Moal dijaprikeun ah, eta mah tutungkusan pribadi. Aya wanoja lenjang turunan Arab, nalungtik perkara komunikasi antara anu nikah Sunda sareng Arab. Osok ka rorompok teh pedah sok maca buku-buku perkara Sunda, dina hal adatna (kabiasaan) urang Sunda. Polikronikna urang Sunda teu sabaraha lamun dibandingkeun sareng polikronikna urang Arab. Contona cenah salakina Arab, istrina urang Sunda, hiji waktu salakina ngajak ka ondangan berangkat teh kira-kira rek jam 10 isuk-isuk. Puguh we istrina tos dangdan samemeh jam 10, tapi jadina berangkat jam 4 sore. Istrina ambek-ambekan, ari ceuk salakina kapan poe ieu keneh lain isukan. Tapi cenah eta rumahtanggana tetep runtut raut. Tah ieu nu nuju ditalungtik ku si wanoja Arab teh.
Aya deui wanoja rada eraan ti Psikologi Unpad, mukaan buku buku Sunda, ari dur magrib ngiring solat, beres solat ngadoana lami pisan, beres ngadoa teras amitan, puguh we sim kuring rada kerung, na ari maca bukuna sakolepat, naha naon anu dibacana?. Lantaran panasaran nerus nanya ka inyana, bari saduksaduk bisi tugenah ku pertanyaan, ari jawabanana teh cenah kadinya saheulaanan neangan alamatna heula, tos kapendak mah gampil kanggo salajengna, jadi sesuai sareng niat jadi teu perlu lami da tos terang alamatna. Ceuk kuring teh leuh ieu mah sesuai sareng karakter calon psikolog atuh. Inyana ukur ngaheheh....enyaan we jol saterasna mah lami ngungkaban buku. Tah nu ieu mah benten deui, wanoja jangkung lenjang, jolna kana mobil, nyupir nyalira, jol teh maksadna bade milarian hal BMC (Bandung Milk Central), atuh puguh sim kuring rada pungak pinguk lantaran teu pati apal dina buku naon anu ngamuat hal BMC, tuluy manggih buku hal Bandung taun 1926 didinya aya BMC tapi dina basa Walanda, ceuk inyana perluna anu basa Indonesia, atuh ku kuring buku buku rada lawas dituduh tuduh, samisal majalah Warga anu terbit taun 50an, sugan we aya didinya, ku eta budak ukur dibukaan saeutik jeung katingalna siga anu jarijipen malum bukuna rada belewuk. Budak teh siga anu hulang huleng, ceuk manehna keukeuh neangan buku anu aya BMCna. Ku kuring rada dikolongan "Ari Eneng urang Bandung..?" manehna unggeuk, ceuk kuring deui "Sok nyeuseuh nyalira...?", bari rada semu era ngajawab tara. Ceuk kuring deui .."Neng ari milarian bahan teh kedah enya-enya sumanget, ulah hoyong dihuapan bae, kedah rajin mukaan tur maca buku, ulah ngadagoan dipasihan batur...". Duka tah pedah rada keras omongan sim kuring, da eta budak teh teu aya jol deui. Enya sim kuring rada keuheul ku gayana anu siga hoyong dihuapan, beda pisan waktos nyanghareupan wanoja ti Surabaya anu milarian kabaya Sunda, eta mah dokoh pisan kana buku, unggal buku anu disodorkeun dibukaan kalawan gemet, nu aya patalina jeung pananlungtikan dirina dicirian, terus difoto, dicatet sumberna. Sapopoe ngadekul, da ceuk dirina jadwal dinten ieu mah didieu, atuh kuring ge teu kapalang ngahucuhkeun. Beda pisan sareng nu milarian BMC, ku kabeneran deuih nu leleda teh bet wanoja urang Sunda. Tos ah... MSas ----- Original Message ----- From: Jalak Pakuan To: [email protected] Sent: Wednesday, December 12, 2007 11:54 AM Subject: Re: [Urang Sunda] Tamu Jeung Ngobrol Sabulangbentor. Wa tukang cet japri ka abdi cenah seueur oge tamu wanoja2 lenjang, sok carioskeun atuh wa
