មន្ត្រីជាន់ខ្ពស់រដ្ឋាភិបាល ហៅរបាយការណ៍ ស្តីពី កម្ពុជាត្រូវបាន បំបិទមាត់ ថាបានបំរើឱ្យនយោបាយបក្សប្រឆាំង cem.com.kh ភ្នំពេញ: មជ្ឈមណ្ឌលសិទ្ធិមនុស្សកម្ពុជា នៅថ្ងៃទី១៤ ខែកញ្ញា ឆ្នាំ ២០១០ បានធ្វើការផ្សព្វផ្សាយនូវរបាយការណ៍ ស្តីពី សេរីភាពខាងបញ្ចោញ មតិ នៅកម្ពុជា ដែលមានចំណងជើងថា កម្ពុជាត្រូវបានបំបិទមាត់៖ លទ្ធិប្រជាធិបតេយ្យស្ថិតក្នុងគ្រោះថ្នាក់?។ ក៏ប៉ុន្តែត្រូវបាន មន្ត្រីជាន់ខ្ពស់រដ្ឋាភិបាល ចាត់ទុកថា ជា របាយការណ៍ ដែលមានលក្ខណៈគាំទ្រ និងបំរើនយោបាយឱ្យបក្សប្រឆាំង ពីព្រោះរបាយការណ៍នោះ មិនបង្ហាញនូវការពិត ក្នុងប្រទេសកម្ពុជាទេ។
ក្នុងសន្និសីទកាសែត នៅព្រឹកមិញ លោក អ៊ូ វីរៈ នាយកមជ្ឈមណ្ឌល សិទ្ធិមនុស្សកម្ពុជា បានមានប្រសាសន៍ថា របាយការណ៍នេះ មិនមែនជា របាយការណ៍រិះគន់រាជរដ្ឋាភិបាលទេ គឺគ្រាន់តែរំលឹកថា លទ្ធិប្រជាធិបតេយ្យនៅកម្ពុជា កំពុងតែប្រឈមនឹងគ្រោះថ្នាក់ បើសិន ស្ថានភាពនៅដូចសព្វថ្ងៃនេះ កម្ពុជាអាចឈានទៅរកការគ្រប់គ្រងប្រទេស តែគណបក្សតែមួយ ទោះបីជាមានការបោះឆ្នោតជារៀងរាល់អាណត្តិយ៉ាង ទៀងទាត់ក៏ដោយ។ លោក អ៊ូ វីរៈ បានបន្តថា អ្នកតំណាងរាស្ត្រនៃគណបក្សប្រឆាំង ពុំ អាចបំពេញតាមតួនាទីរបស់ខ្លួន ឱ្យបានពេញលេញទេ ព្រមទាំងសកម្មជន សិទ្ធិមនុស្សមួយចំនួន ត្រូវប្រឈមការគំរាមកំហែង និងរឹតត្បិតសេរីភាព បញ្ចេញមតិ។ ដោយឡែកលោកស្រី ពុង ឈីវកេក នាយិការអង្គការសិទ្ធិមនុស្ស លីកាដូ បានជម្រុញឱ្យរដ្ឋាភិបាល ដែលកើតចេញពីការបោះឆ្នោត ត្រូវតែគោរពតាម ច្បាប់រដ្ឋធម្មនុញ្ញ និងកិច្ចព្រមព្រៀងទីក្រុងប៉ារីស ដូចជា គោរព លទ្ធិប្រជាធិតេយ្យ សិទ្ធិមនុស្ស សិទ្ធិនយោបាយ និងសេរីភាពបញ្ចោញមតិ ៘ យ៉ាងណាក៏ដោយ មន្ត្រីជាន់ខ្ពស់រាជរដ្ឋាភិបាល លោក ទិត សុធា និងជា អ្នកនាំពាក្យអង្គភាពព័ត៌មាន និងប្រតិកម្មរហ័ស របស់ ទីស្តីការគណៈរដ្ឋមន្ត្រី បានលើកឡើងថា របាយការណ៍ ដែលចេញផ្សាយនៅថ្ងៃនេះ បាន និងកំពុងតែនិយាយបំផ្លើសពីរាជរដ្ឋាភិបាលកម្ពុជា ក្នុងពេលដែល មជ្ឈមណ្ឌលសិទ្ធិមនុស្សកម្ពុជា កំពុងតែធ្វើសកម្មភាពរបស់ខ្លួន បំរើ ឱ្យនយោបាយគណបក្សប្រឆាំង បានដោយសេរី។ លោក ទិត សុធា ក៏បានលើកឡើងថា របាយការណ៍នោះ គ្មានមូលដ្ឋានពិត និងត្រូវបានចងក្រង ដោយក្រុមអង្គការក្រៅរដ្ឋាភិបាល ដែលមាននិន្នាការ ប្រឆាំងរាជរដ្ឋាភិបាល ដោយពុំបានឆ្លុះបញ្ចំងពីការពិតជាក់ស្តែងនៅ កម្ពុជាឡើយ ពីព្រោះបច្ទុប្បន្ននេះ រដ្ឋាភិបាលបានបើកទូលាយនូវសើភាព បញ្ចេញមតិ ការគោរពច្បាប់ និងគោរពសិទ្ធិមនុស្ស ស្របតាម លទ្ឋិប្រជាធិបតេយ្យ។ លោក ទិត សុធា បានស្តីបន្ទោសថា មជ្ឈមណ្ឌលសិទ្ធិមនុស្សកម្ពុជា គឺគ្រាន់តែទទួលរបាយការណ៍មួយជ្រុង ពីបណ្តាអង្គការក្រៅរដ្ឋាភិបាល ដែលគាំទ្រគណបក្សប្រឆាំង និងសរសេរគ្រាន់តែបំពេញចិត្តម្ចាស់ជំនួយ របស់ខ្លួនតែប៉ុណ្ណោះ។ លោក ទិត សុធា បានបន្តថា ក្រុមអង្គការក្រៅរដ្ឋាភិបាល គឺពុំ អាចដាក់គំនាបណាមួយ មកលើរដ្ឋាភិបាលឱ្យធ្វើអ្វីតាមគំនិតខ្លួន បានទេ ពីព្រោះក្រុមគណបក្សប្រឆាំងមួយចំនួន បានបំពេញតួនាទីហួស ព្រំដែន ដែលរអិលធ្លាក់ចូលក្នុងភាពអនាធិបតេយ្យ ហើយពួកគេត្រូវតែ ប្រឈមតាមផ្លូវច្បាប់។ ចំណែកលោក យឹម សុវណ្ណ អ្នកនាំពាក្យគណបក្ស សម រង្ស៊ី ពុំបានធ្វើ អត្ថាធិប្បាយយ៉ាងណាទេ ចំពោះរបាយការណ៍សិទ្ធិមនុស្សនេះ ដោយលោកបាន អះអាងថា ជាប់ប្រជុំ ហើយបិទផ្តាច់ទូរស័ព្ទ។ យ៉ាងណាក៏ដោយ លោក អ៊ូ វីរៈ បានអះអាងការពារនូវរបាយការណ៍របស់ ខ្លួនថា របាយការណ៍នេះ មិនមែនជាការរិះគន់រាជរដ្ឋាភិបាលទាំងស្រុងទេ ប៉ុន្តែរបាយការណ៍នោះ ត្រូវបានសរសេរតាមមុំទាំង ៥ របស់រដ្ឋាភិបាល ដែលបង្ហាញឱ្យឃើញយ៉ាងច្បាស់ពីការរឹតត្បិត នូវសេរីភាពបញ្ចោញមតិ ការមិនគោរពច្បាប់ ដែលអាចឈានទៅការគ្រប់គ្រងប្រទេស ដោយគណបក្សតែ មួយ។ របាយការណ៍ ចងក្រងជាសៀវភៅកម្រាស់ ៩៥ ទំព័រ ជាភាសាខ្មែរ និង អង់គ្លេស ដែលមានក្របពណ៌ខ្មៅ រូបថ្លុក បុរសម្នាក់ត្រូវគេ ចងស្លាបសេក និងបិទមាត់ លុតចង្គង់ មុខក្បាលមេក្រូ ត្រូវបានចែកដល់ ក្រុមអ្នកសារព័ត៌មានជាតិ និងអន្តរជាតិ កាលពីព្រឹកថ្ងៃទី១៤ ខែកញ្ញា ឆ្នាំ២០១០ គឺមុនមួយថ្ងៃ នៃទិវាលទ្ធិប្រជាធិបតេយ្យពិភពលោក ដែលនឹង ប្រារព្ធឡើងនៅថ្ងៃទី១៥ ខែកញ្ញា៕ -- You received this message because you are subscribed to the Google Groups "Cambodia Discussion (CAMDISC) - www.cambodia.org" group. This is an unmoderated forum. Please refrain from using foul language. Thank you for your understanding. Peace among us and in Cambodia. To post to this group, send email to [email protected] To unsubscribe from this group, send email to [email protected] For more options, visit this group at http://groups.google.com/group/camdisc Learn more - http://www.cambodia.org
