geus lila dianti, geus lawas diarep-arep ngeunaan rarancang (konsep) tempat
meuseuh diri (pendidikan) anu bisa nyaluyukeun tatapakan kearifan budaya lokal
rejeung kearifan sarta kamajuan budaya anyar anu asup.
geus hese manggihan tempat meuseuh diri (madrosah) anu bisa ngawinkeun kearifan
budaya lokal sunda rejeung kabijaksanaan anu ditawarkeun ku islam, nu aya geus
heubeul karasa jeung katitenan yen dua kakuatan sunda jeung islam silih tuding
antara hiji jeung anu lainna, silih tunjuk silih salahkeun yen masing-masing
silih "ngotoran" silih "rusak" pihak anu lain. minangka conto kabandungan
meureun kumaha islam nuduh musyrik jeung sirik kana budaya ngukus menyan jeung
cara sukuran anu diwariskeun ti karuhun urang sunda, jeung kumaha anggapan anu
sakitu "radikal" muncul di sabagian urang sunda, yen asupna islam mangrupakeun
salah sahiji faktor anu "ngikis" kabudayaan jeung ngaleungitkeun budaya sunda
warisan karuhun.
patuduh-tuduh anu sabenerna henteu perlu digegedekeun, mangsa sunda-islam,
islam-sunda sabenerna bisa leumpang babarengan, bisa jalan sauyunan tur silih
hargaan. hal anu wajar lamun saterusna aya "asimilasi" aya "kacampuran" aya
"kompromi" diantara islam jeung sunda. tinggal kumaha kiwari urang anu aya
diantara kaduana (islam-sunda) bisa wijaksana nerapkeun eusining "ajen inajen"
(nilai) anu ditawarkeun ku kaduana (islam-sunda).
mangsa kiwari ku kaayaan keur harengheng loba dedengean jeung titingalian anu
matak "miris" kanu hate, nempo nagri nu gering nangtung ngalanglayung,
rumanggieung teu puguh arah teu puguh lengkah .... siga tangtungan nu teu boga
ciri, tangtungan nagri nu teu boga budaya hade, tangtungan nagri anu teu boga
"jatidiri"....... korupsi, kolusi jeung nepotisme geus lila ngagalaksak
ngaruksak karaharjaan nagri indonesia. kaadilan geus lila ukur jadi papaes
langit anu teu kahontal da ngawang-ngawang di jomantara, kamakmuran ukur jadi
pangbeberah manah sabagean leutik rahayat ieu nagri, jomplang pisan jeung
"umumna" rahayat anu lara balangsak hirup aya dina katunggaraan.....
dongeng enteng pernah nyaritakeun yen ieu nagri terus-terusan dijajah, ti
mimiti di jajah bangsa deungeun (walanda-jepang) tepikeun dijajah bangsa
sorangan (cenah : orde baru model penjajahan dina wanda anu sejen) ..tepi
dijajah deui ku bangsa deungeun ku cara teu langsung ngaliwatan ngajajah
ekonomi jeung kabudayaan.......
ayeuna ieu nagri keur dijajah ku "musuh" anu paling beurat tur hese dilawan...
nyaeta tiap jelma di ieu nagri (umumna) keur dijajah ku diri pribadina
sorangan. umumna jelma-jelma di ieu nagri jadi jelma anu teu payaan,
panasbaran, belikan jeung teu kaopan wae intina mah.
batur korupsi, milu korupsi. saeutik kasenggol der diributkeun gegedean,
tatangga kabeuli motor der hayang leuwih boga mobil, salaki pamajikan loba anu
teu akur akibatna loba rumah tangga anu burantakan, jelma silih paehan, rampog
jeung kajahatan meuweuh dimana-mana...... jeung loba carita-carita sejenna anu
unggal poe, unggal waktu dibewarakeun dina warta-warta unggal TV anu aya di ieu
nagri....
beu...Gusti... aya naon atuh ieu teh ????.....
hawa nafsu ngurung nalikung ieu nagri, ngepung wakul ti unggal madhab.....
matak miris mun heug diri teu boga iman jeung kayakinan, bisa kabawakeun.
kudu kumaha atuh ???....
agama di ieu nagri aya 5 macem (kurang leuwih) anu diaku ku pamarentah, jeung
umumna rahayat ieu nagri anu geus nyieun jeung boga agama ditulis dina KTP
na... pasti ngagem agama..(naon wae agama na mah)... tapi geuning angger anu
umum kajadian mah di ieu nagri teh teu weleh tina kagorengan jeung
kajahatan.... padahal agama mah kabeh oge nitah bener nyarek salah..... teu aya
agama anu nitah jeung mapagahan ngalakukeun kagorengan di ieu dunya......
balik deui ka islam, nu "ngaku" ngagem agama islam jumlahna mayoritas (hartina
henteu saeutik), tapi naha pacengkadan jeung kabobrokan mental lumangsung lir
teu aya tedeng aling-aling, geus jadi rahasiah umum nu nyieun kawijakan di
gedung dewan (wakil rahayat) nyieun aturan bari nundutan jeung dititipan
amplop "uang lelah" , nu korupsi make kopeah jeung jilbab, tepikeun ka anu
maraksiat ngajual diri make pakean muslimah....
naha aya naon atuh ieu teh ???....
horeng agama ukur jadi "akuan"... horeng ngaji kitabna ukur "apalan"...horeng
dibaju takwana ukur "mode" jeung gagayaan...... anu puguh mah lain teu ngalarti
kanu agama.... lain henteu apal kana aturan agama..... tapi anu puguh mah hate
jeung rasa poek kalimpudan hawa nafsu sagala di rumpak sagala di dupak.....
ciri jelma nu kasasar teu eling di temah wadi, teu apal ka jatidiri.....
Pasantren Seni, Pasantren Budaya, Pasantren Implengan.... ngajajap pribadi nu
hayang nepungan jatidirina, lain nganteur ngapalkeun dalil hadis tapi jajap
"nagamanahan" rasa.... nepungkeun jirim jeung hakekatna, ngumbar rasa na
amparan "kasadaran"... sadar dina elingna, eling dina sadarna.......
Pasantren Seni, Pasantren Budaya, Pasantren Implengan.... teu boga niat
"ngahasilkeun" alumni anu ahli agama ... sabab... ahli agama geus loba anu
kacaritakeun ngarusak agama, ngajual agama, ngotoran agama....
Pasantren Seni, Pasantren Budaya, Pasantren Implengan.... cukup boga harepan
bisa ngahasilkeun pribadi-pribadi anu ahli nafakuran kana diri pribadina.
Salam Baktos.
Mang Maya.
www.salakadomas.multiply.com
www.hasanmustapa.wordpress.com
www.kusnet.ning.com
---------------------------------
Bergabunglah dengan orang-orang yang berwawasan, di bidang Anda di Yahoo!
Answers
