Assalamu'alaikum wr.wb., Ado ibo di dalam hati ambo sabanano ka urang mudo nan sadang mancari-cari aka nak manunjuak-an ka fasikanno. Nan mancari-cari jalan untuak manunjuak-an panulak-anno taradok kebenaran al Quran, taradok agamo Allah. Walaupun angkau mungkin iyobana nan alah dicap dek Allah sabagai urang nan ka mampaolok-olok agamo Allah tu, bialah ambo cubo saketek manyampaian. Al Quran itu dijamin dek Allah Subhanahu Wa Ta'ala itu sebagai wahyu nan diturunkan Allah untuak jadi bahan palajaran bagi umaik manusia. Indak ado manusia nan mangarang apo-apo nan ado dalam al Quran tu doh. Indak ado karagu-raguan nan bahaso al Quran itu adolah padoman iduik bagi urang-urang nan bakayakian sarato bariman kapado Allah. Itulah kayakinan utamu dalam Islam. Isino ado paringatan, ado palajaran, ado ancaman, ado bimbingan. Quran itu dalam bahaso Arab sabab diturunkan ka nabi nan babahaso Arab, tapi dimudahkan pulo untuak dimangarati dek urang nan bukan Arab nan amuah mampalajarino. Itu bukan barati Tuhan tu hanyo Tuhan urang Arab sajo, Tuhan itu adolah Tuhan Penguasa Alam Rayo.
Mako diajakan dek Allah itu di dalam al Quran tentang ke Maha Perkasaan No, tentang ke Maha Bakuasoan No, tantang ka Maha Adilan No. Diajakan dek Allah di dalam al Quran itu baa caro memuji No sabagai nilai ibadah, itulah "Sagalo pujian bagi Allah penguasa alam rayo", supayo umaik nan picayo, nan bariman pandai mamuji Allah jo caro nan ditunjuakkan dek Allah tu. Hal iko memang musykil bagi seorang atheis, bagi urang nan indak picayo jo kabaradoan Allah. Walaupun ano mungkin indak bisa pulo manunjuak-an sia golah nan ma adokan dirino, sia golah nan maagiah no angok, nan maagiahno rasaki. Sia golah nan maagiah no mato untuak mancaliak, maagiahno talingo untuak mandanga. Tapi bagi urang-urang pasiak, urang-urang bodoh nan indak tau dibodohno, sagalo nikmat, pambarian Allah ka dirino, indak ado manfaaik dino salain untuak manambah kakafiran sajo. Didalam al Quran ado bimbingan Allah, baa carono badoa, baa carono maminta pitunjuak, baa carono mintak ampun. Kasadoanno itu adolah firman Allah Subhanahu wa Ta'ala, nan bagi urang-urang nan tabukak hatino, nan bariman awakno, dipagunoanno sasuai jo tuntunan Allah nan ado di dalam al Quran. Urang-urang nan mampaolok-olok ayat Allah, urang nan salalu manunjuak-an ka kafiran taradok ayat-ayat Allah, mako Allah akan sanantiaso majadian urang sarupo itu tarombang ambiang. Allahu yastah ziu bihim wayamudduhum fiitughyaanihim ya'mahuun. ( Allah memperolok-olokkan (menyiksa) mereka dan menambah kesesatannya dan menjadikan mereka terombang-ambing dalam kesesatan itu). Kini, sarancakno iyo mangko sin lah. Kalau si Wady ko masih juo nak manjua galeh-galeh nan nyato-nyato nak manghujat al Quran jo caro-caro nan ka manyakik-an ka kami, rasono iyo rancaklah jaan disiko duduak. Caro angkau balinduang di balakang figur 'fiktif' jo namo Simon atau siapun, padohal tujuanno jaleh-jaleh nak marusak kaimanan urang banyak, rasono iyo indak disiko tampekno doh. Sabalun komisi tata tertib manjatuahkan panokok, nan tipak diambo, ambo mintak supayo angkau mintak maaf ka sidang palanta ko, dan bajanji indak ka ma ambuih-ambuihan ilimu nan maarah untuak mamprovokasi urang kapado kakafiran. ko lai nan ka datang. Ringkasno sajo ijan mahujat juo ka agamo Islam ko lai disiko. Wassalamu'alaikum wr.wb., Lembang Alam ----- Original Message ----- From: Wady Afriadi <[EMAIL PROTECTED]> To: <[EMAIL PROTECTED]> Cc: <[EMAIL PROTECTED]> Sent: Monday, September 20, 2004 12:39 PM Subject: [surau] "Apokah Al-Qur'an itu 100% Firman Allah SWT?" > Kutiko tibo bulan puaso, Ambo jo Simon alah jadi panghuni tatap musajik > kampuang Ambo nan banamo Masjid Baburrahmah (pintu rahmat aratinyo, kecek > Mak Yasir). ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
