Wilah bedog teh kakara disebut bedog lamun minimal geus dibere perah. Ari perah bahanna tina kai jeung tanduk atawa tulang. Nu tina kai diantarana tina ngaran tatangkalan saperti Kihiang, Kimunding (kamuning?), kiputri, pari, rasamala, huru, pinus, loka, jati, sonokeling, waru, jambu batu, jeruk bali, sawo, jengkol, peuteuy selong , limus piit, singawalang, boa loba keneh nu teu kasebut. Ambih kaciri rada legeg eta ngaran kai teh hayang dilengkepan ku basa laten. Nu geus kapanggih teh kihiang (Albizzia procera (roxb)), pari atawa sok disebut kihuut (glochidion molle bl), rasamala (altingia excelsa, noronha), limus piit (mangifera foetida, anacardiaceae), jati (guazuma ulmifolia), jeruk bali (citrus maxima, rutaceae), jambu batu (psidium guajava, myrtaceae), sawo (chrysophyllum cainito, sapotaceae), jengkol (pithecolobium lobatum). Nu can kapanggih teh huru, kiputri, waru, peuteuy selong, singawalang, kimunding. Duka teuing pedah neanganana geus tunduh duka teuing teu taliti, bet can manggih. Cik sugan baraya aya tiasa masihan nami laten.
Hatur nuhun. MSas
