===
Kok hanyo sipek mudo matah
Buruak jo baiak kapadoman
Larang pantangan adaek minang
Sipaek nan tigo kok dikaji
Jadi pituah dek nan tuo
Simak dek buyuang ayah bincang
Partamo Bujang Parisau
Kaduo Bujang Pangusau
Katigo Bujang Pusako
Kok hanyo Bujang Parisau
Tagak katangah nyo bamegu
Tagak katapi nyo managun
Siang malam bahati gamang
Patang pagi bahati ragu
Malam di gilo angan angan
Siang di bimbang agak agak
Cadiak malam nan binguang siang
Paham sarupo gatah caia
Iko elok itu katuju
Sarupo pimpiang di lereang
Bak aia di sandiang pulau
Tunggang kian dareh kamari
Kok hanyo Bujang Pangusau
Suok kida mamacah parang
Mangusuik alam nan salasai
Mangaruah aia nan janiah
Asuang siantek balabiahan
Jungkek jo patiang di hati nyo
Sayang di urang ka bacarai
Banci di urang nan ka elok
Kecek gadang timbangan kurang
Tinggi ruok dari boto
Nan dek urang sagalo bukan
Nan dek inyo sagalo iyo
Lonjak bak labu di banam
Sarupo kambiang dek ulek
Kok hanyo Bujang Bapusako
Tau di rantiang ka manyangkuik
Tau di duri ka mancucuak
Tau di tinggi ka ma impok
Tau di gadang ka malendo
Tau di bayang kato sampai
Nan tau jo koroang kampuang
Nan tau jo ipa bisan
Pandai mangaji baso basi
Pandai manggantang aia lauik
Pandai manyalam dalam bumi
Pandai ma uleh rumin putuih
Paga adaek benteang pusako
Itulah sipaek ka dipakai
Banamo mudo bapusako
Bogo tatungkuik tagulampai
Bapantang rusak rumah tanggo
Paham kan bana elok elok
Padoman pagi jo patang
Asah nan baiak kito kakok
Tuhan manoloang di balakang
===
iko kutipan naskah Magek Manandin, nasihat dari Datuak
Bandaro (ayah Magek Manandin) ka Magek.
malanjuik-an per-hero-an uda Syahril, (tapi bukan
urusan taksir menaksir, hehehee)
mamak-mamak, bundo kanduang sarato dunsanak kasadonyo.
panggambaran "Minangkabau idol" ko subana santiang
sarato batuah (kalau indak manyabuik balabiahan).
kok buliah ambo batanyo, apokoh lai batua kalau ambo
mamahami sifat Bujang Bapusako ko subagai, ringkasnyo,
"arif bijaksano; nan indak talok dikarajoan urang,
salasai dek inyo?"
taruih tarang di bagian iko terjemahan (dan alih
budaya) ambo alun mantap rasonyo lai. indak masuak aka
dek audiens di sinan doh. caro bagarahnyo, "samo lo jo
superman Bujang Bapusako ko komah, sampai2 nyo pandai
manggantang aia lauik. manga itu nan nyo kakok, apo
ndak ado karajo no nan lain?"
:D
va
--- [EMAIL PROTECTED] wrote (edited):
...
> Ambo jadi taingek sanak awak batanyo baa dek urang
awak ko ditaksir dek labiah dari satu urang wanita
idaman, nampaknyo alah tajawek bahaso indak bisa
manyalahkan the Hero (pria) nyo do, yg salah adolah
sipenaksir tadi karano indak kuek manahan sanjungan
dan pepatah petitih si the Hero, sorry iko bagarah
sajo mak, Insya Allah kito2 selalu diberi iman yg
kuek.
_______________________________
Do you Yahoo!?
Win 1 of 4,000 free domain names from Yahoo! Enter now.
http://promotions.yahoo.com/goldrush
____________________________________________________
Berhenti/mengganti konfigurasi keanggotaan anda, silahkan ke:
http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________
