--- On Fri, 10/17/08, Abbas Amin <[EMAIL PROTECTED]> wrote:
From: Abbas Amin <[EMAIL PROTECTED]>
Subject: Silat-12
To: "proletar" <[EMAIL PROTECTED]>
Cc: "radioliner" <[EMAIL PROTECTED]>
Date: Friday, October 17, 2008, 12:33 AM
Pabeubeurang, di kota Liao Tung aya nu datang nu dituju restoraana, jigana ieu
jelema teh datang ti tempat jauh, lantaran kaciri loba kokotor dina bajuna;
manehanana make baju anu basajan, jadi kacirina lain jelema jegud,jeungna deui
asupna ka ieu kota teh bari lempang teu naek tutumpakan naon2. Manehna asup ka
restoran di tampa ku palayan bari someah ; umur eta jelema teh kira2 40an taun,
badanna biasa wae; ngan dina sorot matana kacida seukeutna nepi ka saha wae nu
nenjo bakal ngahormat ku kharisma jeung wibawana; tanda eta jelema teh teu bisa
dianggap sisiwo.Manehna mamawa pedang pondok, nu sarangkana jeung gagangna tina
perak kabehanana; manehna teu loba mesen dahareun, jigana mah asal ulah lapar
teuing we, ngan manehna nanyakeun naha di kota eta aya tukang panday atawa
gosali; dituduhkeun ku palayan restoran yen aya duaan di ieu tempat teh; nu
hiji ngora kenah, ari nu hiji deui pantaran manehna. Sanggeus dahar, eta jelema
tih gidig wae ka tempat nu
dituduhkeun, nujuna ka nu saumur jeung manehna.
Teu kungsi lila eta jelema teh geus nepi ka nu dijugjugna, nya eta tempat
panday tea; kakara ge jol geus ditarima ku eta tukang panday teh, bari mere
budi anu kacida simeahna:"Haturan , tamu nu tebih geuning, mangga . Bade Mesen
naon atuh? Atanapi bade ningalan wae, mangga."
Manehna teu ngajawab, ngan mencrong we lila pisan ka eta tukang beusi teh, atuh
si tukang beusi teh mani ngadaregdeg di pencrong kitu teh, ngan ukur balaham
belehem we samar rampa. Sanggeus rada lila manehna nanya kieu :" Bapa, bapa tos
lami jadi tukang panday beusi di dieu ?"
“Leres pisan Gan, ti burey keneh abdi hirup di dieu teh, aya naon kituh , mani
rareuwas ?"
Manehna repeh sakeudeung terus ngalirik ka si tukang panday, terusna nanya deui
:"Kungsi bapa kaluar ninggalkeun ieu tempat?"
“Oooo, leres gan kapungkur, nuju kuring belekesenteng keneh, tapi nya akhirna
mah balik deui we ka lembur, nepi ka ayeuna."
“Kitu nya ?" Cek manehna semu rada nyindiran, salila di dieu naha aya kamajuan
usaha panday teh ?"
"Nya lumayan we gan." walon tukang panday pondok.
Keur galuntreng ngalobrol kitu, jol jelema tiluan ti kota, atuh buru tukang
gosali teh nyampeurkeun ka eta nu tiluan bari rengkuh jeung hormat pisan, bari
nanyakeun kaperluan nu tiluan .
“hehehehe, euy kamari urang mesen bedog teh 20, naha geuning nu katampa mah
ngan ukur 17 ?"
“Aduh naha nya ? da waktos eta teh yakin pisan tos dietang jumlahna 20, tos
ditampi kamari ku rerencangan para agan.”
“Naon!? yeuh kuring sorangan nu ngitung, jumlahna ngan 17, naha andika rek
nuduh yen kuring gede bohong, hah?!"
“Teu pisan2 atuh nun, tapi da jelas pisan kamari nu ditampikeun teh jumlahna
aya 20, teu kirang deui nun.”
“Tong loba omong siah, ganeng! Ayeuna gani eta bedog nu tilu, awas siah mun
henteu !”
“mangga, mangga, gamparan, mangga, ayeuna keneh bade dipidamel ku jisim abdi.”
Tukang panday teh teu talangke deui teus we migawe eta parentah, bari
dumaregdeg sieun, demi ki semah nu anyar pinanggih tea nenjokeun we ka na
sagala nu dilakukeun ku eta tukang gosali, pangpngna nenjo cara leungeunna
ngagawekeunana. Kaciri si panday teh ngagawekeunana teu kesit, siga nu cape
jeung euwueh tanaga, si nu tiluan teh ngocomang deui yen eta tukang panday teh
digawena lelet pisan, demi si tukang beusi mah teu ngomong naon2 , manehana
jongjon wae migawe pagaweanana. Ku sabab omongan maranehna asa teu didenge ,
salah sahijina nyentak:"Hey tukang panday pikun! Rek iraha anggeusna hah eta
pagawean, mun cara kieu pagawean andika ?!"
