[Keom Sakedap] ALAREM Nu pangsatiana dibulan puasa, ceuk batur kuring nu sakapeung sok gede rahul, cenah hape atawa beker. Mun diset alaremna ka wanci sahur, tara jalir jangji, sok langsung we ngirining ngahudangkeun. Matak teu aneh,manehna leuwih bogoh ka hapena daripada ka kikindeuwanana, da cenah kabogohna mah mun jangji teh kadang sok sulaya.
Basa keur aya keneh batur ngarengkolna, alarem nu sok ngahudangkeun saur teh lain wae sora hape, tapi sora kerek nu sare disabeulaheunana. Kalan kalan mun keur usum loba reungit, sora reungit oge bisa robah pungsi jadi alarem, atawa jorojosna minyak panas nu diancloman anak jaer didapur tatanggana oge pipilueun jadi alarem. Bisa dibayangkeun mun nu dianggap alarem ieu, disada babarengan mana teuing gandengna. Keur mah ceulina loba dedengean katambah irungna ngambeu melenghirna beuleum peda, atuh manehna ngorejat hudang bari ungas ingus kawas bagong leuweung neangan mangsa. Kiwari puasa geus nek nincak lilikuran, nu sok geten ngahudangkeun ku kerek geus mulang kalemburna, reungit oge siga nu geus boseneun ngulampreng wayah janari, kitu deui didapur tatanggana, teu kadenge deui trongtrangna sora cungkir paadu jeung katel sumawona jorojos sora minyak panas. Bener bener rehe comrek. Ngan ukur sora alarem hapena, nu kiwari masih pengkuh nohonan jangji. Peuting kamari wanci janari leutik, batur kuring nu sakapeung sok gede rahul ieu,sare ngarengkol sorangan, sanajan keur sare tapi paromana siga nu bungah, sihoreng manehna keur ngimpi kaheumpikan ku widadari. Bakating ku bungah korejat manehna hudang, rarat reret siga aya nu diteangan, da cenah sidik pisan widadari teh, neundeut pisan kana dadana, ngagepluk murag tiluhur. Pas ditilik tilik sihoreng geuning nu murag teh cakcak bodas nu kamalinaan ocon jeung baturna, antukna tokosewad tina lalangit. Bari bibirigidigan da ginggiapeun keneh ku sakadang cakcak,ragamang leungeun manehna cupu capa kana hape, terus dipencet, gebray layarna caang, katingali dipojok kenca hapena atra aya jaman anu karek nincak jam dua lewat lima menit. Lumayan cenah aya waktu sajam lima puluh lima menit deui ka saur. Nya guher deui we manehna sare. Jam tilu janari, alarem hapena disada, nohonan jangji deui. Nu dihudangkeun jongjon we ngaguher, malahan ngiriningna sora hape jadi patembalan jeung sora kerekna. Bosen hayoh wae disada nepikeun ka peuyeuh, rep sora hape jempe kawantu batrena oge geus lowbet, atuh sora kerek teh tambah atra tur tambah ngageleger. Lima menit deui ka imsak mun keur mengbal mah geus asup injuri time, gurubug manehna hudang,gasak gisik kana panon, lumut lamot kana biwir,lutak letak kana bantal. Terus nganclomkeun curuk kana gelas nu saterusna dioleskeun kana sela sela panonna. Karek ge nek nyedok sangu tina boboko, kadenge dina tipi Gita Gutawa geus ngahaleuang lagu do'a puasa, nu nandakeun waktu imsak geus datang. Sangu dina dipiring anu geus ditumpangan ku bakakak,ngan ukur dipelong. Sungutna kekerenyeman, dua leungeunna ranggah, husu menta perpanjangan waktu ka Gusti Alloh. Sanggeus kitu mah, celebek we manehna ngahenggoy bakakak semu nu ni'mat pisan. SR/KS/07
