Salgari
Nincak semester ka tilu, sakola teh geus mimiti bosen. Asa kitu keneh kitu
keneh. Atuh, basa maca pangumuman yen British Council mere bea siswa keur
sakola di LSE kuring langsung curinghak. Aya pikir hayang ngiluan eta program.
Saha nu nyaho bisa kaajar ku Sidney Hook, nu sawatara taun saencanna nganjang
ka Indonesia. Poe eta keneh ngagidig ka Jl.Tamblong, ka pabukon British
Council, nyokot formulir. Ari test-na mah di British Council, Jakarta, dua tilu
bulan ti harita.
Piisukeun test, kuring miang ka Jakarta. Ngahaja ka Jl.Jambu, ka imah Teh
Dewi -- teu ka Slipi, ka imah kapi nini, sakumaha biasana mun ka Jakarta.
Pikiran teh ambeh peutingna bisa diskusi jeung nu boga imah, nu ku kuring
dianggap leuwih pangalaman dina perkara test keur beasiswa. Ngan teu ku hanteu,
kasampak teh manehna keur kasemahan hiji wanoja Itali. Harita ge, basa kuring
datang, maranehna keur uplek ngobrol. Dina meja pabalatak sawatara komik. Kabeh
dina basa Itali. Salah sahijina, nu judulna I Pirati della Malesia (Bajo
Malayu). Dina jilidna aya gambar beungeut lodaya, siga lambang Kodam Siliwangi.
Matana seukeut neuteup nu maca.
Satengahing mulak-malik komik nu aya dina meja, bari ukur ngarararampa harti
tulisan nu nyampak di dinya, da kuring teu bisa Basa Itali, kuring pogot
ngabandungan nu keur aruplek ngobrol. Wuwuhan duanana papada jero kaweruhna
ngeunaan naon nu diobrolkeun. Ongkoh, harita, kuring ukur nyaho komik lokal
jeung Tintin. Kitu ge, tangtuna, jajauheun bisa disebut ahli. Ukur nyaho,
sakumaha umumna barudak harita, nu ngajadikeun komik salaku bacaan jeung
hiburannana, bari teu nepi ka masket atawa panatik. Ari ieu, nu diobrolkeun teh
komik Itali nu karak harita kuring ningali. Bari, nu ngarangna, cenah, boga
jalan hirup nu kawilang unik: Emilio Salgari.
Asup ka pangkeng teh geus jam 2. Kitu ge ninggalkeun nu masih keneh
ngalobrol. Hudang-hudang jam 10. Ari test jam 8, malah jam 7 kudu geus aya di
British Council. Atuh, nyamos. Diudag ka panitia, sasadu, api-api karak datang
ti Bandung, tangtu bae teu ditarima. Da, geus balubar. Rek ngomong langsung ka
direkturna, sieun diseungseurikeun. Ahirna, narimakeun. Bongan sorangan.
Ngabandungan nu ngobrol kalalanjoanan.
Nu ngarasa dosa pisan mah nu boga imah, sarua kabeurangan teu bisa
ngahudangkeun. Nepi ka maotna taun kamari, sanajan ku kuring dijelaskeun yen
bantetna kuring ngilu test teh lain salah manehna, inyana teu weleh menta
hampura tiap nyabit-nyabit perkara ieu. Malah, harita, lian ti mere sawatara
komik, kuring diajak ulin ka Jogya jeung Solo, nganteur urang Itali tea. Atuh,
gagal ngilu test beasiswa keur LSE, kaweruh kuring ngeunaan Salgari hususna
jeung Itali umumna rada nambahan. Da sajajalan nu diobrolkeun teh ngan eta
jeung eta bae: Salgari. Sanajan, kuring sorangan ngarasa leuwih nyaho mah
kabehdieuneukeun, sanggeus jadi wartawan. Harita, lian ti ningalian
komik-komikna, kuring kungsi dibere injeum sawatara naskah pibukueun jeung buku
ngeunaan Salgari nu jadi bahan ieu pangacaprukan.
Tetela unik jalan hirup Salgari teh. Jalan hirupna, tipikal jalan hirup
seniman jaman heubeul: Kabeulit ku kasusah ekonomi, hutang di mana-mana, anak
jeung pamajikan garering, manehna sorangan meh langlang-lingling sabaraha
kali gagal miteni diri. Lian ti kitu, Salgari jadi conto kumaha novel populer
bisa dipikaresep sapanjang jaman bari teu weleh direproduksi jadi
produk-produk popular lianna atawa jadi sawatara makalah jeung buku ilmiah nu
teu eureun mesek kasus Salgari. Nepi ka kiwari, kongres-kongres ngeunaan
Salgari tara poho diayakeun sarua dariana jeung Venice Biennale, launching
produk panganyarna Gucci, atawa kongres Partai Komunis.
Sanajan tapis dina ngagambarkeun aadatan urang Benggali, Malayu, Dayak,
atawa Papua pisan, Salgari jajauheun tina kungsi ngumbara ka India, Malaya,
atawa Indonesia. Saumur hirupna, balayar nu pangjauhna ukur nepi ka Brindisi,
hiji wewengkon di Itali Kidul. Kitu ge dina raraga praktek kerja waktu manehna
jadi mahasiswa Institut Teknik Kelautan Venesia nu dilakonan teu jucung nepi
ka tamat -- lain balayar nu satemenna. Hartina, Salgari sarua jeung Karl May:
Nu ukur ngawawaas Amerika atawa Balkan tina jero bui.
Maman Gantra
Jalan Salemba Tengah 51,
Jakarta 10440.
0812-940-5441
---------------------------------
You rock. That's why Blockbuster's offering you one month of Blockbuster Total
Access, No Cost.
