"Baa kok kawan angku Simon tu sampai picayo bahaso manusia ko barasa dari baruak? Cubo caritokan ka kami baliak."
Nampaknyo dunsanak tu alun mambaco pasan ambo katiko mamperkanalkan Simon untuak partamo kalinyo. Ota tu bajudul "Simon S. Lantiak, Kawan Ambo".
Baiklah, ambo sampaikan baliak ka dunsanak caritonyo.
Untuak nan lah pernah mambaco, bisa maulang2 mambaco baliak, diinok-ranuang-an bana aratinyo.
Salam, Wady Afriadi ============
"Simon S. Lantiak, Kawan Ambo" (Re-posting, Edited)
Baa kok namo kawan Ambo tu Simon nan sarupo urang kabarat-baratan? Sabananyo mambaconyo iyobana "Simon" dalam bahaso awak, indak dibaco "Saimon" sarupo dalam bahaso Inggirih. Namo aslinyo sabanonyo Mon - apolah... indak takana di ambo. Tapi dek batambah jo awalan "si", mangko namo si Mon ko basarangkaikan sajo manjadi "Simon" sajo, sarupo namo urang baraik.
Gaeknyo nan laki2 barasa dari Sungai Bulantiak (atau Sei Bulantiak sajo untuak singkeknyo, urang kampuang ambo bana manyabuik nagari tu Sei Lontiak). Dek acok bolak baliak manyubarang aia dari kampuang ambo ka Sei Bulantiak, akhianyo namonyo lakek pulolah jadi "Simon Sei. Bulantiak".
(Kato "sungai" itu kan acok basingkekkan jadi "sei" ajo di nagari awak.)
Walupun di dompet Simon SB ko lakek stiker bagambar tangan kaduobalahnyo sadang tabukak sarupo tangan urang ka mando'a, dibawahnyo ado tulisan "Hidupku di Tangan Tuhan", sarato paspoto Simon SB tu di tangah2 tangan nan tabukak tu (ado space kosong nan disadiokan ditangah2 stiker tu tampek malatakkan paspoto), namun kadang2 pandapek-pandapek Simon S Bulantiak ko acok bana jauah malawua-nyo daripado Tuhan nan keceknyo malatakkannyo di ateh tangan-Nyo tu.
Suatu kali, alah babarapo taun nan lalu, pernah inyo batanyo ka ambo, wakatu duduak di lapau Alm. Mak Utiah. Wakatu tu kiro2 pukua ampek sanjo.
"Waang picayo ndak manusia ko barasa dari baruak?" tanyo Simon SB tu tibo2 ka ambo.
Ampiang tacakuik ambo nan sadang manunuik kopi cap Serbuk Sari nan asli tu, asli bacampua jo jaguang.
"Baa kok itu nan angku tanyokan?" Jawek ambo maulua wakatu, karano ambo indak yakin pulo jo apo kadijawek.
"Pokoknyo waang picayo ndak?" Disasakkannyo ambo dek Simon tu.
Tapasolah ambo manjawek; "Tantu indak picayo ambo do, baa pulo manusia barasa dari baruak. Jikok manusia barasa dari baruak, baa kok ado juo baruak kini!" Jawek ambo alah mulai yakin.
"Aden picayo."
Kecek Simon manaruihkan. Tantu langsuang batanyo ambo sakali, baa kok inyo sampai picayo.
"Sabab, cubo paratikan dek waang..." Keceknyo sambia manunjuak ka batang durian Mak Miuh (Thamius, namo aslinyo) nan indak jauah dari lapau tu, di dakek gurun pas subarang jalan, jaleh tampak dari lapau tampek kami duduak.
Katiko tu sadang musim durian. Salah surang kamanakan Mak Miuh nampaknyo duduak dalam dangau di dakek batang durian tu, maunyikan durian ka rareh. Di kampuang ambo, nan banamo Tiaka, Kec. Guguak, Limopuluh Koto, Payokumbuah mudiak, jikok durian indak ado nan maunyikan mangko buahnyo nan jatuah buliah dibao dek urang nan lalu. Sadangkan kalau ado urang nan maunyikan, mangko kalau durian tu rareh, haram hukumnyo maambiak, karano urang nan punyo ado disinan maunyikan.
"Kalau rareh durian tu, cubo waang ambiak."
Kecek Simon SB malanjuikkan. Ambo manyimak jo panuah paratian.
"Kalau waang ambiak durian tu, sadangkan urang punyonyo ado disinan, mangko dari ma asa waang pasti disabuik urang."
"Apo nan kadisabuik urang?" tanyo ambo panuah salidik. Apo pulo hubungannyo ko antaro asa manusia dari baruak, jo durian rareh? Baitu dalam hati ambo batanyo-tanyo.
"Iyo, cubolah ambiak."
Kecek Simon malanjuikkan sangajo malambek-lambek-an dek tau inyo bahaso ambo panasaran.
"Baa kecek urang beko;
'HOI, IYO JALEH BARUAK ASA WAANG KO, JALEH DURIAN ADO NAN MAUNYIKAN WAANG AMBIAK JUO!!!'
Itu nan jaleh ka disabuik urang ka waang!" Keceknyo.
"Kan****g, kalau baitu tantu iyo." Kecek ambo. Baru sadar ambo kalau takanai ambo dinyo. Pacah galak urang sabalik lapau dek kecek panutuik Simon tu, lamo mangku ka barantinyo.
(w)
---------------------------------------- Do You Urangawak?
Join the [EMAIL PROTECTED]
The group of Minangkabau folks worldwide
To join, click http://groups.yahoo.com/group/urangawak ----------------------------------------
____________________________________________________
Berhenti/mengganti konfigurasi keanggotaan anda, silahkan ke: http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________
