Hiji mangsa, si Ibro nu sok ngaheureuykeun Mama Ajengan, papanggih jeung Mama Ajengan di Kota, sarua keur papada balanja. Mama Ajengan teh kacida atohna papanggih jeung batur salembur, si Ibro diajak nyimpang heula ka restoran Sunda nu rada mahal.
Kedewek weh si Ibro teh dahar bareng jeung Mama Ajengan, manehna surti si Mama nu bakal mayar. Daharna sagala dicokot tepika beuteungna mendeyang bakating ku wareg. Sanggeus dibayar ku Mama Ajengan, Si Ibro ngomong bari ngusapan beuteungna: " Mama, punten pisan, moal nganuhunkeun ah, da saur Mama oge pan sadayana oge Kagungan Gusti!" Heuleut opat bulan, Si Ibro balik nyaba tinu jauh, manehna kadungsang-dungsang di kota, beakeun duit, beuteungna kukurubukan bakating ku lapar. Kabeneran pasanggrok deui jeung Mama Ajengan. Teu sirikna dirontok Mama Ajengan teh da ngarep-ngarep ditraktir dahar deui. Ibro :"Mama geuning didieu, hayu urang ka restoran itu deui, abdi parantos lapar pisan" Mama Ajengan:" Ke heula Ibro, Mama rek Menta ijin heula ka Gusti nu Kagungan, meunang henteu nraktir Ibro! Baktos, WALUYA
