H. Syarif seuri mani nyakakak, rada lila oge seurina, ahirna pok ngomong:”Wah tah picontoeun ieu Jalma teh, bisa nyidem kabisana; urang sarerea teu apal ka manehna; da sama sakali tara nyabit2 soal Silat atawa Persilatan. Hahahaha. Alus2; sok bari ngopi euy, sakabehna we, pok dongengkeun pangalaman maneh teh Jalma.”
Derekdek we Jalma nyaritakeun lalakonna; teu wudu rada panjang; nyarita soal Nyi Epon Jalma rada era saeutik, tapi nya dicaritakeun we; ngan carita soal Nyi Emeh, teu buja beja sama sakali. Jadi nu sejen mah nyahona Jalma Ka Leuwiseeng teh nganteurkeun Nyi Epon we, teu aya sangkaan mapay raratan sagala. Ayeuna mah Ajengan Salim apal, naon sababna para begal dibawa ku Jalma; lain wae Jalma nalukkeun Begal Pasir Buncit, malahan geus ngelehkeun begal nu dipikasieun nyaeta Maung Hideung. Les wae ayeuna mah kacurigaan ajengan Salim ka Jalma teh leungit. Beuki tambah we Ajengan Salim ngahargaan ka Jalma. Saterusna Jalma nyarita yen Ki Jara jeung baladna ka dinya teh salian ti menta dihampura oge rek jadi murid pasantren; nu ahirna Ajengan Salim daek ngahampura ka Ki Jara; keur kitu Bedug Lohor geus ditakol, nya atuh eta nu ngarobrol teh bubar; gancang ka Masigit; sanggeus shalat Lohor, H. Syarif teu loba wiridan, terus wae ngajak sakabehna dalahar ngariung. H. Syarif daria pisan, terus nanya naha Jalma bakal tetep tumetep di ieu Pasantren; H. Syarif rada hanjakal, lantaran Jalma cenah loba keneh tugas nu can tuntas; da kapegat ku nguruskeun Begal nu tarobat. Ngan rek ngendong we sapeuting cenah. Jalma apal keneh kobong manehna; barang jol satengah digusur ku Somad, asup ka kamar, terus hariweusweus:”Yeuh Jalma, ieu kobong teh geus sababaraha kali rek dieusian ku santri anyar, tapi ku uing ditolak, bari nyarita yen tangtu Jalma balik deui ka dieu. Tuh pan bener, yu ayeuna urang sakobong deui. Jeungna eta mamake rompi Maung, hahaha, lucu, meunang meuli ti mana !?” Ki Somad ku hayang2na ngobrol jeung Jalma; ngabuih pisan omonganana teh, teu pararuguh koma peunna; Jalma mah ngan ukur seuri we, da geus apal ka na adat Ki Somad. KI Somad nyaritakeun cenah Aisyah anak Ajengan Salim, geus kawin ka sudagar beunghar ngaranna H. Amir; ayeuna cenah keur ngandeg. Manehna ge nyaritakeun yen ahirna Siti daekeun oge ka Ki Somad; meureun mun taya halangan mah, kawinna kira2 3 bulan deui. Somad bungah pisan Jalma geus datang deui ka dinya. Tapi barang disebutkeun isuk rek indit deui, molohok we Somad, bari hanjelu pisan. Akhirna pok ngomong:”Jalma, ari maneh naon wae atuh nu dilakukeun teh ? Asa bingung ngabandunganana. Kakara ge jol, ayeuna geus rek indit deui !?” Jalma nerangkeun, yen kadieu teh manehna nganteurkeun jelema2 nu tobat; jeung hayang masantren di dinya; mun henteu Jalma moal waka ka dieu deui, cenah da loba pisan nu bakal diurus.” Somad ngan bati ngahuleng we. Bada asar balik ti masigit, Jalma jalan2 heula, terus ka imah Ajengan Salim, barang ngaliwat ka taman, da hareupeun imah Ajengan Salim teh aya taman, barang keur tumpa tempo kekembangan, aya mojang keur metik kembang Ros; ieu teh adina Aisyah meureun, cek hate Jalma; basa eta mah leutik keneh; ayeuna geuning geus parawan ? Eta budak awewe barang nempo Jalma terus we ngageroan:”Ih Kang Jalma mah degig pisan! Kena2 teu jadi ka euceu, ka kuring ge mani hilap nya ?” Eta nyi mojang teh , Jalma masih inget adi Aisyah , ngaranna Nyi Syarifah; tapi basa Jalma di dinya mah leutik keneh; ayeuna geus rumaja; Jalma rada olohok oge sabab Nyi Syarifah teh nyata geulis pisan; geulis bawana ngajadi, endah bawana ti kudrat; imutna ge matak ngirut. Tapi teu lila Jalma ngalamunna, pok we ngomong:” Atuh da kapan Kang Jalma mah tukang kulancar kulencer, jadi we pangling ka Ipah. Komo nyai ayeuna mah mani boronyoy kitu. Ari Apa aya? ( Maksudna Ajengan Salim ). “Aya, yu atuh Kang kalebet; ke Apa diwartosan.” Di na hatena rada kebat kebit, da tadi disebut boronyoy ku Jalma; rek naon nya Kang Jalma, ka Apa? Mun eta tea mah............ hehehe, moal ngadua kalian nanya , pasti ........aing narima.” Kitu pikiran Nyi Syaripah waktu harita. HANCA
