Fiksimini - Tai Ceuli!
"Lihat! Golep Pak Usin!" Gita nyikikik. "Tuh Pak Usin habis jumaahan. Rambutnya kelimis!" Sinta seuri ditungkup. Manéhna jongjon. Sura-seuri. Tonggoy muru ka rohanganana. Najan karyawanna sok tingkecewis, teu kaganggu. Ngan hiji mangsa, basa pamajikanana titip gepuk kalah mawa kurupuk, kakara daék ka dokter. "Sakit Pak ya? Sudah mengering. Tidak bisa dengan 'cotton bud'. Harus disedot. Tahan ya!" dokter ngupahan, "Tahan, sedikit lagi!" Pluk! Cleng! Aya nu ngacleng dina ceuli katuhuna. "Hampir sebesar keleréng Pak!" dokter nyéréngéh. Hiuuung! Heaaang! Ceulina ngung-ngéng. Teu puguh dédéngéan. Sagala kadéngé: Nu ngobrol di ruang tunggu; Nu bobogohan di taman; Nu paséa di parkiran. Isukna di kantor, basa karyawan tingkecewis, manéhna popolotot, "Jadi salila ieu, unggal isuk ngaromongkeun aing nyah!" Di imahna, unggal peuting hésé saré. "Aduh! Géték Kang!" sora cakcak bikang ngajérété. "Jang béjaan si Amang, aya gula handapeun méja!" sora sireum beureum ngaharewos. Isukna manéhna ngincid ka dokter. "Dok! Pulangkeun deui wé tai-cepil téh!"
