Nya atuh saterusna ditandu we ka kadipaten. Ari Eta pamuda terus diondang supaya datang oge ka Kadipaten Jepara. Saenyana eta pamuda teh nolak, lantaran cenah loba adat peradatan; kararagok cenah; tapi satengah maksa eta Senapati terus ngudukeun Ki Sangga Prakosa datang; lantaran cenah ti barang eta Pendekar gagah nulungan Jepara ti na bahaya nu bakal tumiba; nya ku tulungna Sangga Prakosa Kadipaten Jepara teu jadi carem. Saenyana Adipati Ranuwijaya teu pati resepeun ka Kumpeni; malah hayang baruntak, tapi teu wasa lantaran mun kitu sarua jeung ngorbankeun Kadipaten Jepara jeung ngorbankeun rahayat; jadi nahan diri we ieu Ki Ranuwijaya teh. Tapi Regent wakil Kumpeni nyaho yen Adipati Jepara kurang simpatik ka Kumpeni; nya Regent nyieun alesan supaya bisa ngahukum Adipati Ranuwijaya. Regent Jepara nu eta ngaranna Hans Van Rebech ( baca rebek ). Eta Hans Van Rebech na hiji mangsa ngadatangan Adipati bari mere parentah Adipati kudu nyieun jalan ti Jepara ka Demak; lantaran cenah jalan nu ayeuna geus teu coccog deui jeung kamajuan jaman. Kudu anggeus di na waktu tilu bulan cenah. Adipati Ranuwijaya maphum yen eta parentah teh nyata rek nyusahkeun; tapi mun henteu Jepara bakal diserang; paling saeutik Kadipatenna bakal dibikeun ka jelema nu nurut ka Kumpeni. Adipati jadi nguluwut; teu ngeunah dahar jeung sare; gawena humandeuar; lamun nitah rahayat; Adipati ngarasa watir ku rahayat, tapi mun teu dilaksanakeun tangtu Kaadipatianana bakal dicopot. Saminggu ti harita aya pamuda datang ka Kadipaten cenah bejakeun ka Kangjeng Adipati kula rek ngadep kituh. Tangtu we eta pamuda diusir da pakeanana ge karuleuheu teu parantes; bari ngomongna ge sama sakali jauh ti na hormat ka Adipati. Tapi nyata eta pamuda teh teu beunang diusir; malah para prajurit ting talambru; nya datang Ki Senapati Indraloka; nu langsung nyabut keris; tapi can ge eta keris ditubleskeun ; teu nyaho kumaha kerisna geus aya di eta pamuda; bari seuseurian, Nurustujung pisan ! Keur ribut2 kitu Sang Adipati kaluar, nanyakeun ; sanggeus nyaho tujuanana, terus we Adipati nyarita :”Sok we sina ngadep ka Kaula , hayang nyaho rek naon cenah !?” Nya manehna abus we; tapi eta pamuda menta ka Adipati supaya dibere kasempetan opat panon we cenah. Senapati Indrajaya jeung Ki Patih Anggodo mani nyentak, ngadenge eta pamaksudan pamuda teh :”Ah nurustunjung ka patutna siah ! Untung dibere asup ge !” Tapi duka kumaha Adipati percaya pisan ka eta pamuda nu kalakuanana Kacida anehna , terus we ngidinan, mun tea mah eta pamuda hayang nyilakakeun adipati, moal kitu carana; jadi Adipati teu ham ham ka na maksud hade eta pamuda; nya tuluy we Patih jeung Senapati sina kalaluar. Teu disangka eta pamuda bari sura seuri ngaluarkan hiji bungkusan tina gembolan nu dibawa ku manehna; barang bray dibuka teh; cap resmi Karegenan jeung kapangkatan Hans Van Rebech. Mani molotot Kangjeng Adipati; pok nyarita bari ngageter:”Maneh rek nyilakakeun Kaula ? Nanaonan mawa cap Regent !?” “Ssstttt ! cek si pamuda teh, yeuh Kangjeng Adipati; si eta van Rebech teh ayeuna can nyahoeun ieu barang leungit; tilu poe deui bakal datang Inspektur Jendral ti Batavia; tah sabage ambtenar pangkat luhur si Rebech tangtu bakal dipariksa sagalana , kaasup eta CAP; mun euweuh wah eta Ki Regent bakal dicopot ti na pangkatna. Engke Kangjeng Adipati ngahaja ka Kantor Regent api2 sowan; pasti manehna keur dipentog ku eta Inspektur Jendral. Tah Kangjeng Adipati tinggal nyebutkeun waktu ki Regent sowan ka Kadipaten; eta cap katinggaleun.” Adipati bungah, nya hal eta dilaksanakeun saperti nu diomongkeun ku eta Ki Sangga Prakosa. Bener we akhirna ki Regent nganuhunkeun pisan, lantaran teu tulus dicopot pangkatna; jeung paringetan, supaya ulah neken teuing ka Adipati. Kungsi oge nanyakeun kumaha bisana eta sagala cap bisa aya na leungeun Ki Adipati; Adipati ngarang carita yen saenyana mah manehna dibelaan Ku Nyi Roro Kidul. Nya teu papanjangan nanya si Rebech; geus we tutup nepi ka dinya. Parentah nyieun jalan ditunda jeung dicabut; malah terus ditanganan ku Regent sorangan. Teu ngagunakeun tanaga Rahayat; tapi nya mayar kuli bangunan tea we. Ku sabab kitu Adipati Ranuwijaya mah sanget nya nganuhunkeunana ka eta Sangga Prakosa teh. Tapi dasar ceuleupeung leos indit we manehna teu aya ngulampreng deui. Tah nya ti semet eta Adipati marentah kudu neangan eta Pendekar Sakti; kudu dihormat pisan cenah, ulah disapirakeun. Senapati rada teu ngarti; tapi ti harita kaciri Tuan Regent bageur pisan, teu pisan hayang nyusahkeun Kadipaten Jepara. Eta sababna Senapati ngagegejeg bari hormat supaya Sangga Prakosa daek datang deui ka Kadipaten.HANCA
