Sari oge nyaritakeun lalakon ngahukum si Tilu Oah; Ki Sarlita jeung Sarwa kaciri bungah pisan, lantaran Sari bisa males kanyeri ka eta tilu Oah nu jahat.
Keur kitu Nyi Epon milu nyarita, ditujukeun husus ka Sari :” Sari adi aceuk, aceuk teh aya nu bakal diomongkeun, nu cek pamikir aceuk mah penting pisan; tapi mun bisa mah, kumaha mun ngobrolna paduduaan we… “ Omongan Nyi Epon teu kebat lantaran dipotong ku Ki Sarlita :” Nyi Epon … Nyai ge ayeuna mah geus jadi anak ama; sok we dideu nyarita; teu kudu era2; bade nyarios naon Nyi Epon teh ?” Ki Sarlita biasa ari nyarita ka Nyi Epon sok rada handap asor; lantaran Ki Sarlita oge apal adat Nyi Epon nu aseran; mun salah2 ngigelanana, matak gujrud salelembur. Samemeh pok nyarita, Nyi Epon melong heula ka Sari … Sari ngan ukur unggeuk bari teu jelas unggeuk naon. Sanggeus dehem sakali deui pok Nyi Epon Nyarita :”Ah Kang Jalma teh memang Arjuna we sugan mah; di ditu di dieu aya we hiji mojang nu naksir ka Kang Jalma … kaasup hehehe aceuk sorangan … tapi rumasa aceuk mah ambon ssorangan … tuda kumaha ! Rumasa aceuk mah goreng sopak , kang Jalma mo ngaareret reret acan !” Sari motong :” Aeh ceu Epon nyarios naon eta teh ? abdi mah tos teu aya hubungan naon2 jeung Kang Jalma teh.” Nyi Epon :” Yeuh Sari tilu bulan nu kaliwat, aceuk panggih jeung Adi Demang ngaranna Utari; manehna keur neneangan Kang Jalma.” Nyi Epon eureun heula nyaritana bari meleng nempo reaksi Sari. Tapi kaciri Sari teu riuk2; enya ge hatena mah dag dig dug tagiwur; tapi beungeutna teu nembongkeun rasa nu dikandungna. Eta dilantarankeun Sari memang geus aya bakat alus jadi pamimpin; waktu latihan oge manehna bisa konsentrasi teu kaganggu ku kapentingaan pribadina. Estu Sari mah cecekelanana kukuh. “Aya carita deui, nu matak narik, nya eta cenah Kang Jalma ge boga hubungan husus ka anak Kumpeni nu ngaranna Non Bella; eta dicaritakeun ku Ma Emeh ibuna Kang Jalma.” Nyi Epon eureun heula nempo reaksi nu ngadarengekeun. Tapi kaciri nu sejen leuwih hayang nyaho jujutan lalakon Jalma saterusna, ti batan ngomentaran carita Nyi Epon. “saenyana mah … “ Nyi Epon neruskeun caritana. Kang Jalma teh geus papacangan jeung Nyi Ipah !” Ngahaja Nyi Epon nekenkeun pisan omongan nu ieu; ayeuna mah kaciri Sari rada robah paromanna … aya siak “keuheul” hanjelu jsb. Eta meureun nu disebut timburu teh. “Ceu Epon …” Sari ayeuna nyarita … bari sorana kaciri rada ngageter . “Sagala nu dicaturkeun ku euceu teu aya pangaruh pikeun Sari !” Di dieu kaciri Sari nahan parasaanana nu ngagolak na dadana. “Waktu ieu Sari geus diangkat jadi Pamimpin/Ketua Paguron Walet Hideung !” Sari eureun ngarenghap heula. “Kuring boga pancen nu lumayan beurat. Ku sabab sakitu, pikeun Sari … hubungan jeung lalaki di na waktu ieu jajauheun pisan. Jadi tong salempang; Kuring Sari moal rek neneangan lalaki nu ngaran kang Jalma. Bari na ge Kang Jalma mah ku Sari geus dianggap LANCEUK !” Nyaritana kitu Sari bari rada merong seukeut ka Nyi Epon. Nyi Epon seuri, pok nyarita :”Syukur atuh ari Sari sadar mah … barina ge naon gunana miharep hiji lalaki nu loba pisan kikindeuwanana ! Euceu mah inggis we Sari jadi kateler teler miharep nu lain harepeun pisan. Tah euceu ge kapan maning nikah we ka Kang Sarwa; ti batan hayoh nginget2 ka lalaki nu boa teu inget2 acan ka urang. Ieu mah dicaritakeun soteh, nyaah ka Sari !” Sigana Nyi Epon geus nutup caritanana nu mirupa hehe “komporisasi” ka Sari. Sanyatana Nyi Epon enya ge geus ditikah ku Ki Sarwa, ari hatena mah duka kumaha tetep we miharep ka Jalma; da kahayang Nyi Epon mah Sarwa ge kuduna mah JAGO Silat. Kakara manehna daek ngahargaan. Nya atuh di na sapopoe teh, enya ge Ki Sarwa geus meunang keun Nyi Epon, tapi ari batin2na mah jauh pisan; nya kapaksa we cape hate ge dilakonan; da bonganna mikabogoh ka nu jago Silat; di mana manehna teu bisa sama sakali ! Jadi ieu meureun nu disebut awet rajet teh. Kakara ge tilu poe Sari di imahna; terus pamitan ka bapana jeung lanceukna; teu bisa ditahan, lantaran cenah Sari geus jadi Ketua, teu meunang lila2 ninggalkeun paguronna. Nya sono2 ge Ki Sarlita teu bisa ngahalangan; ngan na hate mentegeg ka Nyi Epon; lantaran ku pokalna Sari jadi teu betah di imahna. Nya tapi dalah dikumaha memang na hal ieu Nyi Epon teu bisa disalahkeun. Ki Sarlita teu nyangka oge yen loba wanoja kapincut ku Jalma; tapi ana dipikir pikir leuwih jero, nya wajar loba wanoja raresepeun ka Jalma; lantaran kapan Jalma mah Cerdas, pinter, teu ngedul; daek digawe nu kumaha wae; turug2 tara cunihin atawa porenges ka awewe. Akhirna Ki Sarlita ngaheruk, emh saenyana mah pilihan Sari ka Jalma teh tepat pisan; da memang Jalma boga sifat lalaki nu dipikaresep ku awewe. Ngan harita manehna sieun Jalma bakal sangeunahna ninggalkeun Sari; lantaran ngaranna ge Pendekar; pasti loba jalan2 ka ditu ka dieu; encan nyieun musuh jrrd. Hal ieu nu ngalantarankeun Ki Sarlita teu satuju Sari deukeut ka Jalma. Nya munasabah pisan saenyana pikiraan ki Sarlita; da memang kudu kitu ari nyaah ka anak mah. Sari inditna ti Giriresik waktu harita, pinuh ku rupa2 pikiran; pangpangna ngeunaan Jalma geus dipapacangankeun ka Nyi Ipah. Paingan atuh cek pikirna Jalma mani siga adug songkol neneangan dua wanoja harita. Nepi ka tega ngalakukeun kakerasan ka dulur2 sapaguron Sari ! Terus kapikir deui, memang Nyi Ipah teh geulis; wah jauh aing mah dibanding Nyi Ipah … pantes mun Kang Jalma teu inget deui ka manehna !? Jadi saenyanaa Sari teh masih sono keneh ka bapa jeung lanceukna; bari atoh yen bapana ayeuna mah nyatujuan ka na hubunganana jeung Jalma. Tapi teu disangka Nyi Epon ngabuka RASIAH Jalma soal papacangan jeung Nyi Ipah; bari teu disebutkeun naon sabab2na Jalma jol narima kitu wae ka Nyi Ipah. Memang sigana mah Nyi Epon satengah ngahaja mapanas Sari na soal eta. Lantaranana deui, manehna geus asa midulur pisan ka Nyi Ipah; manehna boga tekad hayang ngabela Nyi Ipah lahir batin. Manehna ngarasa satuju mun Jalma kudu nikah ka Nyi Ipah; tapi manehna teu satuju mun Jalma kawin ka nu sejen salian ti ka Nyi Ipah. Di na hal ieu memang kalakuaan Nyi Epon kaleuleuwihi; pipilueun ka na urusan nu lain urusanana. Tapi memang sifat Nyi Epon kitu pisan; sok hayang pipilueun ka na urusan batur. Manehna ngarasa eta kalakuanana asa pangbenerna; lantaran tekadna bebela ka hiji sobat; moal enya bebela ka hiji sobat bisa SALAH !? Tapi di na hal ieu Nyi Epon teu mikirkeun kumaha kahayang SOBAT nu rek dibela teh ? jeung kumaha pihak2 sejen nu aya hubunganana ? Sama sakali Nyi Epon teu mikirkeun nepi ka hal jauh saperti eta. Di dieu kaciri relatifna hiji tindakan teh ! Jadi hal ALUS nu dipandang saliwat can puguh eta tindakan teh enyaan alusna !? Jadi sagala ge kudu dibeuweung diutahkeun heula. Check and recheck. Ulah dapon wae. Episode 80 : Surat Panggilan ti Landrat Hanca
