កម្មកររាប់ពាន់នាក់ធ្វើកូដកម្មព្រមៗគ្នានៅតាមរោងចក្រ ដោយ សេក បណ្ឌិត 2010-09-13
គម្រោងធ្វើកូដកម្មមិនចូលធ្វើការរបស់កម្មករ បន្ទាប់ពីការទាមទារ ដំឡើងប្រាក់ខែ ដែលចំណាយពេលអស់ជាច្រើនខែមិនបានជោគជ័យ បានផ្ទុះ ឡើងហើយនៅថ្ងៃ១៣ កញ្ញា ដោយមានកម្មកររាប់ពាន់នាក់ចូលរួមនៅមុខ រោងចក្រពួកគេធ្វើការ រៀងៗខ្លួន។ AFP Photo ១៣-កញ្ញា-២០១០: ប្រធានសម្ព័ន្ធសហជីពប្រជាធិបតេយ្យកម្មករកាត់ដេរ កម្ពុជា (C.CAWDU) លោក អាត់ ធន់ (ស្ដាំ) ថ្លែងទៅកាន់កម្មករ ក្នុង អំឡុងពេលធ្វើកូដកម្មនៅខាងក្រៅរោងចក្រមួយ ក្នុងរាជធានីភ្នំពេញ។ ការផ្ទុះឡើងនូវកូដកម្មព្រមៗគ្នានេះ គេមិនទាន់ឃើញមាន ប្រតិកម្មយ៉ាងណានៅឡើយពីរដ្ឋាភិបាល។ អ្នកគ្រប់គ្រងរោងចក្រមួយ ចំនួន បានសម្ដែងការព្រួយបារម្ភចំពោះផលប៉ះពាល់ការងារផលិត ជា ពិសេសអាចខ្វះទំនិញនាំចេញ ដែលអាចមិនគ្រប់គ្រាន់តាមតម្រូវការ អ្នកបញ្ជាទិញ។ កូដកម្មអហិង្សារបស់កម្មកររោងចក្រកាត់ដេរប្រមាណ ៤០កន្លែង ដែលមាន កម្មករចូលរួមប្រហែល ៦ម៉ឺននាក់ បានផ្ទុះឡើងព្រមៗគ្នាស្ទើរគ្រប់ ទីកន្លែង ទាំងនៅក្នុងក្រុង និងនៅជាយទីក្រុងភ្នំពេញ ខេត្តកណ្ដាល និងកំពង់ស្ពឺ នៅថ្ងៃ១៣ កញ្ញានេះ ដោយទាមទារឲ្យថៅកែដំឡើងប្រាក់ ខែ។ តំណាងកម្មករនៅរោងចក្រ សាង វ៉ូ (SANG VO) ស្ថិតនៅឃុំត្រពាំងគង ស្រុក សំរោងទង ខេត្តកំពង់ស្ពឺ លោក គីម អ៊ីម បានឲ្យវិទ្យុអាស៊ីសេរីដឹងនៅ ខាងក្រៅរោងចក្រ ពេលដែលកំពុងធ្វើការតវ៉ា បានឲ្យដឹងថា កម្មករ ដែលចូលរួមតវ៉ានេះមានប្រហែល ៧០០នាក់ ទៅ ៨០០នាក់ ក្នុងចំណោមកម្មករ នៅក្នុងរោងចក្រទាំងមូលមានជាង ៣.០០០នាក់។ តំណាងកម្មកររូបនេះបានឲ្យដឹងដែរថា ក្នុងការតវ៉ានេះក៏មានការ រំខានពីសមត្ថកិច្ចប៉ូលិសខ្លះដែរ ដូចជាមិនឲ្យស្រែកតវ៉ាតាម មេក្រូ ហើយគំរាមដកហូតយកមេក្រូ និងចាប់ខ្លួនជាដើម។ នៅឯរោងចក្រ ជូ សិង ស្ថិតនៅសង្កាត់ព្រែកលាប ខណ្ឌឫស្សីកែវ រាជធានី ភ្នំពេញ ក៏មានធ្វើកូដកម្មដូចគ្នាដែរ។ អនុប្រធានសហជីព ធម្មាធិបតេយ្យ កញ្ញា អៀម ចាន់បូនី បានឲ្យដឹងថា កម្មកររោងចក្រនៅទី នោះមានជាង ១.៥០០នាក់ ក្នុងចំណោមកម្មករក្នុងរោងចក្រសរុបប្រហែល ៣.០០០នាក់។ នាងបានឲ្យដឹងទៀតថា តំណាងថៅកែរោងចក្របានចាក់សោបង្ខាំងកម្មករ មួយចំនួនមិនឲ្យចេញមក ចូលរួមធ្វើកូដកម្មនៅខាងក្រៅឡើយ។ ឆ្លើយតបនឹងការចោទប្រកាន់នេះ ប្រធានផ្នែកគ្រប់គ្រងធនធានមនុស្ស នៅរោងចក្រ ជូ សិង នាង ទិត្យ ម៉ី បានបដិសេធថា មិនមានការហាមឃាត់ កម្មករមិនឲ្យចេញធ្វើកូដកម្មនោះឡើយ។ ការធ្វើកូដកម្មរបស់កម្មករនៅពេលនេះ គឺមានគោលបំណងដូចគ្នាទៅ នឹងការទាមទាររបស់មេដឹកនាំសម្ព័ន្ធសហជីព ប្រជាធិបតេយ្យកម្មករ កាត់ដេរកម្ពុជា (C.CAWDU) របស់លោក អាត់ ធន់ ដែលបានទាមទារមិនបាន ជោគជ័យកន្លងមក នូវលក្ខខណ្ឌ ៤ចំណុចពីសមាគមរោងចក្រកាត់ដេរ គឺទី១ ដំឡើងប្រាក់ខែគោលអប្បបរមាពី ៧៥ដុល្លារ ទៅ ៩៣ដុល្លារ ,ទី២ ប្រាក់ ថ្លៃអាហារពេលថែមម៉ោង, ទី៣ ប្រាក់ឧបត្ថម្ភសម្រាប់សុខភាព និងទី៤ សុំឲ្យមានការពិនិត្យឡើងវិញរៀងរាល់មួយឆ្នាំម្ដង។ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (C.CAWDU) លោក អាត់ ធន់ បានឲ្យវិទ្យុអាស៊ីសេរីដឹងថា ការធ្វើកូដកម្មថ្ងៃ នេះបានធ្វើឡើងតាមការគ្រោងទុក បន្ទាប់ពីការចរចាជាច្រើនលើក ជាមួយសមាគមកាត់ដេរ និងក្រសួងការងារ មិនមានលទ្ធផល។ លោកបន្តថា មកដល់ត្រឹមម៉ោង ១រសៀលថ្ងៃទី១៣ កញ្ញា ដែលជាថ្ងៃ ដំបូងនៃការធ្វើកូដកម្មនេះ សមត្ថកិច្ចបានចាប់ឃាត់ខ្លួនកម្មករ មួយចំនួននៅកន្លែងផ្សេងៗគ្នា ដើម្បីធ្វើការសាកសួរ ហើយលោកកំពុង ធ្វើការសម្របសម្រួលឲ្យដោះលែងមកវិញ។ លោក អាត់ ធន់ បន្តថា ការធ្វើ កូដកម្មនេះពុំមានពេលកំណត់ទេ លុះត្រាតែមានការឆ្លើយតបតាមការ ទាមទាររបស់កម្មករកន្លងមក។ ប្រធានផ្នែកគ្រប់គ្រងធនធានមនុស្សនៅរោងចក្រ ជូ សិង នាង ទិត្យ ម៉ី បានសម្ដែងការបារម្ភថា បើកូដកម្មនេះអូសបន្លាយយូរទៅមុខទៀតនោះ នឹងប៉ះពាល់ដល់ដំណើរការផលិតនាំចេញមិនគ្រប់គ្រាន់តាមការគ្រោង ទុក ឡើយ ហើយចាំបាច់ត្រូវមានការដោះស្រាយជាបន្ទាន់។ មន្រ្តីជាន់ខ្ពស់ទទួលបន្ទុកសម្របសម្រួលដោះស្រាយវិវាទការងារ នៃ សមាគមរោងចក្រកាត់ដេរនៅកម្ពុជា លោក ជាតិ ខេមរា បានមានប្រសាសន៍ថា ការធ្វើកូដកម្មនេះមិនធ្វើឲ្យប៉ះពាល់ដល់ដំណើរការផលិតរបស់ រោងចក្រ ទេ ព្រោះការធ្វើកូដកម្មនេះតាមលោកអង្កេតមើល មានតែ ២១ កន្លែងទេ នៅថ្ងៃទី១នេះ ហើយលោកកំពុងធ្វើការអង្កេតបន្តទៀត ចំពោះសភាពការណ៍នេះ។ លោកបន្តថា ដំណោះស្រាយពុំមានអ្វីក្រៅពីការអនុវត្តតាមសេចក្ដី សម្រេចរបស់ ក្រុមប្រឹក្សាអាជ្ញាកណ្តាល ដែលកម្មករភាគច្រើនបាន ព្រមព្រៀងគ្នារួចហើយ ហើយសមាគមនៅតែរក្សាជំហរនេះដដែល។ នៅថ្ងៃច័ន្ទ ទី១៣ កញ្ញានេះ ពុំមានសេចក្ដីរាយការណ៍ថា មានកម្លាំង សមត្ថកិច្ចបង្ក្រាបកម្មករធ្វើកូដកម្មក្នុងលក្ខណៈ ទ្រង់ទ្រាយធំ នោះឡើយ។ កាលពីថ្ងៃទី៨ ខែកក្កដា ឆ្នាំ២០១០ ក្រុមប្រឹក្សាការងារបាន សម្រេចដំឡើងប្រាក់ខែគោលអប្បបរមារបស់ កម្មករ ដែលមានស្រាប់ពី ៥០ ដុល្លារ ទៅ ៦១ដុល្លារក្នុងមួយខែ ដោយចាប់អនុវត្តពីថ្ងៃទី១ ខែ តុលា ឆ្នាំ២០១០ រហូតដល់ឆ្នាំ២០១៤។ ប៉ុន្តែការដំឡើងនេះ សហជីព កម្មករមិនទទួលយកទេ ហើយទាមទារឲ្យថៅកែរោងចក្រកាត់ដេរ និងស្បែក ជើងនៅកម្ពុជា ដំឡើងប្រាក់ខែរបស់កម្មករឲ្យបានចំនួនចន្លោះពី ៧៥ ទៅដល់ ៩៣ដុល្លារក្នុងមួយខែ និងប្រាក់ឧបត្ថម្ភមួយចំនួនទៀត៕ -- You received this message because you are subscribed to the Google Groups "Cambodia Discussion (CAMDISC) - www.cambodia.org" group. This is an unmoderated forum. Please refrain from using foul language. Thank you for your understanding. Peace among us and in Cambodia. To post to this group, send email to [email protected] To unsubscribe from this group, send email to [email protected] For more options, visit this group at http://groups.google.com/group/camdisc Learn more - http://www.cambodia.org
