Oi....dunsanak Wady Afriadi. Iyo sabana taparangah ambo jo pamikiran angku. Ambo jadi takana jo lagu Ebiet G. Ade, sbb : Pernah kucoba, untuk melupakan Kamu Dalam setiap renunganku Kucoba lupakan, apa yang Kau goreskan Pada telapak tanganku Kucoba juga untuk, meyakinkan pikiranku Bahwa sebenarnya Engaku tak pernah ada...... Bahwa bumi dan isinya Tercipta karena, memang harus tercipta Bahwa Adam dan Hawa, tiba-tiba saja turun Tanpa makan buah Kuldi, dahulu Dan aku terlahir, bukan karena campur tanganMu Tapi karena ibu memang seharusnya melahirkanku....... Sanak Wady, Lagu ko, bantuak-bantuaknyo, diciptakan dek Ebiet G.Ade, katiko imannyo sadang suruik, sampai kdasar yg paliang bawah, sampai-sampai inyo (si Ebiet), indak picayo jo Sang Maha Pencipta. Nah, kini, cubo angku danga, baa kalanjutannyo : Tetapi apa yang kurasakan kemudian Hidup seperti tak berarti lagi Karena memang hanya kasih sayangMu Yang dapat memimbing jalanku Akhianyo, si Ebiet ko batobat, minta maaf kapado Sang Pencipta : Tuhan...., maafkanlah, atas kelancanganku Mencoba melupakanMu Sekarang datanglah Engkau Bersama angin Agar aku dapat menikmati kasihMu Sanak Wady, Untuak samantaroko, ambo anggap angku sadang dalam proses pancarian. Kiro-kiro samo jo nan di alami dek Ebiet G.Ade, sakitar tahun 78-80 an dulu. Proses sarupoko, manuruik ambo akan dialami dek anak manusia, dengan bamacam-macam caro. Tapi samantangpun baitu, pituah urang tuo paralo juo didanga. Silahkan sajo angku ikuik pangajian, barangkali JIL, atau apo sajolah. namonyo, tapi karunia nan diagiah dek Sang Maha Pencipta, yg membedakan kito jo binatang, iyolah yang namonyo Aka Pikiran. Apopunlah nan sadang angku kaji, mudah-mudahan angku indak lupo basujuik kapado nan Maha Kuaso, dek karano sujik tu mengaktifkan simpul syaraf kemanusiaan kito, yang bisa membedakan mano yang baik dan mano yang buruak. Sagitu sajo dulu komentar ambo, untuak pamikiran angku........,
Wady Afriadi <[EMAIL PROTECTED]> wrote: Yth. Bapak-Bapak, Niniak Mamak sarato Cadiak Pandai nan ado di Lingkuangan Palanta Rantau Net Sungguah pun indak ado namo nan tasabuik, gala indak ado nan ambo himbaukan, tapi salam jo sambah ambo tatuju ka nan banyak, ka sado Bapak2, Niniak Mamak nan gadang basa batuah, nan bapucuak sabana bulek, baurek sabana tunggang, tampek batanyo manjalang kapai, kapulang tampek babarito, suluah bendang dalam nagari. Indak pulo katinggalan Bundo2 nan ado pulo disiko, limpapeh rumah nan gadang, paubek jariah palarai damam, Bundo Kanduang rang namokan, nan indak kurang pulo arih sarato bijaknyo. Tantangan diri ambo, dek alun tasabuikkan namo sarato gala, sahinggo ko basirobok di labuah nan golong di pasa nan rami, alun tantu namo kadisabuik sarato gala kadihimbaukan, indak pulo jaleh asa jo usua, suku jo sako, kampuang sarato ranah, maragukan pulo lai urang awak atau ko ukan. Namun babarapo posting nan lah ambo sampaikan nampaknyo cukuik mambuek salingkuang palanta sarato juadah nan katangah caliak mancaliak suok kida, bisiak mambisiak kadangaran, tando nak mintak kajalehan, sia ko? Sia mamaknyo, lai badatuak andiko? Apo pulo mungkasuik mangirim posting bakcando iko. Tantang diri ambo Mak, bukan ambo bamungkasuik basihaniang basibisu, mangirim-ngirim barahasio, baduto sarato mamarok dari jauah, mamantak tangan basuruakkan, manyagah sudah tu bakcando urang indak tau. Sagalo saraik jo rukunnyo untuak bagabuang di palanta ko lah ambo panuhi, Mak. Lah cukuik lamo ambo manjadi anggota palanta, nan lah baubah-ubah baganti namo, namun nan namo ambo tatap dimasuakkan sipangka kadalam buku, sahinggo ambo indak pernah maulang man-subscribe, nan kaba dari palanta lai sampai juo ka ambo taruih. Tapi dek umua alun sataun jaguang darah alun satampuak pinang, ka mangecek banyak sagan, dek banyak nan labiah tuo sarato jauh cadiak jo pandainyo dibandiang badan diri ambo, mangko duduaklah ambo disuduik surang bamanuang bakalumun kain saruang, kopi nan alah mulai dingin, manuang bakawan jo paisok daun anau. Nan namo jo data ambo alah ado di moderator, Mak. Tapi samantang pun baitu, dek lamo lupo biaso datang, dek banyak ragu acok tibo. Mangko jo sanang ati ambo parkenalkan badan diri ambo ka dunsanak kasadonyo baliak. Namo ambo sasuai jo nan tatulih di alamaik, indak baduto jo basandiwaro, asa ambo dari Luhak Limopuluah, luhak katigo dari luhak darek tigo tungku sajarangan, ranah Pikumbuah rang namokan. Umua alun sataun jaguang, 30 taun baru, darah alun satampuak pinang, pangalaman alun saujuang kuku. Profil ambo dapek disigi di http://profiles.yahoo.com/wafriadi, dangau2 buruak ambo dapek pulo disilau di http://wady.or.id. Informasi nan langkok ado disinan mungkin indak paralu ambo jalehan pulo disiko Mak, maingek katerbatasan waktu jo tampek. Mungkasuik ambo mangirim berbagai topik nan cukuik sansitip tu, adolah untuak mambukak wawasan kito tantang agamo. Ambo indak badakwah ko do Mak, indak pulo ambo manunjuak maajari. Ambo cuma mambantangkan masalah2 nan mungkin dapek manjadi ranuangan kito basamo. Dalam Kuraan (kan baitu urang awak manyabuik Al-Qur'an, Mak) alah disabuikkan juo; ado tando-tando dalam satiok patukaran siang jo malam dst. Apokah kito andak mematikan raso, mambutokan mato, mamakakkan talingo thd tando2 nan mungkin balain jo nan awak yakini? Baru2 ko Mak, kalua barita di koran, baseba jo barita di internet ko, bahasonyo kabudayaan tuo nan ado di nagari Maek, Limapuluh Koto, alah baumua labiah dari 1500 taun. Menhir-menhir-nyo sampai kini masih tagak disinan. Jadi, sabalun Nabi Muhammad SAW lahia, kebudayaan urang awak (Minangkabau kuno) alah cukuik tinggi, Mak. Apokah ndak baharago bagi kito basamo, sejarah asa usua niniak moyang nan SABANA niniak moyang kito? Manga indak turun wahyu sekalian ka kito pado maso itu? Dek di tanah Arab sajo turunnyo, sadangkan Tuanalah (kan iyo baitu urang Minang manyabuik Allah SWT, Mak? Ambo indak marandahkan do) indak tau manau jo kito maso itu do? Lai ado tasabuik di Kuraan bahaso ado nagari banamo Minangkabau, nan urangnyo suko bapikek balam jo mahambuik buluah sabatang balubang ampek, malagu bakcando manangih sarupo dendang? Suko atau indak suko, rela atau indak rela, tarimo atau indak tarimo, agamo kito adolah IMPORT mak. (Ambo mangacu pado pengertian arti kata import sasuai kamuih nan ado Mak, indak babuek jo bacari do). Lai ado tabukak mato kito ka arah itu salamo ko? Kito kaji pulo sejarahnyo, agamo kito dibao dek urang Arab nan manggaleh kamari babarapo abad nan lalu. Urang Arab mandaraik ka Ranah kito, urang bangso lain mandaraik pulo di bagian lain nusantara sarupo ranah Batak, sahinggo Karisten lah inyo. Apokah sasudah itu kito mamatikan kasado sandi-sandi jo urek nadi kito, bahaso ajaran nan kito tarimo itu adolah ajaran nan indak dapek diganggu gugat, sekalipun gunuang marapi tabanam ka lautan? Indak bisa di usak usiak, walau apo juo nan ka tajadi? Kito tutuik mato terhadap niniak moyang kito sabalun urang Arab tu datang pado kito, mambao kito masuak agamonyo? Apo salah niniak moyang kito inyo indak tau manau jo bangso Arab, inyo indak pandai mangaji jo mambaco hadis, inyo indak basumbayang bapuaso, sahinggo inyo masuak NARAKO kasadonyo sasuai jo kayakinan kito? Paninggalan2 mambuktikan bahaso niniak moyang kito indak urang Barbar do, Mak. Ma nan saharusnyo labiah kito hargai? Maaf saribu kali maaf nan ambo mintak. Ampun saribu kali ampun nan ambo puhunkan. Kasado niniak mamak cadiak pandai gadang basa batuah suluah bendang dalam nagari bapucuak sabana bulek baurek sabana tunggang kapai tampek batanyo kapulang tampek babarito nan arih bijaksano samuik tapijak indak mati alu tataruang patah tigo nan kambang salaweh alam jikok mambalun sabalun kuku. Ambo cukuikkan sampai disiko dulu Mak. Jikok dirantang namuah panjang, namuah bajuntai jo bajelo, ambo bateh sampai disiko nak dapek disisiah jo disibak nak jaleh barih balabehnyo, dapek diambiak nan kapaguno. Panutuik saketek ka silang nan bapangka karajo nan bapokok, moderator rang namokan; Apokah palanta kito ko akan mem-BAN urang-urang nan punyo pandangan lain sarupo ambo? Apokah lah sudah kaji dek kito basamo, indak ka barubah lai saujuang rambuik sacuia kuku, saketek indak indak bisa diganggu jo dibantah, dipatanyokan apolai dibahas? Kalau baitu Mak, ambo tantu maanjuang tinggi mahamba gadang. Ibaraiknyo kampuang bapangulu, nagari baandiko, negara ba-presiden, milis bamoderator sarato ba-owner. Ambo salaku urang nan datang tantu manyasuaikan. Sungguahpun bandua lah didagam, daham lah kuhua-kan, urang nan lalu tantu indak berhak maatua sipangka, nan duduak baselo diateh tingkah, rumah gadang banamo Rantau Net ko. Talabiah jo takurang, jikok ado nan patuik ditangah takatapikan, patuik diateh takabawahkan, sarato lupo nan indak kaingatan, maaf jo rila nan ambo pintak. Sambah tatuju ka nan banyak. Wassalam, Wady Afriadi, S.Sn ---------------------------------------- Do You Urangawak? Join the [EMAIL PROTECTED] The group of Minangkabau folks worldwide To join, click http://groups.yahoo.com/group/urangawak ---------------------------------------- --- In [EMAIL PROTECTED], wrote: > Assalamualaikum Wr. Wb., > > Satuju mak, bahkan awak mungkin ingin tahu saketek mengenai sanak Wady ko, tapi mungkin sajo ado urang minang yg sarupo beliau ko, karano di Padang disitu ado namonyo daerah pondak (kampuang cino) dan kemungkinan lain2 nyo. > Bahkan mungkin awak ingin tahu juo riwayaik hiduik sanak awak ko, mungkin dengan mangenalkan diri dulu, mudah2an indak kabaratan, sorry kalau agak saketek pribadi dan mamaso. > > Wassalam, syb. __________________________________ Do you Yahoo!? New and Improved Yahoo! Mail - Send 10MB messages! http://promotions.yahoo.com/new_mail ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________ ** Anakbangsa : EmErDe Palar ** --------------------------------- Do you Yahoo!? New and Improved Yahoo! Mail - 100MB free storage! ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
