A. HAL BEDOG Target anggeus ngaguliksek perkara bedog teh pertengahan 2009. Nu tos rada kakobet : 1. Kecap golok aya dina naskah kuna S.Siksakandang Karesian (1518M), kecap bedog teu acan kapanggih dina naskah Sunda kuna. Golok pakarang raja, bedog pakakas somah, lantaran naskah kuna produk intelektual jaman harita pasti leuwih deukeut kana kakawasaan (raja) jadi sigana leuwih loba hal-hal anu aya patalina jeung raja nu asup kana naskah jaman harita. 2. Aya anggapan Golok leuwih deukeut kana pakarang, keur kaperluan martial art (bela diri) bedog leuwih deukeut kana pakakas, alat paranti digawe. Tapi eta ge teu pati kukuh, sabab loba pacorokna, komo sanggeus kecap golok dianggap basa Indonesia nu remen ditarjamahkeun kana basa Sunda jadi bedog. 3. Lamun golok pakarang raja dina mangsa bihari, naha dina waktu nu sarua geus aya bedog di rahayat?, sigana lamun nyekel kana eusi S.Siksakandang Karesian didinya dipisahkeun antara pakarang raja jeung pakarang rakyat. Kecap bedog teu kasebut, jadi mucunghulna bedog mangrupa mimikri (titiron) tina golok. Dina konsep mimikri Homi K Bhabha salian titiron tapi deuih aya unsur ngageuhgeuykeun anu sifatna rada mangrupa perlawanan kultural. Meureun lamun disebut tina golok jadi bedog nya didinya aya desakralisasi, lantaran aya counter culture ti rahayat, anu satuluyna bedog jadi prah di rahayat. Tapi naha aya keneh unsur bihari nu napel keneh dina bedog sapuratina (wilah, gagang, sarangka), nu kapanggih mere tanda aya keneh tapak lacak nu bihari. 4. Fungsi bedog aya fungsi praktis, estetis, filosofis jeung ekonomis. Maca tina ngaran wilah, wangun wilah, ragam hias dina gagang jeung sarangka, bedog leuwih deukeut kana batur keueung tibatan batur ludeung, hartina nu nyoren bedog (urang Sunda) leuwih deukeut kana defensif tibatan ofensif. 5. Dina bedog kapanggih aya unsur feminim. Jadi lamun lalaki nyoren bedog teu beda jeung ngagondeng indung salaku batur pakumaha. Naha hal ieu teh aya pakaitna jeung posisi indung (Ambu) dina carita rakyat (folklore) urang Sunda nu karekam dina pantun, enya nu kapanggih mah siga kitu, sok sanajan pamuntangananan kana teori Pa Jakob Sumardjo (naha aya teori sanes? punten nyuhunkeun kamandangna) 6. Ceuk cenah urang Sunda teh masarakat huma (pangna disebut ceuk cenah teh pedah we can manggih nu munggaran, saha nu nyebutkeun pangmimitina yen masarakat Sunda teh ngahuma) konsekwensi tina disebut masarakat huma tuluy we dilelebah, tah kuring ge dina hal bedog teh kitu. Upamana pacul urang jawa wangun paculna jeung cara ngadoranan rada beda jeung urang Sunda, meureun eta pangbeda teh lantaran bedana masarakat sawah jeung masarakat huma. Bedog salah sahiji ciri pakarang/parabot/pakakas masarakat huma, luyu jeung alamna. Matakna wangun pakarang nu mirip bedog leuwih loba jolna ti Sumatra atawa Kalimantan tibatan ti Jawa sanajan tatangga. (kanggo ngawewegan hal ieu panuhun ka baraya sadayana nu aya di Kalimantan, Jawa Timur/ Kang Tito, Bali/Gan Les, Jawa Tengah, Sumatra atanapi saha bae dimana bae manawi kantos ningal, nguping, atanapi ngobrol, perkawis sarupi kieu, bagi kamandangna ka sim kuring, nuhun-nuhun upami aya gambar/foto pakarang unggal daerah). 7. Tulisan awal ngeunaan bedog bade dimuat dina Sundalana No.7 (saurna ahir September sasih ieu bade medal)
B. HAL SEJEN. Kungsi ngobrol jeung bule, literatur ngeunaan Sunda teu loba. Ieu mere ciri yen di Sunda teh euwueuh nu pantes ditulis atawa Sunda teh parawan keneh hartina can loba ditulis. Hiji etnis sakaligus entitas anu sakieu gedena pamohalan lamun euweuh nu pantes ditulis, jadi leuwih pas lamun disebut can loba nu ditulis, parawan keneh. Insya Alloh perkara bedog rengse pertengahan 2009, tah satuluyna hayang nulis perkara lisung. Bilih aya nu bade ngiringan mangga, atuh aya nu bade nyerat nyalira perkara lisung mangga teh teuing, urang silih beungharan we. Hal sanes nu sok sering ditaroskeun : (wani nyebut kieu teh pedah we kuring boga rumah baca buku sunda, sok loba nu tatanya, bari jeung euweuh bukuna) 1. Panalungtikan Ragam Hias Sunda 2. Estetika Sunda hal pakean (iket, baju jste) 3. Sasakala ngaran tempat (toponimi) 4. Naha di Bandung aya ngaran jalan Prabu Dimuntur, Sulanjana, Rangga Gading, Sulanjana, jste. 5. Folklore Sunda salian Sangkuriang jste (Sakitu we heula biasa ari diinget-inget mah sok kalah poho) Barade yeuh....nyerat buku hal kitu. Khusus hal lisung, manawi aya bongbolongan kedah kamana nya ngajugjug, kai naon bae nu sok dianggo, saageung kumaha, naha aya ukuran pastina antawis panjang sareng lebar/ageungna, naon hartosna wangun gegelungan dina lisung, aya teu ragam hiasna dina lisung, jste. MSasmita Seueur hulang huleng mikiran bedog (ngimpina mah kieu : nyieun dua buku, nu hiji basa Indonesia, hiji deui dwi basa, Sunda jeung Inggris, moal kandel cukup 150 kaca kaasup gambar, nu dwi basa meureun 250 kaca
