BBC.com
atariak atzo argitaratu zuenez, eremu urriko
hizkuntzen artean euskara da Twitterren gehien
erabiltzen denenetako bat. Indigenoustweets.com
atariko informazioa hartzen du BBCk iturri bezala.
Atari horretan Twitterren egiten diren 68 hizkuntzetako
mikroblogging iruzkinak zenbatzen dituzte, eta horren
arabera, euskara bigarrena da, Haitiko kreoleraren
ondoren. Micro-blogging in a mother tongue on
Twitter (Twitterren ama hizkuntzan
mikroblogeatzen) du izenburu BBC.com-en artikuluak eta
Dave Lee kazetariarena da.
Indigenoustweets.com Kevin Scannell AEBetako Saint
Louiseko Unibertsitateko irakaslearen ekimena da. Bere
hitzetan "harrigarria" da batik bat ingelerazko
erabiltzen den zerbitzu horretan beste hizkuntzetako
horrenbeste twitterlari aurkitzea: "Liluratu egin
ninduen bere tweetak gaelikoz 1.000 pertsonak idazten
dituztela jakiteak, edo, euskaraz 3.000 lagunek egiteak.
Kopuru horiek, gainera, gorantz doaz", esan du
Scannellek.
Lehen postuan kreolera dago. Haitin hitz egiten den
hizkuntza da eta 12 milioi hiztun ditu. Horietan
artean, Indigenoustweets.com atariaren arabera, 6.878k
erabiltzen dute Twitterren. Beste muturrean gamilaraay
izeneko hizkuntza dago. Australian erabiltzen da eta ia
desagertuta dago; hala ere, badago Twitterren hizkuntz
hori erabiltzen duen erabiltzaile bat, bakarra.
Ama hizkuntzan komunikatzeko nahia
Scannellek garrantzia ematen dio eremu Twitterren eramu
urriko hizkuntza erabiltzeari: "Batzuk oihartzun handia
izan nahi dute eta ingelera eta frantsesa erabiltzen
dituzte. Baina badago baita senide eta lagunekin ama
hizkuntzan komunikatu nahi dutenak. Internauta horiek
antzeko beste batzuen berri izatea nahi dugu", dio
BBC.com-en artikuluan.
Indigenoustweets.com atariaren arabera, 3.788
erabiltzaile ditu euskarak Twitterren, eta 383.630
zenbatu dituzte. Gainera, eremu urriko hizkuntza batean
sarrera gehien sartzen duen erabiltzaileetako bat BERRIA
egunkaria da, zerrendan
ageri denez. BERRIAk 11.526 tweet sartu
dituela dio Indigenoustweets.com atariak. Euskarazko
lehenengoa eastigarraga erabiltzaileak sartu zuela jaso
du.
