Assalamu'alaikum wr.wb., Sato lo ambo saketek nyiak. Takana pulo di ambo lagu Parenai, nan baisi pulo bait pantun si Gantosori tu.
Parenai kito basamo Manari tari pusako Di Gunjang batu nan duo Yo baitu dek urang mudo Nak urang Koto Marapak Basuntiang bungo durian Nak dagang kumari tampak Maetong untuang bagian Cincin banamo si Gantosori Sasuai sajo nan di kalingkiang Ilang kamano adiak den cari Lautan sajo nan bakuliliang Antah ado juo sambuangan bait-bait laguko antah indak, indak takana di ambo lai. Laguko lagu Minang Moderen jaman Eli Kasim di taun 60an. Antaro pantun nan ciek jo nan sambuangan acok indak ado hubunganno. Iko agak ciri-ciri lagu Minang Moderen katiko itu. Sarupo lagu Malereang Tabiang di bawah ko misalno. Malereang lah tabiang malereang Malereang tabiang nan bakeh lalu Den sangko langik nan lah teleang Kironyo awan nan manggajuju Jarang-jarang tugakan jaguang Buliah nak tampak puyuah balari Kadang-kadang dijalang kampuang Baitu sayangnyo ka nagari Janiah aianyo Sungai Tanang Minuman urang Bukik Tinggi Tuan kanduang tadanga sanang Baolah tompang badan kami Sabanano pantun dendang tukang saluangpun acok baitu, malompek dari subjek nan ciek ka nan lain. Itu agakno bedono jo Randai nan biasono marupokan carito. Jadi antaro pantun nan ciek jo nan lain biasono bakataruihan. Sayang randaiko alah samakin langka kini. Katiko ambo ketek-ketek di taun 60an lai juo parajan urang ba randaiko di Biaro. Itu sajo katambahno nyiak. Wassalamu'alaikum wr.wb., Lembang Alam > Dear Eva, > > Cincin banamo Gantosori, > sasuai sajo di kaliagkiang. > Ilang kamano ka Mamak cari, > Lauiktan sajo bakuliliang. > > Pantun ko adolah Pantun Randai, pantun nan Mak Ngah danga partamu kali Maso > Japang dakek-dakek ka Mardeka wakatu mancaliak Randai nan Tongga dimainkan > dek Anak Randai Rang Payokumbuah. Pantun tu taruih apa tangiang-ngiang di > talingo dengan bayangan mato Anak Randai mamancak malapoh-lapohkan Sarawa > Galembongnyo. Hep Tah ... ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
