Sanjo tu antah baa namuah bana ati ambo manuruikkan jajak gunjo (landak) nan manuju ka bawah batu dindiang, di bukik kampuang ambo nan banamo Tiakar Kecamatan Guguak, Pikumbuah Mudiak.
Padohal ari alah agak laruik sanjo, ujan turun rintiak-rintiak sahinggo pakaian ambo alah basah kuyuik dari tadi. Piarik (tombak) nan ambo sandang dari tadi lai indak lapeh dari tangan. Babahayo mamacik gunjo jo tangan, bisa tacuek durinyo di tangan awak. Kecek urang-urang nan lah lamo baburu gunjo, bulunyo itu bisa pulo tabang mancucuak bakeh awak. Jikok pas di mato, tantu lah sabana karam awak dinyo. Batu dindiang tu talatak di bukik Aia Malinteh Batu, dibalakang Desa Tiaka tu. Sabalah mudiak tahampa nagari Kubang, dibaliaknyo nagari Sungai Talang, agak kasuok saketek basobok jo Taratak, jikok ditaruihkan tacaguik ka Siamang Babunyi. Ado lai sakitar 50 meteran tinggi batu dindiang tu, di sampiangnyo aie malinteh ka bawah. Leba batu tu ado lai 100 meteran mungkin, ambo indak tau pasti karano wakatu baburu alun pernah ambo mambao meteran tukang. Dari bawah bukik, batu tu tampak jaleh bakcando kapalo sulah nan bawarna hitam. Tagak disampiang aia malinteh (aia tajun) tu, baju ambo batambah babiak kanai palantiangan aia, dinginnyo mancucuak tulang. Tapi jajak gunjo tu batambah jaleh ka balakang aia tajun, mambuek ambo langsuang manuruikkannyo. Ambo caliak ka balakang, si Punco, anjiang ambo nan tadi jo ambo alah indak tampak lai. Ambo cubo manyorak duo-tigo kali, namun nan inyo ndak kunjuang manyauik, ambo taruih sajo masuak ka lubang guo di bawah batu dindiang tu, di baliak aia tajun, manuruikkan jajak gunjo tadi. Baru sakali ko ambo masuak ka lubang tu, tampaknyo samakin ka dalam guonyo samakin laweh, sasudah marangkak kiro-kiro sapuluah dapo, ambo dapek tagak dalam guo tu. Lubang tampek masuak alah jauah tingga di balakang, cahayo nan malewatinyo pun alah batambah sabak, karano ari alah sanjo, ujan pulo di lua. Ambo iduikkan suluah jo daun mangga, nampak-nampaknyo dalam ngaluang sagadang tu, ndak gunjo sajo nan namuah tingga sinan, pikia ambo. �Inyiak balang� pun mungkin namuah pulo lalok di siko, kecek ambo dalam hati walaupun salamo ko nan balang tu alun pernah basirobok dek urang baburu. Ambo taruihkan masuak ka dalam, manuruikkan jajak gunjo tu, samakin lamo samakin jaleh. Nampaknyo sarangnyo ndak jauah lai ko, pikia ambo. Ruponyo ndak salah perkiraan ambo, baru babarapo langkah ambo bajalan, sasudah bakelok nampaklah gunjo nan ambo cari-cari tu. Tapi ampia takarambuang ambo dek takajuk, karano di sampiang gunjo tu ado ungguak batu angek nan berkilauan memantulkan cahayo api suluah daun mangga nan ambo pacik. Tangan kida ambo mamacik suluah daun mangga, tangan suok ambo mamacik piarik nan alah tatuju luruih ka gunjo tu, siap dilapehkan, tapi apo nan tampak di sampiang gunjo tu mambuek ambo tatagun. Iyo lai sabana gunjo ko? Apokah hanyo gunjo jadi-jadian? Mangko raso takuk mulai tibo. Tapi salain takuik, timbua pulo raso ingin tau. Apo nan ado di sampiang gunjo ko? Dek karano gelagat gunjo tu lain ndak nampak andak menyerang bakeh ambo, walaupun matonyo tatuju ka ambo taruh, mangko raso takuik ambo pun baransua ilang. Ambo paratikan baiak-baiak, batu nan tapanggang tapek di subalah gunjo tu. Baru sadar ambo, batu tu indak tapanggang do! Api nan nampak tu adolah pantulan dari cahayo suluah daun mangga nan ambo pacik. Batu tu sagadang batu lasuang, licin bakilek, mamantulkan cahayo api dari suluah ambo. Baru sadar ambo batu apo tu. Ameh! (Bersambung) Carito kito taruhkan di [email protected] http://group.yahoo.com/group/urangawak Send instant messages to your online friends http://asia.messenger.yahoo.com _____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
