Duanana kaget ! Jalma kaget lantaran di na elmu hampang raga nyata Mawar Hideung hese ditandinganana; ari Mawar Hideung kaget lantaran Jalma bisa lolos ti na bahaya; mun keuna tangtu Jalma bakal cilaka. Jalma gancang luncat jeung siap sadiya; manehna ngarasa untung lantaran Mawar Hideung teu neruskeun seranganana; sabab mun tadi Mawar Hideung nyerang deui tangtu Jalma bakal ngaluarkeun senjatana. Eta gerakan ti dua pihakanana Kacida karesitna; Mawar Hideung nyerangna ngan sakilat; Jalma oge ngelok ngan sakilat oge. Kakara ge Jalma ajeg, Mawar Hideung nyorowok ciaat ! tapi eta tulisan ciat teh, ari buktina mah peureup geus nuju ka na irung Jalma; ampir bareng antara ciat jeung cepetna tonjokan, malah karasa ku Jalma mah tonjokanana nu tiheula ngadeukeutan irung Jalma. Serangan kadua ieu, Mawar Hideung ngagunakeun jurus Cucuk Ros nojos cingir! Panon Jalma nu cingceung awas pisan ka na sasaran eta jurus; enya ge ngan sakilat; tapi ku gerakna taktak Mawar Hideung Jalma apal kamana eta tonjokan nujuna; mikir jeung gerakan Jalma tangtu KILAT pisan; sabab lamun telat mikir jeung telat gerak; tangtu Jalma ngajurahroh. Jalma sakaligus ngaluarkeun dua jurus; nu hiji ngabela diri; nu kadua keur males nyerang ka Mawar Hideung. Ku sabab Ki Nurustunjung mah jelema aneh; jurus nu digunakeun ku Jalma ngaranna ge araneh. Jurus nu keur nakis disebutna “Miceun runtah jeung kokotor”; ari jurus serangan balik disebutna “Nyomot gulali dipotongkeun”; lamun leungeun Mawar Hideung nu nonjok tadi kabeunangan, tangtu Mawar Hideung rugi oge ! Tapi ngan sakilat oge nyaho seranganana gagal Mawar Hideung; ngarobah jadi jurus “Walet ngapung ka mega” ; ngan sakilat Mawar Hideung geus malik nyerang deui ku tajongan ari leungeunna salamet ti na jurus Jalma. Tapi eta tindakan nu ngan sakilat ti Mawar Hideung, masih katuturkeun ku Jalma; gancang Jalma ngan sakilat oge ngarobah jurus, jadi “lauk lele luluncatan”; jadi sakaligus nyerang terus koprol ka tukang.HANCA
