Aya seratan Uwa Sas dina Mangle wedalan No. 2141 (1 - 7 Nopember 2007), anu ngadugikeun gagasan/usulan anu kalintang saena ngeunaan e-book anu peryogi dikokojoan ku LBSS. Dihandap ieu potongan seratan anjeunna (salengkepna tiasa diaos dina Mangle): Aya hiji situs internet anu kawilang popiler sok disebut Gutenberg (Gutenberg nyutat tina ngaran jalma urang Jerman, ngaran lengkepna Johann Gutenberg anu hirup antara taun 1400-1468 M. Dina bukuna Michael Hart, Seratus Tokoh, asup kana urutan nomer dalapan dianggap boga jasa keur ngamekarkeun sajarah dunya lantaran geus mampuh nyiptakeun alat nyitak buku) di alamat http://www.gitenberg.org. Ieu situs teh kaasup situs nirlaba anu nyadiakeun e-books, bisa dikunjal (download) ku saha bae kalawan haratis. Lamun urang hayang maca buku karya Jules Verne anu judulna Around the world in 80 Days tangtu we dina basa asing, tinggal klik, langsung bisa dibaca. Hasil pangarang sejen ge nyampak kayaning karya Charles dickens, Oscar Wilde, Edgar Allan Poe jeung sajaba ti eta. Sigana lamun urang Sunda nurutan siga kitu asana teu salah-salah teuing, boga situs samodel Gutenberg, dikokojoan ku LBSS (Lembaga Basa jeung Sastra Sunda). Pangna kudu dikokojoan ku LBSS pedah we apan LBSS teh hiji lembaga anu dihenteu-henteu ge boga otoritas kana kamekaran basa katut sastra Sunda. Carana teu hese-hese teuing, entong ari dina webblog anu haratisan mah, era bisa majarkeun LBSS teu boga biaya jeung bisi disangka amatiran. Anu penting aya niat heula kalawan jejem, dina derma mah pasti loba anu mantuan. Eusina, nyakitu samodel Gutenberg, ngadigitalkeun buku buku basa Sunda, bisa dikunjal (download) ku saha bae kalawan haratis jadi sifatna nirlaba, lain komersial. Ngan tangtu aya aturan, buku basa Sunda anu mana anu bisa didigitalkeun, kalawan disebarkeun dina internet. Ulah nepi ka aya sangkaan ngalanggar HAKI (Hak Kekayaan Intelektual), ceuk legegna mah ulah nepi ka ngalanggar copyright, kudu bener-bener buku anu geus right to copy. Keur saheulaanan ngadigitalkeun buku-buku anu umurna geus lima puluh taun ti mimiti dipedalkeun (hal ieu ge kudu ditalungtik deui naha enya nu geus umurna lima puluh taun, kudu disaluyukeun deui jeung Undang-Undang HAKI), atawa menta ijin heula ka pangarang jeung pamedalna. Salian ti sifatna nirlaba kudu terbuka deuih, maksudna kudu ngawadahan saha bae anu rek jadi kontributor sakalian ngawadahan anu rek jadi donatur. Nu disebut kontributor nyaeta anu sadia jadi relawan pikeun mantuan ngeusian situs, sedengkeun donatur mah nya anu mantuan mere biaya. Didieu ge tetep aya aturan, tulisan anu dikirim ku kontributor kudu disortir heula ku administratur samemeh dianggap layak tayang. Ngaran eta situs bisa bae http://www.lbss.or.id dina salah sahiji menuna nyadiakeun e-book. Salam, Aschev
__________________________________________________ Do You Yahoo!? Tired of spam? Yahoo! Mail has the best spam protection around http://mail.yahoo.com
