អសន្តិសុខជាបញ្ហាប្រឈមធ្ងន់ធ្ងរសម្រាប់សង្គមខ្មែរ rfi ©សុវណ្ណារ៉ា ដោយ ប៉ែន បូណា
អំពើប្លន់ប្រដាប់អាវុធ ឃាតកម្ម អំពើហិង្សា និងគ្រោះថ្នាក់ចរាចរណ៍ គឺជាបញ្ហាធំៗដែលកំពុងធ្វើឲ្យសង្គមខ្មែរប្រឈមនឹងបញ្ហា អសន្តិសុខយ៉ាងធ្ងន់ធ្ងរ នាពេលបច្ចុប្បន្ន។ ពលរដ្ឋខ្មែរជាច្រើននាក់ បានបាត់បង់ជីវិត ជារៀងរាល់ថ្ងៃ ក្នុងថ្លុកឈាម និងទឹកភ្នែកដោយសារ តែបញ្ហាទាំងនេះ។ សមត្ថកិច្ចកំពុងចាត់វិធានការយ៉ាងក្តៅគគុក ដើម្បី រក្សាសណ្តាប់ធ្នាប់សង្គម ប៉ុន្តែស្ថានភាពហាក់មិនបានធូរស្រាលឡើយ។ មនុស្សជាច្រើន បានស្តីបន្ទោសទៅលើការធ្លាក់ចុះនៃសីលធម៌សង្គម និងអសមត្ថភាពរបស់អាជ្ញាធរក្នុងការរក្សាសន្តិសុខជូនប្រជាពលរដ្ឋ។ ជន អន្ធពាលមួយក្រុមដែលប្រដាប់ដោយអាវុធខ្លី ខ្នោះដៃ និងដំបង ឆក់ បានប្លន់រថយន្តស៊េរីទំនើបមួយគ្រឿងនៅកណ្តាលរាជធានីភ្នំពេញ កាលពីព្រលប់ថ្ងៃទី៣ខែកញ្ញា។ ជនរងគ្រោះដែលជានិស្សិតស្រីអាយុ ១៩ឆ្នាំត្រូវបានក្រុមចោរចាប់ ដាក់ខ្នោះដៃ និងខ្នោះជើងរួចដឹក យកទៅទម្លាក់ចោលនៅឯជាយក្រុងដោយប្លន់យក រថយន្ត និងគ្រឿង អលង្ការអស់គ្មានសល់។ នេះគឺជាព្រឹត្តិការណ៍ដែលធ្វើឲ្យរញ្ជួយរាជធានីភ្នំពេញម្តងទៀត សម្រាប់ចុងសប្តាហ៍នេះ។ តែវាមិនមែនជារឿងថ្មី និងអស្ចារ្យជាងគេ ឡើយ បើប្រៀបធៀបទៅនឹងរឿងរ៉ាវអសន្តិសុខដែលកើតឡើងជារៀងរាល់ថ្ងៃ។ នៅមានរឿងរ៉ាវដ៏គួរឲ្យរន្ធត់ និងអមនុស្សធម៌ជាច្រើនទៀតដែលកំពុង អង្រួនសង្គមខ្មែរឲ្យធ្លាក់ក្នុង អសន្តិសុខគួរឲ្យព្រួយបារម្ភ។ អំពើប្លន់ ឃាតកម្ម រំលោភ និងអំពើហិង្សាក្នុងគ្រួសារបានក្លាយជា ព្រឹត្តិការណ៍លើទំព័រមុខ របស់សារព័ត៌មានជារៀងរាល់ថ្ងៃ។ នៅមិនទាន់មានតួលេខណាមួយដែលបង្ហាញពីចំនួនអ្នកស្លាប់ប៉ុន្មាន នាក់ ក្នុងមួយថ្ងៃដោយសារអំពីអសន្តិសុខទាំងនោះនៅឡើយទេ។ ប៉ុន្តែ បើនិយាយពីគ្រោះថ្នាក់ចរាចរណ៍វិញ ការសិក្សាបង្ហាញថា មានពលរដ្ឋ ខ្មែរយ៉ាងហោចណាស់ក៏៤នាក់ដែរ ដែលបានស្លាប់ជារៀងរាល់ថ្ងៃ។ នេះ នៅមិនទាន់គិតអ្នករងរបួស និងការខូចខាតទ្រព្យសម្បត្តិដ៏ច្រើនសន្ធឹក សន្ធាប់នោះផងទេ។ ដើម្បីកាត់បន្ថយអ្នកស្លាប់នៅលើដងផ្លូវ សមត្ថកិច្ចគ្រោងនឹងដាក់ ឧបករណ៍ត្រួតពិនិត្យជាតិស្រវឹងចំពោះ អ្នកបើកបរចាប់ពីថ្ងៃទី១ខែ តុលាខាងមុខតទៅ។ ជនណាដែលបើកបរក្នុងស្ថានភាពស្រវឹងនឹងត្រូវគេ ផាកពិន័យយ៉ាង ធ្ងន់ធ្ងរ។ នេះជាវិធានការបន្ថែមថ្មីទៀតទៅលើ ការបង្ខំឲ្យអ្នកបើកបរពាក់មួក សុវត្ថិភាព និងពាក់ខ្សែក្រវាត់ ការពារដែលកំពុងតែអនុវត្ត។ ប្រទេសកម្ពុជាកំពុងស្ថិតនៅក្នុងស្ថានភាពសន្តិភាពបន្ទាប់ពីភ្លើង សង្គ្រាមបានរលត់ទៅ។ ប៉ុន្តែ ជនកម្ពុជានៅមិនទាន់ស្គាល់សន្តិភាព ផ្លូវចិត្តពិតប្រាកដនៅឡើយទេ។ កាលពីពេលថ្មីៗនេះ គណបក្សប្រជាជន កម្ពុជាដែលកំពុងកាន់អំណាចបានចាត់ទុកបញ្ហាអសន្តិសុខ ថា ជាបញ្ហា ចម្បងមួយដែលខ្លួនត្រូវដោះស្រាយ។ ប៉ុន្តែ គេនៅមិនទាន់ឃើញមាន លទ្ធផលជាក់ស្តែងនៅឡើយទេ។ គេមិនទាន់ដឹងថា តើគណបក្សកាន់អំណាចដ៏មានឥទ្ធិពលមួយនេះអាចយក ឈ្នះលើបញ្ហា អសន្តិសុខសង្គម ដើម្បីឲ្យពលរដ្ឋខ្មែររស់ក្នុងសុខ សន្តិភាពទាំងផ្លូវកាយ និងផ្លូវចិត្តបានដែរឬ យ៉ាងណានោះទេ៕ -- You received this message because you are subscribed to the Google Groups "Cambodia Discussion (CAMDISC) - www.cambodia.org" group. This is an unmoderated forum. Please refrain from using foul language. Thank you for your understanding. Peace among us and in Cambodia. To post to this group, send email to [email protected] To unsubscribe from this group, send email to [email protected] For more options, visit this group at http://groups.google.com/group/camdisc Learn more - http://www.cambodia.org
