Barang eta tamu nu limaan ti Cirebon geus rada jauh; haok we Aj. Salim nyeukseukan Nyi Ojoh :”Ieuh, cing atuh sadar nyai teh; Akang mani era parada, ngadenge ucapaan Nyai saperti kitu ! Enya urang teh lain jelema kaya; tapi ulah sok kabita ku banda anu lain hakna. Beu ! Dikamanakeun beungeut akang, mun Jalma nyahoeun yen Akang narima eta barang; atawa ngadenge nyai ngomong kitu. Ari Jalma mah Akang percaya, moal nepi ka ambek; pasti ngahampurana. Ngan wae beungeut urang rek disumputkeun di mana ?” Panjang caritana Aj. Salim; demi Nyi Ojoh ngan ukur inghak2an we, da rumasa geus kalepasan nyarita kitu ka salakina ( Aj. Salim ). Keur kitu torojol Nyi Ipah; segruk ceurik, bari nyuuh ka Aj. Salim. Manehna bungah, lantaran bapana teu narima lamaran eta sudagar Cirebon. Aj. Salim ngusapan ka Nyi Syarifah. Nya eureun we nyeukseukan bojona teh. Ahirna Nyi Syarifah paungku ungku jeung emana. Episode ka 38 Maung Hideung ngayakeun operasi Operasi Maung Hideung salila di Pasir Buncit ngawasa daerah nu lega oge; ngambah ka Cisurili, Wanayasa, Leuwiseeng, nepi ka Pasar Cirangkong; tapi maranehna ngajaga teu operasi ka kampung2; maranehna ngan ukur megatan sudagar nu ngaliwat ka daerah operasi maranehna; tapi maranehna ngusahakeun mun bisa ulah maragatkeun nyawa jelema. Teu wudu, loba oge hasilna lantaran memang Maung Hideung rata2 jarago; tapi nu geus apal mah, mun kabeneran panggih teh terus we mere duit atawa mere barang, jeung Maung Hideung oge teu ngadesek teuing; nya dibere liwat we ; jeung ditandaan, nepi ka mun pasanggrok deui jeung pasukan sejenna teu dipegat deui terus we aman. Oah2 di hiji tempat, nu geus apal mah, sok mere bagean oge ka ieu Kumpulan Maung Hideung, lantaran maranehna ge hayang aman di daerah nu dicekel ku maranehna, jadi mun aya naon2 bisa dibantu ku Maung Hideung; saperti si Jabrig ti Cisurili, maranehna sering ngirim “oleh2” ka Maung Hideung; jadi Maung Hideung moal daekeun asup ka Cisurili, malah ngabantu mun Cisurili aya nu nyerang ti gorombolan sejen, mun aya. Jadi pangaruh Maung Hideung memang lumayan gede di daerah eta mah. HANCA
