SON’VARACHIM SUNGTTAM: Amchim Boroupam! Amchim Kortubam! -Jose Salvador Fernandes
Fattim eke ostore borovpechem pustok vachtalom. Konknniche Romi lipintlean boroilolem tichem tem pustok. Boroupant kitleo chuki mhunn sangum? Ikra utranche eke vollint att tori chuki. Punn Konknnintlea boroupant ticheo chuki astat mhunn kitem zalem? Tosleo chuki mat tichea inglez pustokant asonant. Tichea inglez pustokant asonant mhonnche? Mhonnche, ti inglezintlean-ui boroup korta…. Ekach vixoyacher veg-veglle nodrentlean boroilolim tichim tin pustokam asat. Soglim vachleant hanvem. Punn tichea inglezintlea boroupamni osleo chuki nant. Vixoyachi kholai jitli bori asa, titlich tichi inglez-ui bori asa…… inglezintlea veakoronnachea (grammar) nem’-kaideank dhorun….. utramni boroupachi matui chuk na….. Na-na mhonnlear tichea tea ek inglez pustokanchem ‘editing’ tin pavtti tori zalam zaunk zai…… punn tichem tem Konknni pustok vachtoch, tea pustokachem ek-ui editing’ zaunk na mhunn khatren sangum ieta. Konknni, ani bhou korun Romi lipintlean uzvadda yeupi pustokam vixim mhaka vichitruch dista. Ami lekh, kotha, kovita, nibon’d, adi. borounk bostanv…. Boroitanv…. Boroilam tem pustok rupan uzvaddaunk sodtanv zalear, ami tem asa toxem chhapunk dhaddtanv. Tantum asloleo chuki ami nivllainanv. Borem, teo niullaupak amkam somzona, punn somzota tachexim tori vochunk ami toyar asonanv. Konknnichea mollar oxem kiteak? Taka karonnam asat. Poilem, ami amkam svota khub zannar somzotanv. Ami jem kitem Konknnintlean boroitanv tem sarkench asta oso amcho (vankddo) somoz asta. Ami Konknni ulounk ani vachunk zannonv, hacho orth ami Konknnitlean vevosthit ritin borounk-ui zannonv oxem ami chintanv. Punn khoreponnant oxem asona. Zo uloita ani vachta tache kodde borounk-ui zata oxem na, oso mhozo onnbhov mhaka sangta. Tednam hanv choute klasint xiktalom. Venya nanvachem ek cheddum teach vorgant xiktalem. Venya, khub gorem aslem. Polleunk unchle kullientlem distalem. Klasint tem sangati xikpeam kodde ji inglez uloitalem, ti inglez tache te gore katik sobtali. Tem je toren lett-fett korit inglez uloitalem, te toren tem her xikpeam poros xikpant kitlemxench huxar ani zannar koxem distalem, vo hanv toso te pirayer somzotalom. Tea kallar amkam ‘Unit Test’ mhunn porikxa astali. Dor eka vixoyak 20 gunn (marks) astale. Tantum amkam inglez vixoyant ‘Dictation Test’ astalem. 20 markanchem. Hea ‘dictation test’-acho ‘result’ zatalo tednam, mhojea sangata xikpi Venyak 20 gunnantle 2 na zalear 3 gunn poddop! Mhaka ti sarki tondd ‘am’ korun ievjit bospachi gozal koxi asli! Ab’ba! Venya itli bori inglez uloita ani kitem kai mhonnlear ‘dictation test’-ak fail zata? Uprant mhaka fuddem vochun koll’lem…..boro uloupi ho boro boroupi astach oxem na! Ami Gõykar, ani kherit bhaxen Konknni boroupi toxe toklen borech huxar. Konknnintlean ami kitem boroitanv ani uzvaddaitanv, tednam amkam tea boroupant xud’dhlekhonache nodrentlean kitelo chuki asat tacher ami mon ghalinanv, tacho ami gombhirtayen vichar korinanv. Tim boroupam chuki viret korpacho thokos gheupachem amkam mon asona. Amchea Konknni boroupamni chuki urleo mhunn amkam tem vhoddlemxem disona. Chukinche ghontter aslolim Konknni boroupam uzvaddaunk amkam koslich addkholl disona. Toxim tim chukimni uzvadda ailim zalear-ui tachem kainch vegllem, lojek poddpa sarkem disona. Ami jem Konknnintlean boroitanv tem sarkench asa mhunn dhorun choltanv. Punn tem kiteacher adarun sarkem asa mhunn somzotanv ti khobor na. Punn inglezintlean ami kitem-i boroitanv, vo boroun uzvadda haddunk sodtanv tednam mat amkam amchea tea boroupacho khub husko asta. Ami tem sarkem asa zalear-ui tem sarkem asa kai na hacho amkam zaunk naka aslo tache poros-ui kitlexech pavttin husko zata. Dekun, ami amchim tim inglez boroupam amche amich khub pavtti, chotrayen, vellant vell kaddun, dhean-mon ghalun, gombhirtayen topastanv, ani hea khatir khub thokos ghetanv. Ami topasun zalem mhonntoch, ami tim boroupam uprant anik dog-tegam kodde diun tanche kodde sarkim korun ghetanv…… xud’dhlekhonache ani her bhaxik nodrentlean. Kiteak, inglezintlean chuki aslolim boroupam ami uzvaddailim zalear, vachpi lok amkam hanstolo, lojek ghaltolo, gozali kortolo, adi. oslea gozalinchi amkam bhirant dista. Oslem kitench amchea vantteak ailolem naka dekun ami amchim inglezintlim boroupam zata titlim sudraun ani nivllaun tim uzvadda haddtanv. Zalear, Konknnintleach boroupanchi ami besarmai kiteak kortanv? Ami amchech bhaxechi oxe ritin besarmai kortanv, tednam amkam amche bhaxechem mol kitlem asa, amche bhaxechem amkam vhoddponn ani obhiman kitlo asa to tantuntlean ugto zata. Konknni mon’xachi, ani tantuntlea tantum boreach zann boroupeanchi anik ek vrut’ti (attitude) asa. Tanche bhitor khalteponnachea gunnachi ddigri khub unni asa. Dekunuch to dusrea mukhar chodd-so khalto zaunk sodina. Toso khalto zalear taka ti unneponnachi bhavna koxi dista. Mhunnon to aplo boroilolo vavr dusreak, somzotoleak dakoina. Apnnem kelam tench sarkem mhonnot, apnnem boroilolem chukichem chhapun ani uzvaddaun to mekllo zata. Punn hich gozal to, aplem inglezintlean uzvadda yeupachem aslolea pustoka vixim korina. Tea inglez pustokant ek-ui chuk urchi nhoi mhunn tem pustok chhapnnek vochum porian to artun-portun polleta! Tachi itli zotnai gheta, xevttim kitle-i duddu legit farik korun tachem vevosthit ritin ‘editing’ korun gheta. Duddu diun ‘editing’ korun gheta mhonnlear anik eke gozalich favo tea vellaruch ugddas zalo. Fattlea vorsantlea Mayache 8ver, ratchim 9.00 vazun vetoch mhaka ek fon ailo. “Sir, hanv XXX uloitam. Mhojem ek kovitanchem pustok asa. Devonagorintlean ‘already’ uzvadda ailam. Atam tem hanv Romi lipintlean uzvadda haddunk sodtam. XXX-a kodde diun hanvem teo Devonagorint asloleo kovita Romintlean korun ghetleat. Punn mhaka tantum chuki asat koxeo distat.” “Mhonnche to sarko lipeontor korunk nokllo tor?” Hanvem modinch tondd ghalem. “To zanna mhunnonuch hanvem tache kodde dilolem nhoi? Tem korpak taka hanvem duddu legit farik keleat.” Tannem mhaka anik-ui khobor ugti keli. “Kitle farik kele?” Hanv. “Devonagorintli ek kovita Romintlean borounk taka hanvem 15 rupia farik keleat,” tannem aplea duddvanchem mol sanglem. “Eke kovitek 15 rupia farik keleat zalear, tannem teo sarkeoch lipeontor keleat astoleo.” Hanv. “Na sir, tantum chuki asatxeo distat. Dekun, ‘editing’ korunk hanv teo tuje kodde diunk sodtam.” Xevttim tannem mhaka fon korpa fattlo aplo hetu sanglo. “Editing korpak hanv ‘charges’ ghetam.” Editing korunk vell lagta, tokli lagta, kompiutoracher kortolo zalear bizli lagta hem sogllem taka kollche khatir hanvem taka tem soroll sanglem. Zalear, tannem mhaka kitem sangchem? “Sir, tantum vhoddleoxeo chuki ascheonant.” Mhojea ‘charges’-anchi khobor aikun tannem aplea itlea vellachea sangpant bodol kelo. “Punn thoddo vell fattim tum mhaka tantum chuki asat mhunn sangtalo nhoi?” Hanvem taka tacheach sangnneacher proxn kelo. “Oi, punn toxeo tantum chuki ascheonant.” To porot-ui (chukichem?) uloilo. “Chuki nant mure? Zalear, mhoje kodde anik kiteak dita? Tantum tor chuki nant zalear tum mhozo ani tuzo vell toxech duddu kiteak ibaddta?” “Punn sir, ‘editing’-a khatir tujeo ‘charges kitleo?” Tannem utsuktayen vicharlem. “Eka panak panch rupia,” Hanv. “”Asum-di, hanv teo kovita mhaka boroun dileat toxeoch uzvaddaitam.” Oxem uloun tannem okosmat fon dovorlo, ani hanvuim, jem kitem somzonk zai aslem tem somzolom. Lapitt
