Pudigdig bae Lasmini napsu pisan, ngadenge omongan Si Cepot pang ahirna; tapi ayeuna mah Lasmini geus apal ka na kahebatan dirina; ayeuna manehna moal waka nembongkeun heula kabisana; keun api2 we heula, cek hatena. “Heh ilaing ngomong make otak ! abong biwir teu diwengku letah teu tulangan, ngomong sadaekna wae!” Bari kolomprang wae meja dibalikeun, Lasmini terus kaluar. Atuh ribut harita keneh, si nu boga warung cocorowokan, lantaran can dibayar turta loba barang nu pareupeus. Terus ku Astrajingga dijejelan duit 10 Gulden, atuh eta tukang warung teh mani nuhun2an aya kana 10Xna mah. Nu limaan gancang pisan ngudag Lasmini; terus we ngan sakilat Lasmini geus dikepung. “Hahahaha ! Rek kamana Cah Ayu ?! Cah Ayu can ngajawab, tarima atawa henteu lamaran si Kang Mas !?” Geplak ! Kakara ge balem pipina geus dicabok manten ku Lasmini. Rada kaget si Astrajingga, lantaran manehna teu sempet nakis2 acan, bari karasa nyeri pisan. “Eeeeh ieu bocah teu beunang dipikanyaah,” cek si Udawala bari maju rek newak Lasmini; tapi keplok ieu ge kacabok mani karasa peureus pisan, pipina diusapan da karasa panas urut cabokan Lasmini teh. Atuh Si Cepot jeung si Gareng ge rek nyoba newak tapi ngan sakilat geus kabagi cabokan ku Lasmini. Nu limaan teu tata pasini siga nu geus badami bareng ngarontok Lasmini; kumaha akibatna ? Lain Lasmini katewak; tapi eta nu limaan silih cakar sorangan; maranehna gancang marisah bari kutuk gendeng, jeung silih salahkeun; Lasmini kamana ? Lasmini teu ngejat jauh keur nangtung we nungguan nu keur ting arukey, bari nulak cangkeng Lasmini ayeuna nu ngabentak:”Heh arilaing nu limaan ! tong kapalang hayo cabut eta bedog maraneh, sok hayang nyaho !” Eta “Lima Jago Pasir Luhur” kitu kasohorna eta nu limaan, silih pelong jeung pada baturna; tapi teu lila terus ting serebet bedog dilalugas, mani ting gurilap. Maranehna sadar yen ieu wanoja teh masing masih keneh ngora ge, nyata elmuna lumayan. ( can nyahoeun kahebatan Lasmini mah, da Lasmini na ge kakara uulinan ).HANCA