa manusa, warnana bodas ngeplak ngan beungeutna teu mangrupa, mun ditilik-tilik mah jiga patung. Mega bodas eta teu eureun-eureun nyirorot ka handap mangrupa jiga manusa. Reuma anu sakitu legana pinuh ku barisan mega anu mangrupa manusa, walungan anu sakitu panjangna katutup bodasna makhluk eta. Kabeh baris rapih ngiblat ka lebah kulon ngabentuk formasi sholat. Subhanallah....kuring asa teu percaya asa ngimpi makhluk mega eta keur ngadegkeun sholat. Beres ngadegkeun Sholat eta makhluk anu ngajelma tina mega, ting belesat deui kaluhur balik deui ka asalna jadi mega bodas. Bareng jeung ngapungna mega bodas kuniang kuring hudang, tuluy gigisik bray panon kuring beunta....Astagfirullah Al'adzim geuningan kuring teh ngimpi...Allahu Akbar ngimpi teh bet kuendah... Sajongjonan kuring ngahuleng luhureun dipan, kuring ngagebeg duh..Gusti rumaos ibadah abdi can leres, rumaos abdi loba dosa, Ya Allah....hapunten sanes kanten dosa abdi, Ya Allah...mudah-mudahan kupepeling ngaliwatan impian eta, tiasa mancegkeun iman abdi...amien Ya Robbal Alamin. TAMAT Tasikmalaya, 28 Agustus 2008
