Dina Beus Geus padedet tetep we beus teh ngetem, teuing nungguan naon, sigana supirna keur ngising kored. Atuh hawa dijero beus teh jadi bau tujuh rupa, dalapan rupa ketah, da katambah ku bau aseup roko, aya nu melenyun udud bari aseupna kamana mendi, nu aya didinya meureun sarua sing gerentes kieu. "Sakitu hareudangna bet ngaroko, naon ngeunahna!". Keur padedet kitu anu ngamen kawas keur ngantri minyak, kelar hiji,jol deui lima, kabehanana sarua hayang dicecep ku duit recehan. Rengse nu ngamen, jle aya peremen na lahunan, leungit peremen jle aya benggol nu digagangan paragi ngerok, les benggol jle deui kurupux dorokdok, kurupuk dorokdok sirna, jle jeruk sadungkukan, jeruk ngiles, jle aya kotak amal, kotak amal ngiles, jle aya nu bahenol na lahunan bari ngaharewos "Bade bapaw kang, raos, haneut keneh!" dijawab bari engah engih da asa kahempikan gajah. "Moal!" nu bahenol ngomong deui "Kusabab moal, kapaksa abdi moal cengkat na lahunan akang!" Sanajan eungap kapaksa sapapanjang jalan ngalalahun tukang bapaw. Teu kungsi lila kalalar aya kondektur mentaan ongkos. "Sajalmi nya?" ceuk kondektur. "Enya sajalmi, piraku dietang dua, pan abdi mah dipangkon!" jawab tukang bapaw bari serengeh. Ih pikasebeleun!(sr)
