ព្រះសង្ឃខ្មែរទទួលពានរង្វាន់អង្គការ UNDPផ្នែកការពារព្រៃឈើ rfi © លាង ដឺលុច ដោយ លាង ដឺលុច
ព្រះតេជព្រះគុណប៊ុន សាលួតត្រូវបានកម្មវិធីអភិវឌ្ឍរបស់អង្គការ សហប្រជាជាតិ UNDPជ្រើសរើសអោយជាប់ចំណាត់ថ្នាក់ជាអ្នកថែរក្សាព្រៃឈើ ជាមួយជ័យលាភី ២៤រូបផ្សេងទៀតមកពីជុំវិញពិភពលោក។ ព្រះតេជព្រះគុណ ប៊ុន សាលួតដែលជាអ្នកគ្រប់គ្រងសហគមន៍ព្រៃឈើសង្ឃរុក្ខវ័ន្តក្នុង ខេត្ត ឧត្តរមានជ័យនឹងនិមន្តចាកចេញទៅទីក្រុងញូយ៉កដើម្បីទទួល ពានរង្វាន់ ដែលមានឈ្មោះថា គំនិតផ្តួចផ្តើមអេក្វាទ័រ។ ព្រះសង្ឃ ព្រះនាមប៊ុន សាលួតនឹងនិមន្តចាកចេញទៅទីក្រុងញូយ៉ក សហរដ្ឋអាមេរិកនៅដើមសប្តាហ៍ ក្រោយនេះ តាមការអញ្ជើញរបស់គណៈកម្មការ រៀបចំកម្មវិធីពានរង្វាន់គំនិត ផ្តួចផ្តើមអេក្វាទ័រ។ ព្រះតេជព្រះគុណ ប៊ុន សាលួតដែលបានដឹកនាំការពារព្រៃឈើ និងអភិរក្សសត្វព្រៃតាំងពី ឆ្នាំ ២០០១មក ត្រូវបានអង្គការ UNDPប្រចាំសហរដ្ឋអាមេរិកជ្រើសរើសអោយ ជាប់ជាជ័យលាភីនៃអ្នកការពារ ព្រៃឈើនិងជីវៈចម្រុះ។ តំបន់ការពារ ព្រៃឈើ និងអភិរក្សសត្វព្រៃដែលក្រោយមកបានប្រែក្លាយទៅជាសហគមន៍ សង្ឃ រុក្ខវ័ន្តមានទំហំ ១៨២៦១ហិចតាគ្របដណ្តប់លើស្រុកសំរោង និង ស្រុកអន្លង់វែងខេត្តឧត្តរមានជ័យ។ ព្រះតេជព្រះគុណប៊ុន សាលួតព្រះជន្ម ៣៩វស្សាបានមានសង្ឃដីកាថា ព្រះអង្គរំភើប និងសប្បាយចិត្តចំពោះការទទួលស្គាល់ស្នាដៃការងាររបស់ សហគមន៍របស់ ព្រះតេជព្រះគុណក្នុងក្របខណ្ឌអន្តរជាតិយ៉ាងដូច្នេះ។ ហើយ នេះក៏ជាមោទនភាពមួយរបស់កម្ពុជានៅលើឆាកអន្តរជាតិផងដែរ។ ព្រះតេជព្រះគុណបានពន្យល់ថា សហគមន៍ព្រៃឈើមានប្រយោជន៍ខ្លាំង សម្រាប់ជីវភាពរស់នៅរបស់ប្រជាពលរដ្ឋ ក្នុងសហគមន៍ដែលមាន ៣៥០០ គ្រួសារ ដែលរស់នៅរំពឹងលើអនុផលព្រៃឈើ។ ម្យ៉ាងទៀតសហគមន៍ព្រៃឈើនេះ នឹងផ្តល់ជាប្រយោជន៍ថ្នាក់ជាតិ ពាក់ព័ន្ធនឹងការទូទាត់ឥណទានកាបូន ផងដែរ។ លោកឡុង រតនៈកុមារអនុប្រធាននាយកដ្ឋានព្រៃឈើ និងព្រៃសហគមន៍នៃ រដ្ឋបាលព្រៃឈើបានថ្លែងអបអរចំពោះជ័យលាភីរបស់ ព្រះតេជព្រះគុណប៊ុន សាលួត។ លោករតនៈកុមារអត្ថាធិប្បាយថា ពានរង្វាន់នេះមិនត្រឹមតែជាការ លើកទឹកចិត្តដល់សហគមន៍មូលដ្ឋានអោយ បន្តការងារថែរក្សាព្រៃឈើតែមួយ នោះទេ។ តែវាក៏ជាការលើកទឹកចិត្តដល់រដ្ឋាភិបាលក្នុងការគិតគូរ និងផ្តល់ការគាំទ្រដល់សហគមន៍ព្រៃឈើនានានៅកម្ពុជា។ យោងតាមការ អះអាងរបស់មន្ត្រីរដ្ឋបាលព្រៃឈើដដែល សហគមន៍សង្ឃរុក្ខវ័ន្តជា សហគមន៍ដែលមានទំហំធំជាងគេក្នុងចំណោម សហគមន៍ព្រៃឈើទាំង ១២ដែល រដ្ឋាភិបាលបានចេញប្រកាសទទួលស្គាល់ ហើយបានប្រគល់ការគ្រប់គ្រងទៅ អ្នកដឹកនាំសហគមន៍មូលដ្ឋាន៕ -- You received this message because you are subscribed to the Google Groups "Cambodia Discussion (CAMDISC) - www.cambodia.org" group. This is an unmoderated forum. Please refrain from using foul language. Thank you for your understanding. Peace among us and in Cambodia. To post to this group, send email to [email protected] To unsubscribe from this group, send email to [email protected] For more options, visit this group at http://groups.google.com/group/camdisc Learn more - http://www.cambodia.org
