Serangan ieu teu kaburu dicingcetkeun, kapaksa ditakis barang plok ! diadu leungeun; Mawar Hideung ngarasakeun leungeunna asa komper. Si Tapak Waja barang nempo Mawar Hideung nakis, manehna bungah pisan, potong siah leungeun maneh, cek dina hatena. Tapi barang diadu leungeun, leungeunna ngageter, tanda si Mawar Hideung oge boga tanaga jero nu lumayan luhur. Masing enya umurna budak keneh pisan. Mawar Hideung ayeuna mah leuwih waspada lantaran ieu tilu musuhna teh tangtu jarago tiluanana; jadi teu bisa sambarangan ngalawanana. Waktu di Cirebon, Mawar Hideung nitah tukang beusi mang nyieunkeun senjata rasiah, nu wujudna peso laleutik tapi sareukeut; nu leuwih ampuh ti batan batu laleutik. Tah nya manehna ayeuna siap2 rek ngagunakeun eta senjata rasiah; supaya bisa ngelehkeun ieu lawan tilu nu kaciri jarago kabeh. Mangkaning manehna boga kira2 limapuluhan siki mah eta senjata rasiah teh. Nu Tiluan ayeuna mah maphum, yen enyaan ieu pendekar awewe teh lain ngaran bohongan; enyaan Mawar Hideung teh hebat. Maranehna ayeuna mah teu wani gagabah nyerang deui; tapi ngarapetan Mawar Hideung bari waspada; ari anak buah mah ngan ukur ngacung2 bedog we ti kajauhan bari pating corowok, teu wani maju; da maranehna ayeuna mah sadar yen maranehna keur nyanghareup an hiji Pendekar Ngora nu jago pisan. Lain sisiwo. Sawareh aya nu laporan ka Markas. Tah keur silih perong bari waspada kitu, kadenge aya sora nu matak ngajelengeng ka na ceuli; sora seuri bari dieusian ku tanaga jero. Hahahahaha. Barang eureun sora seuri jol we hareupeun eta nu tarung hiji jelema nu beungeutna pinuh ku tapak harideung; bajuna hideung teu dikancingkeun, atuh kaciri awakna nu oge raca harideung. Ieu akibat ti na sok ngalatih Racun. Wah ieu mah badis siga jurig jarian tea meureun; cek Mawar Hideung di na hatena. Eta nu datang teh tangtu Pamimpin kumpulan Siluman Laut Kaler ! Nya eta Si Raja Racun; lantaran para anak buah begal kaciri salusurakan nyambut eta nu datang. Barang nempo Mawar Hideung, eta jelema goreng sopak teh seuri deui :”Hahahaha, nyata kajagoan Mawar Hideung lain beja ! Enyaan jagona ! Tapi PIYAN moal kuat ; Piyan masih budak keneh, maning PIYAN milu ka Ulun. Ulun bakal nempatkeun Piyan ditempat Istimewa di ieu Kumpulan. Hahaha !” HANCA
