Wa'alaikumsalam wr.wb.,
Manolah mak Asmardi Arbi sarato karapatan Palanta,
Manyabuik-an nan bahaso 'awak' (siapun awak) katurunan dari langik adolah
caro-caro rajo jaman saisuak untuak manunjuak-an kasantianganno sakaligus
untuak mambodohi rakyat supayo nan si rakyat amuah tunduak patuah taruih ka
Daulat Nan Di Patuan. Sarupo itu tajadi di Japang (Teno Heika), dikalangan
Bugih Makassar, di Mesir Kuno. Tantu sajo iko carito / legenda nan indak masuak
aka, nan pasti indak ka mungkin sajo. Tapi ado rakyat nan baabad-abad manarimo
nan sarupo itu. Saradadu Japang di Parang Dunia kaduo, (nan manyuruah
inyiak-inyiak awak kerek ka arah matoari tabik) sabana picayo nan bahaso Teno
Heika mareka itu iyobana katurunan matohari.
Di masyarakaik nan lain sarupo di Mindanao, di Sangir Talaud, bahkan tamasuak
di masyarakaik awak Minangkabau, rupono caritotu labiah marakyat. Jadi indak
rajo sajo doh nan bakarik ka langik, tapi inyiak muyang awak bana. Aratino awak
ko adolah katurunan dari inyiak muyang nan bakarik ka langik. Nan turun dari
telong nan barapi, nan turun dari gunuang marapi, nan datang katiko gunuang
marapi masih sagadang talua itiak.
Ambo bakayakinan bahaso iko hanyo sabateh retorika sajo. Untuak mangecek-an nan
bahaso awak ko adolah manusia pilihan nan balain jo urang banyak. Padohal
sacaro budayo, sacaro kahidupan sosial, awakko samo jo sabangun sajo, baitu
pulo sacaro panampilan fisik, tarutamu di pasakitaran Nusantara awak kiniko.
Samo-samo urang ka sawah, samo-samo basawah bancah, samo-samo pamakan nasi,
samo-samo barumah papan.
Ambo kurang sapandapek jo pamikiran bahaso ras Malayu ko katurunan campuran
antaro Arab jo Cino sarupo nan mamak sabuik. Sabab parsentuhan Arab jo Cino tu
tajadi manuruik sijarah nan agak intens saketek baru sasudah kadatangan agamo
Islam, katiko padagang-padagang Arab (dipelopori dek Saad bin Abi Waqash)
manjalajah sampai ka Cino. Sadangkan kabaradoan bangso Malayu alah jauah labiah
tuo daripado itu. Karajaan Sriwijaya di Palembang sapangkek jo kahadiran
Rasulullah SAW, yoitu di abaik ka tujuah.
Nan tamasuak kadalam ras Malayu, memang iyo sampai ka kapulauan Filipina kini.
Jadi urang Mindanao itu memang iyo sarumpun saakar jo awak du. Hanyo sajo
pacampuran darah jo pendatang Eropah (tarutamuno Spanyol) labiah gadang di
Filipina bagian utara. Urang-urang di Mindanao sarato di bagian lain di
salatan, indak takaca amek dek Spanyol, itu mangkono balain agamono (tatap
Islam) dibandiangan jo bagian Utara.
Sakalian sajo manjawab tanyo St. Rumah Panjang, pakaro rumah adaik. Cubolah
tenok-tenok rumah adaik nan ado di Thailand, jo atok nan basusun agak
balenggek, hanyo sajo indak bagonjoangan. Sangaik mirip jo atok rumah adaik
awak. Cuma di rumah adaik awak nampak tageh langkuangan no sarupo tanduak
kabau. Atok aula Barat di ITB Banduang mulo-mulo daulu ambo sangko maniru-niru
corak rumah gadang awak. Rupono manuruik kaba nan ambo dapek labiah maniru atok
rumah urang Siam. Jadi awak (khusus Minangkabau) barek dugaan ambo ba balahan
ka Siam agakno.
Itu pulolah daulu.
Wassalamu'alaikum wr.wb.,
Lembang Alam
Asmardi Arbi <[EMAIL PROTECTED]> wrote:
Mak Lembang Alam,
Assalamu'alaikum wr.wb.
Ambo manambah saketek, carito nan ambo baco dan danga tantang asa usua urang
Sangir Talaud jo rajo-rajo nan banyak ditampek ambo batugeh dulu di
Davao,Filipina Selatan.
Rajo-rajo nan ado didaerah mulai dari Minahasa (Sulut),Sangir Talaud sampai
ka Mindanao rato-rato samo caritonyo, yaitu katurunan Dewa dari langik nan
diturunkan malalui puncak gunuang. Anak Dewa ko dapek hukuman dan
mangambaro kadataran randah dan basuo jo katurunan manusia nan barasa dari
pantai,lalu kawin dan baranak. Katurunan dewa kolah nan ditarimo sabagai
katurunan rajo-rajo,pado awalnyo.
Jadi nampak ado kesamaan carito perkawinan antaro katurunan dewa ( Hindu) jo
katurunan dari pendatang darilauik nan terakhir dibao oleh saudagarsaudagar
dari Eropah (Kristen) dan Timur Tengah (Islam) dan China (Budha).
Ras Malayu kabanyo tabantuak dari percampuran antaro katurunan imigran Timur
Tengah,daratan China dan panduduak asli, tajadi sajak zaman sabalun
mencairnyo es dikutub dimano daratan China masih manyambuang jo kapulauan
Nusantara tamasuak Filipina,Malaysia dan Taiwan. Perdagangan jadi tambah
maju dikawasan tu sasudah mancairnyo es dikutub dan ditemukannyo parahu
pinisi disuku Bugis. Suku-suku asli Mindanao mangaku mereka tamasuak ras
Malayu. Ado nan mancatat sekitar 6000 kato dari bahaso daerah di Mindanao
nan hampia samo jo bahaso Malayu.
Wallahu alam bisawab, wassalam,
Asmardi Arbi.
---------------------------------
Do you Yahoo!?
Yahoo! Mail - Easier than ever with enhanced search. Learn more.
____________________________________________________
Berhenti/mengganti konfigurasi keanggotaan anda, silahkan ke:
http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________
