Assalamu'alaikum wr.wb., Mungkinkah urang Minangkabau bakarik jo bangso Yahudi, atau awak-awakko mampunyai darah Yahudi. Atau batali darah jo Iskandar Zulkarnain nan urang Yunani tu? Walaupun tasabuik nan sarupo itu dalam legenda ataupun dalam kaba, kabanaranno rasono jauah daripado itu. Apo lai kaba-kaba tu, biasono diawali jo pantun sarupo iko.
Kaik bakaik rotan sago Sakaik diambiak ka aka baha Dari langik tabarito Jatuah ka bumi jadi kaba. Cubolah awak tinjau-tinjau sarupo iko. Raso-rasono sacaro panampilan fisik agak kurang masuak aka. Akar (aka) atau asa usua kelompok manusia tu bisa ditalusuri dari kanampakan fisik. Manuruik sijarah nan ambo parajai saisuak katiko masih di SMP-SMA (mudah-mudahan pak guru ambo pak Zaimir Gazali lai juo sato duduak) panghuni pulau Sumatra, Tanah Samananjuang , Jawa, Kalimantan jo Sulawesi itu barasa dari Hindia Balakang, baitu basabuikan daerah Indochina atau tampek nan kini manjadi nagari Vietnam, Kamboja, Laos sarato Thailand tu, di sakitar 15000 tahun nan lapeh. Tahun nan tapek masih bisa awak padebaikan. Analisa baa mangko tajadi exodus besar-besaran masyarakaik Hindia Balakangtu katiko itu bisa awak takok-takok. Mungkin katiko itu tajadi parang gadang disinan, mungkin katiko itu ado rajo zalim nan manjadian takuik masyarakaikno sainggo bakatabuangan lari. Itu kamungkinan-kamungkinan nan masuak diaka. Bencana alam sarupo gunuang malatuih kurang mungkin sabab di daerah Hindia Balakang tu indak ado gunuang barapi doh. Analisa ado wabah panyakikpun kurang masuak aka, sabab biasono masyarakaik dimuko bumiko jarang nan pai kalua lingkuanganno sacaro gadang-gadangan dikaranoan wabah panyakik. (kalau dek wabah panyakik mungkin lah labiah daulu mauik mangaja sabalun talakik lari). Analisa tanah tampek batani kurang subur indak pulo masuak aka, sabab urang nan tingga disinan tatap juo batani sampai kini. Nan pasti, manuruik jajak sijarah, di tangah masyarakaik jo warno kulik samo, jo budaya nan hampia samo (samo-samo pamakan nasi, aratino samo-samo pandai ka sawah), memang panah tajadi suatu saat saisuak exodus besar-besaran. Sabagian gadang malalui lauik (lauik Cino Salatan) mungkin manggunoan biduak jo pancalang sarato lain-lainno. Marekako dibao anyuik dek untuang jo parasaian ka baruah ka arah salatan. Mako itulah sababno konsentrasi tagadang tadapek di pulau Jawa dek pulau Jawa mahambek laju hanyuik tadi tu. Kok indak ado pulau Jawa nan mahambek, mungkin luluih taruih sampai ka Australia. Sabagian lai ado nan 'tasangkuik' di bagian timur pulau Sumatera dalam konsentrasi nan jauah labih saketek. Marekakolah nan mamudiak-i sungai-sungai sarupo sungai Kuantan, sungai Batanghari, sungai Musi untuak maunyi pulau Perca. Sabagian lainno pulo tapasah ka Kalimantan jo ka Sulawesi. Ado pulo sabagian nan turun di lauik malalui Lautan Hindia, mungkin malalui tanah gantiang di Thailand kini dan sasudah itu turun ka bawah malalui selat Malaka, tasangkuik di pantai-pantai timur pulau Sumatera sajak dari ujuang Aceh. Sabagian pulo 'turun' malalui jalan darek malalui tanah Samananjuang tapi nampakno dalam konsentrasi nan labiah saketek. Influx atau pancampuran nan masuak sasudah itu, (jauah di balakang hari sasudah 15,000 tahun nan lapeh tu) bisa pulo nampak di awak bakehno di Palembang (banyak masuak 'darah' Cino sangkek jaman Sriwijaya, sainggo dunsanak awak di Palembang, khusus dipasakitaran kota Palembang nampak banyak mairehi Cino) atau di Aceh (banyak masuak darah campuran India, Portugis, Arab di bagian-bagian pasisia tanah Rencong). Jo di Manado, banyak masuak darah Cino, Bulando, Portugis). Di Minangkabau sandiri untuak daerah darek, atau di padalaman karajaan Minangkabau saisuak, ado nampak tando-tando darah Cino ikuik bacampua. Dipakuaik pulo jo warno-warni ukiran adaik, kain songket, pakaian anak daro, nan mampunyoi kamiripan jo budayo Cino. Tapi nan jajak-jajak darah urang Eropah atau, Arab atau bangso Semit indak ado nampak doh. Di Pasisia, di ciek-ciek tampek ado nampak bakeh-bakeh darah India, agak balain hitam-hitam urang disinan. Tapi nan jajak nabi Sulaiman atau Iskandar Zulkarnain sakali lai iyo indak ado nampak doh. Dari fakta-fakta panampilan fisik ko sangaik sulik untuak mangakui nan bahaso awak bakarik jo Sultan Iskandar Zulkarnain nan urang Yunani atau urang Eropah tu. Ciek lai, dima-dima Iskandar Zulkarnain ko panah singgah saisuak, lakek namo Aleksandria. Namo kota sarupo iko banyak bana sajak dari Mesir sampai ka daerah Afghanistan, tapi indak ado lai kataruihanno labiah ka timur. Satantangan namo gunuang Ophir, nan maagiah namo sarupo itu adolah urang Jerman atau Bulando nan panah mangadokan panyalidikan disinan. Jadi namotu balakek-an baru 'kapatang-kapatang' ko tu mah. Awak manyabuikno gunuang Pasaman sajak saisuak. Kuburan jo ukuran kapalono sajo sapanjang 2.5m? Itupun hanyo panambah-nambah karancuan sajo. Ado memang dugaan nan bahaso manusia dijaman awal paradaban (nabi Adam) baukuran labiah gadang-gadang, masih paralu pambuktian ilmiah sabarapo labiah gadangno ukuran baliau-baliautu. Namun mummy Firaun nan sajaman jo nabi Musa, nan mati di lauiak Merah tapi jasadno tapaliaro bahkan dimummykan, samo gadang jo awak-awak kini ko sajo no. Mummy tu alah dibukak urang, dan dibuktikan pulo bahaso awakno adolah nan mati tanggalam di lauik Merah, sabab jasad mummy tu basuo diurang kiniko banyak manganduang garam. Nabi Sulaiman adolah nabi nan datang jauah sasudah nabi Musa sainggo logikano, manusia dijaman nabi Sulaimanpun indak ka sampai 2.5m gadang kapalono doh. Wassalamu'alaikum wr.wb., Lembang Alam ----- Original Message ----- From: HRM.Jambak <[EMAIL PROTECTED]> To: <[email protected]> Sent: Tuesday, January 25, 2005 11:43 PM Subject: [EMAIL PROTECTED] RE: palanta Digest, Vol 32, Issue 2 > > Manuruik kaba-kabanyo rang Minang itu ado campuran dari bangso Yahudi kini, > nan lari dikaja-kaja jo rajo nan manggantikan Nabi Sulaiman atau ado pulo > nan mangecek-an bahwa rang Minang adolah campuran dari bangsa Melayu tua > dengan masyarakat Yahudi sejak zaman nabi Sulaiman. Iko diperkuat dengan > adonyo kuburan di daerah 50 koto nan panjang tangkuraknyo se 2,45 m, dan > bukit Ophir di Pasaman sumber mas, nan manuruik kitab perjanjian lamo bahwa > Rajo Solomon mancari ameh sampai ka Bukit Ophir ko. Nan rancaknyo wak pinjam > buku Sajarah Indonesia di perpustakaan di Leiden. Di situ wak akan tau bahwa > ado sejarah nan sabana sajarah, ado pulo sajarah nan dibuek tuek kepentingan > pemerintah Belanda menjajah Indonesia. ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
