Baraya,Neraskeun lalakon usaha ngurangan risiko bencana di Jawa Barat, ieu forum seja ngawartakeun usaha-usaha anu dimaksud. Tangtu, leuwih loba warta anu henteu kamonitor ku si kuring anu bisa dipernahkeun dina raraga ngurangan risiko bencana, boh bencana longsor, banjir, gempabumi jeung tsunami, atawa bencana sejenna. Mangga, ka para wargi sadaya anu mibanda warta ngeunaan usaha-usaha anu dimaksud, bewarakeun wae di ieu milist, mugi ulah asa-asa atawa ulah "heurin ku letah". Ngabewarakeun na mah boh nyieun posting anyar atawa mairan kana posting-posting anu nyampak.Salah sahiji usaha anu dimaksud anu poe ieu dilakukeun ku masyarakat Sumedang nyaeta ngahejokeun lahan gundul atawa lahan kritis di Desa Cibeureum Wetan, Kacamatan Cimalaka, Kabupaten Sumedang. Bieu kang Wawan ti pakumpulan masyarakat Cibeureum ngawartosan yen karek pisan dipelak di pasir-pasir kritis di Cibeureum Wetan tatangkalan, ampir 1.500 tangkal. Pereleanana kieu: Mahoni, 500 tangkal, Tisuk 450 tangkal, Mices 200 tangkal, Surian 50 tangkal jeung bubuahan kayaning Alpuket, Buah (Mangga), Muncang, Tangkil (Melinjo) total 300 tangkal.
Anu matak pikabungaheun di Cibeureum Wetan ieu eta kagiatan dilakukeun kalayan spontanitas masyarakat di dinya. Aya kl 300 urang anu ancrub dina eta program spontan pikeun ngahejokeun leuweung. Mudah-mudahan ku cara kitu masyarakat Cibeureum khususna, kumna sadayana, dina waktuna usum halodo teu kakurangan cai, dina datangna usum hujan teu kabanjiran. Ieu usaha ceuk anu ti sakolaan mah kaasup kana usaha-usaha adaptasi kana ancaman bahaya anu bisa ngabalukarkeun bencana. Ieu roadmap atawa jalan panjang dina raraga usaha ngurangan risiko bencana di Jawa Barat Insya Alloh baris ditumbu ku kagiatan pendidikan kebencanaan pikeun para guru anu dimotoran ku jurusan geografi UPI, Insya Alloh baris dilaksanakeun dina minggu ka-2 bulan Mei 2010. Mudah-mudahan pareng. Cag heula. baktosna manar
