Tapi barang manehna ajeg nangtung; ujug2 aya sora nyentak :”Heh saha eta hah?! “
Sari kakara mikir rek ngajawab, tapi eta jelema geus ngolebatkeun bedogna bari nyentak :”Ah pasti maneh bangsat nya !? Rasakeun ieu kadekan ti aing !” Sari teu nyangka yen ayeuna mah imahna dijaga ku para centeng; keur kitu ti sabeulah jero lalumpatan muru ka dinya. Bari nyorowok :”Aya naon Adul ?” Tapi barang nyalampeurkeun, si Adul geus ngagoler manten. Serangan centeng teh lain nanaon keur Sari mah; ngan sagilek geus dicingcetkeun; nu saterusna bedogna karebut; terus manehna ngagetok urat lumpuhna atuh harita keneh si centeng nu disebut si Adul ngagoler. Nu daratang aya opatan nya centeng oge; teu loba omong terus nyerang; tapi ieu ge ngan sababaraha jurus geus ting jarungkel ! Kakara ge Sari; rek maju deui teu kanyahoan aya serangan ti hareup nu bari nyorowok oge ; sidik sora awewe :”Eh Bangsat rek ngajago siah !?” Karasa ku Sari ieu serangan kacida cepetna jeung tanagana ge beda jeung para centeng; rada reuwas oge Sari; naha nya ditempat bapana ayeuna mah loba jagoan; saperti ieu awewe nu nyerang ayeuna. Sari teu kebat mikirna lantaran serangan kacida bahayana, masing teu make senjata oge. Tapi Sari geus mapan, nu matak diangkat jadi Ketua Walet Hideung ge; nya manehna ge nyieun gerakan2 keur ngalawan eta serangan awewe nu disanghareupan. Sanggeus aya ka na tilu jurusna kakara Sari bisa ngimbangan, lantaran tadina kaserang tiheula jadi kapiheulaan babar; tapi ayeuna manehna mantep ngalayanan; nepi ka na hiji mangsa leungeun diadu nu dieusi ku tanaga jero. Eta awewe mundur sababaraha lengkah; ari Sari mundur oge salengkah; eta nembongkeub yen tanaga jero Sari leuwih luhur ti batan eta awewe. Keur kitu bray aya cahaya lampu; terus kaluar; nyata eta teh ki Sarwa; terus manehna nyarita bari heran jeung hawatir:”Aya naon Nyi Epon !?” Najan geus jadi pamajikan, tetep we Ki Sarwa nyebut Nyi Epon lantaran ngahormat ka Nyi Epon, jeung bari rada sieun. Eta awewe, nu nyata Nyi Epon, nyentak :”Tong pipilueun ! uing keur ngabereskeun ieu bangsat !” Nyi Epon terus ningkatkeun seranganana; tapi lain kadesek Sari malah ngalayanan ku elmu nu sarupa; ahirna Nyi Epon luncat ngajauhan, terus ngomong :”Eh tunggu heula ! naha geuning maneh bisa ngaluarkeun jurus2 nu ampir sarua jeung Kaula !?” Saenyana Sari oge ti tatadi heran, naha aya hiji awewe nu jurus2na sarupa jeung kabisa manehna ? Tapi sanggeus Ki Sarwa nyebut Nyi Epon, Sari inget ka dua awewe nu disalametkeun ku Mawar Hideung Lasmini; waktu aya di na tawanan Rajawali Bodas. Meureun teu nyaho kumaha, ayeuna geus jadi pamajikan lanceukna, nya eta Ki Sarwa.Nya akhirna Sari muka kurudungna; barang nempo Sari; boh Ki Sarwa boh Nyi Epon sarua kagetna. Hanca
