Baraya, Behna mah aya pasanggiri (lomba) kadu di ieu dunya teh. Anu kuring apal, kamari saliwatan tina reportase salah sahiji statsiun TV, nyaeta kajuaraan atawa lomba kadu anu ngarupakeun acara maneuh taunan di Kabupaten Jepara, Jawa Tengah. Anapon kadu anu dikonteskeun teh nyaeta kadu varietas lokal. Embahna atawa asal-usul ieu varietas lokal taya lian, si petruk (kadu jenis petruk anu sohor kacida, asalna ti Jawa Tengah). Ieu lalakon kadu di provinsi tatangga teh ngahaja diguar di dieu pikeun gambaran kamajuan tatangga dina miara warisan kaanekaragaman hayati, khususna bubuahan khas urang, leuwih khusus deui: kadu.
Pamarentahan jeung masyarakat kabupaten Jepara kawilang kreatif dina urusan buah-buahan lokal, utamana kadu. Pamarehtah ieu kabupaten unggal taun ngayakeun pasanggiri kadu. Anu dilombakeun, lian ti rasa jeung bentuk kadu, oge ngawengku daya tahan kadu (urang geus pada apal yen umumna kadu asak henteu kuat lila, leuwih ti sapoe oge anu geus asak pisan mah sok bencar kadu teh bari ngaluarkeun bau anu meleber kaditu kadieu, matak uruy anu resep kana kadu). Sakabeh kadu anu dilombakeun eta kudu kadu varietas lokal, hartina, teu kaci kadu kawinan; samodel kadu Bangkok atawa hasil rekayasa genetik eta teu meunang miluan lomba. Memangm di Jepara meh kabeh tangkal kadu umumna kadu varietas lokal. Tina siaran TV anu kamari, jawara lomba kadu taun ayeuna teh nyaeta kadu Sukayar. Ieu kadu diaranan kadu Sukayar pedah anu bogana mas Sukayar, salah saurang warga Jepara. Kadu Sukayar ngarupakeun varietas lokal turunan ti varietas kadu Petruk. Dina tayangan TV kamari dipintonkeun tangkal kadu bogana mas Sukayar, gede kacida tangkalna ngarampidak, nepi ka naekanana oge kudu make taraje. Umur eta tangkal kadu geus puluhan taun, warisan ti indung bapana. Kadu Sukayar mere kauntungan teu kurang ti 5 juta satangkalna dina sataunna. Anu sejenna, anu kungsi jadi jawara dua taun patutur-tutur samemehna nyaeta Kadu Sutriman, warisan ti bapana, Sutardi. Kadu Sutriman boga kaistimewaan lian ti kulitna hejo, buahna koneng ngagelempeng, jeung pohara amisna, nyaeta tahan lila. Kadu Sutriman kuateun dibawa nyaba nepi ka Aceh oge Singapur bari jeung teu bencar atawa beulah alatan asak teuing. Pantes wae ieu kadu kungsi ngalaman jadi jawara dina lomba kadu di Jepara. Ceuk pa Sutriman kaduna bisa mere kauntungan nepi ka 7 juta dina sataunna tina satangkal (bisa dibayangkeun gedena eta tangkal kadu). Jepara kawilang serius dina mekarkeun jeung usaha budidaya kadu. Di ieu kabupaten, numutkeun katerangan pemarentah satempat kamari dina TV, aya teu kurang ti 26.000 tangkal kadu, kabeh varietas lokal. Tina jumlah sakitu tangkal teh kabupaten Jepara ngahasilkeun teu kurang ti 4.500 ton kadu dina sataunna. Kabupaten Japara giat pisan dina miara varietas-varietas kadu lokal, boh ngaliwatan kebon percontohan Pamarentah-na oge masyarakatna. Ayana pasanggiri kadu tiap taun ngarupakeun pangrojong Pamarentah Jepara ka masyarakatna sangkan ngajaga varietas-varietas kadu lokal di wewengkonna. Ka baraya sadaya anu pareng nganjang ka daerah Jepara dina usum kadu, jeung maksud seja ngasaan kadu-kadu pedo varietas lokal, mangga, pilarian wae warung kadu Ibu Kipah. Kamari dina TV ku matak kabita anu keur marurak kadu di eta warung kadu. Kadu kulit hejo, teu pati badag, ana dibuka tembong daging buah kadu koneng ngagelemeng, pasti amis pisan da anu nuju nuangna oge teu sirikna burial buncelik bakat ku nikmat. Cag heula, manar
