Assalamu'alaikum wr.wb.,
'Jadi baa mak Marah? Lai kandidat awak nan sato menang?' tanyo si Barani
katiko samo duduak minum kopi di lapau randah.
'Antahlah. Aden sato-sato mamiliah sain no. Indak ado bagai den ba
kandidat-kandidat doh,' jawab mak Marah agak hamba.
'Kenapa pulak begitu? Yang dipilih oleh kita tentu kandidat kita namanya.
Jadi kalahnya nan mak Marah pilih?' si Barani maajuak pulo baliak.
'Nan den piliah tampakno iyo masuak kotak. Ka dipangaan lai,' kecek mak
Marah pulo. 'Diang, sia nan ang piliah kapatangko Barani?' tanyo mak Marah
pulo.
'Pilihankupun melesetnya. Akupun ikutan memilih yang paling tidak di
sebut-sebut orang bermasalah. Sayang kali. Tak cukup dapat suara kawantu,'
jawab si Barani.
'Iyo ibo pulo awak maagaki. Urang nan luruih indak laku kirono di nagari
awak nan gadang ko doh,' Malin Ameh sato manimpali.
'Tapi indak di sasa pulo,' Bagindo Baro pulo sato manyiram.'Ano acok
salah-salah mangecek. Jadi kurang ati urang. Co kok amuah agak imaik-imaik
saketek dalam mangecek.'
'A bagai tu nan dikecek-anno?' tanyo Sutan Man tari.
'Adolah. Nan indak-indak paralu. Kini a lai. Lah jadi bubua nasi,' jawab
Bagindo Baro.
'Anu bagai iyo pulo goh. Dek bantuan talaik tibo. Co kok capek partai
ustad-ustad tu maagiah angin. Indak ragu-ragu ustad nan lain ka manolong.
Ko nampakno suaro ustad bagai indak pulo bulek nampakno doh. Kini a juo
lai. Lah manang calon urang. Nantian pulolah limo tahun lai,' Malin Ameh
manambahkan.
'Itulah. Itulah nan disasai di awak,' kecek Sutan Mantari.
'Angku-angku mangecek sarupo urang indak bariman saketek juo mah,' kecek
mak Marah mamacah ota nan samakin indak bakaruncingan tu. 'Rintang
manyasa kamanyasa juo. Indak saketek juo picayo jo takadia. Usahono alah,
sato alah, tapi indak manang, itu takadia namono. Adaik lago iyo
bakalah bamanang. Dek urang manang, kalah awak, kama pulo kapai lai. Lai
kamungkin ka diasuang pulo masyarakaik mam buek heboh? Ditangkokno awak biko
di pulisi. Kini kok kalah calon awak, pandai-pandai sin lah jadi urang
tukang jago garih lai. Nan kamudi tantu dipacik dek nan manang, awak sato
maawasi. Raso-raso ka takencong jalanno, kajuik-i. Heboh bana awak kalusuak
anyak manyasa, indak ka mungkin bagai mameloki nan alah takadia tu doh.'
Mak Marah manyudahi katubah.
Urang salapau tapaso tanang.
****
Wassalamu'alaikum wr.wb.,
Lembang Alam
____________________________________________________
Berhenti/mengganti konfigurasi keanggotaan anda, silahkan ke:
http://rantaunet.org/palanta-setting
___________________________________________________
