Peuting tadi lalajo acara "Mata Rantai" ti stasiun ANTV. Nu ditayangkeun perkara pasantren di Yogyakarta. Teu aya nu istemewa sabenerna mah, lamun santrina nu biasa-biasa wae mah. Tapi ieu mah santrina waria wungkul, malah cenah kaasup kaum Gay jeung lesbi sagala. Aya komentar ti nu ngaku tokoh organisasi Islam, cenah pasantren model kieu,. teu meunang, sabab di Islam mah jenis kelamin teh ngan aya dua : Lalaki jeung awewe, teu aya nu ditengah-tengah. Ngan Pa Kyai nu boga pasantren boga pamandegan beda deui, ceuk anjeunna para waria ieu nu daratang ka anjeunna harayang aribadah jeung dialajar agama. " Piraku ku kuring dilarang?", cenah. Pokna teh satungtung teu dilarang ku nagara, pasantren ieu bakal terus ngadeg, moal ngareungeukeun komentar-komentar miring tinu sejen.
Loba waria nu tadina tukang ngulayab ti peuting di Yogya, jadi ararinsap, ngarasa "dijelemakeun". "Insap" lain hartina jadi lalaki tulen, tapi insap tina kalakuan kukulayaban di kota. Maranehna tarekun ngararaji di Pasantren. Para waria ieu lamun sholat, aya nu make sarung jeung kopeah .....tapi aya oge nu dimukena. Da cenah ceuk Pa Kyai kumaha ngeunahna wae, ngeunah (nyaman) make mukena ...nya mangga, sanajan maranehna lahiriyah lalaki. Leupas tinu pro & kontra soal pasantren ieu, tapi sigana pasantren ieu geus ngalaksanakeun hiji prinsip dina HAM : " Teu meunang ngalarang-larang jelema nu hayang ibadah" ...... Baktos, WALUYA
