Sateu acan mungkas ieu postingan perkawis Pangeran Kornel, bilih bae aya wargi ieu milis kagungan sajarah anu patulang-tonggong sareng postingan sim abdi, mangga dihaturana, kanggo ngalereskeun atanapi mairan.
Dina postingan anu kalangkung, disebat yen Raden Abas nikah ka Nyi Raden Purnama putra Aria Jayanagara. Waktos harita Aria Jayanagara mangku kalungguhan Patih di Limbangan, ari Raden Abas mangku kalungguhan janten Wadana di Pasanggrahan (kirang langkung taun 1830/1831) nganggo gelar Raden Wiranagara, anapon anu mangku kalungguhan janten Bupati Limbangan waktos harita nya eta Adipati Adiwijaya. Saparantos pupus Adipati Adiwijaya, anu ngagentosna janten Bupati Limbangan teh nyaeta Aria Jayanagara (putra Adipati Adiwijaya oge mertua Raden Abas). Aria Jayanagara saparantos janten Bupati Limbangan nganggo gelar Tumenggung Kusumah Ningrat, waktos harita Raden Abas/Raden Wiranagara diangkat janten Patih di Limbangan, nganggo gelar Demang Wiranagara. Dina taun 1833 Bupati Sumedang, Adipati Kusumah Yuda pupus, Bupati Limbangan Tumenggung Kusumah Ningrat dibenum janten Bupati Sumedang, nganggo gelar Adipati Kusumah Dinata ( disebat oge Dalem Alit, taun 1833 ~ 1834). Patih Limbangan Raden Abas/Demang Wiranagara ngagentos mertua Bupati Tumenggung Kusumah Ningrat, janten Bupati Limbangan, nganggo gelar Tumenggung Jayaningrat. Lami-lami puseur kota Limbangan narikkolot, karamean ngised ka kota Garut kuayana hiji afdeling enggal. Garut janten puseur kota, nya kitu deui kabupatian ngalih ka kota Garut tug dugi ka kiwari. Raden Abas/Demang Wiranagara/Tumenggung Jayaningrat gentos sesebatan tina Bupati Lambangan janten Bupati Garut, saparantos janten Bupati Garut nganggo gelar Adipati Suria Kusumah, anjeuna henteu nganggo gelar Adipati Wira Tanu Datar VII. Saparantos Raden Abas/Demang Wiranagara/Tumenggung Jayaningrat/Adipati Suria Kusumah pupus, kalungguhan bupati Garut digentos ku Raden Jenon, putra cikal Raden Abas, Raden Jenon ieu saparantos janten Bupati Garut nganggo gelar Wira Tanu Datar VIII nyepeng kalungguhan janten bupati Garut taun 1872 ~ 1916. Sakitu anu tiasa kapidangkeun sajarah Pangeran Kornel sareng asal muasalna turunan Dalem Cikundul janten Bupati di Garut. Kenging nyutat tina buku "Sajarah Cianjur sareng Raden Aria Wira Tanu Datar Dalem Cikundul", kalayan sakedik dirobah susunan kalimatna supados gampil diaosna. Kirang langkungna neda ageung nya tawakup jembar pangapuntena, leres henteuna wallahu alam, mung Anu Maha Uninga anu uningaeun kana jalur sajarah. Mung bae upami eta seratan sajarah leres, nyaaa...panginten parantos kitu seratan ti Azalina. Pihatur, ssw http://cikundul3.multiply.com Tong nyaliksik naon nu bisa dicokot ti kiSunda Tapi talungtik naon nu bisa dibikeun ka kiSunda
