Assalamu'alaikum wa rahmatullaahi wa barakaatuhu Datuak Sati jo Datuak Panduko, pangulu adaik di nagari sadang barundiang-rundiang ketek.
'Alah Datuak tarimo undangan untuk musyawarah harato adaik di Minangkabau?' tanyo Datuak Sati ka Datuak Panduko. 'Undangan apo mukasuik Datuak? Alun ado ambo manarimo undangan apo-apo lai doh,' jawek Datuak Panduko. 'Ado wacana, bak kecek urang kini. Nak maluruihan kaduduk-an harato pusako tinggi di Minangkabau, nan dinilai samantaro urang bamasaalah sabab caro warih mawarihno indak sasuai jo syarak. Samantaro awak mangecek-an bahaso adaik di Minangkabauko basandi syarak, syarak basandi kitabullah. Sadangkan harato pusako tinggi turun malalui garih ibu. Sainggo ado nan bapandapek bahaso urang Minagkabau ko indak sampaorono kaislamanno.' 'Iyo, iyo. Iyo batua pulo kok baitu. Dima sarasehanno ka diadoan? Sia-sia sajo nan ka diundang?' tanyo Datuak Panduko. 'Alun pulo jaleh di ambo lai. Sabab baritako bak kecek urang kini masih wacana. Bahkan ado dunsanak awak nan di nagari Jiran mausua kok ka diadoan di Singapura bagai. Tapi kalau pandapek Datuak baa kiro-kiro du?' 'Kalau untuak kadibahas, rancak malah. Tapi bahaso sasudah itu bisa di kadikarajoan bana sacaro bulek, bak bulek ayia di pambuluah, tantu lain pulo pakarono. Nan pandapek ambo surang, karajoko karajo barek sangaik. Paralu ahli fikih, ahli ugamo nan sabana santiang. Urusanko indak baru bagai doh. Alah sajak saisuak urang manyabuik. Tapi sampai kini iyo indak ado kasimpulan nan bisa diambiak sacaro jaleh doh. Alah tamasuak Datuak Indomo (HAMKA), Datuak Sinaro (Muhammad Natsir) sato maagiahan pamikiran tapi tatap indak boneh doh. Sarik mandifinisian kapamilik-an arato adaik ko. Kok di ambo nan bodoh ko iyo ambo latak-an sin nan bahaso arato adaik tu iyo adaik nan punyo. Indak ado pribadi-pribadi nan mampunyoino doh. Bahaso sasudah itu manuruik adaik urang padusi nan manjago, nan maetong hasiano, biaan sinlah sarupo itu. Kok asia sawah, padino dibaono pulang, nasino dimakanno di anak kamanakan, biaan sinlah. Tapi indak buliah dijua. Sabab kalau dijua tantu jaleh jadino kapamilikanno. Sia nan manjua? Sudah itu bagi nan mambali, saandaino itupun dinyatokan sah, indak manjadi arato adaik di urang nan mambali tu lai do. Tapi alah manjadi arato pusako randahno sudah itu. Itu pandapek ambo,' Datuak Panduko manjalehkan. 'Kabano inyiak awak Syech Ahmad Khatib nan jadi imam di Masjidil Haram saisuak mamfatwakan nan bahaso arato adaik di Minangkabauko sabagai arato nan syubahat. Kabano pulo baliau pai 'lari' ka Makkah dan indak pulang-pulang lai dek indak suko jo sistim warih di Minangkabau. Iyo kolah baitu? Lai Datuak mandanga?' 'Antahlah. Nan ambo danga, baliau dibao ayah baliau ka Makkah katiko baliau baumua sabaleh taun. Rasono katiko umua sabaleh taun tu mungkin alun ka ado bamikiran nan sa kritis itu bana dari baliau agakno lai do. Sasudah baliau bailimu, mungkin timbua kasadaran jo pamikiran-pamikiran baru baliau. Di awal abaik nan lapeh, sasudah baliau baranak-anak di Makkah, (padusi baliau urang katurunan Kurdi) baliau pulang ka kampuang sabanta, katiko ka baliak, baliau bao adiak-adiak, sarato kamanakan-kamanakan padusi, sarato cucu-cucu dari dunsanak padusi baliau ka Makkah. Indak lamo sasudah itu, dunsanak-dunsanak baliau nan tingga di kampuang bakirim surek, maagiah tau niaik baliau-baliau di kampuang nak mananggai rumah gadang sambilan ruang nan lamo dek alah lapuak, ka manggantino jo rumah gadang nan labiah ketek Baliau bapasan, karajoanlah. Tapi tinggaan juolah tanah agak saparumahan, kok nyampang ado bagai nan kini di Makkah ko ka pulang isuak. Bitu jano baliau. Katiko baliau maningga, kirono iyo pacah adiak-adiak baliau nan baliau baoko. Saparinduak-an tingga di Makkah, nan saparinduk-an lai pulang baliak. Kalaulah baliau sabana maanggap bahaso tanah adaik di nagari asa baliau di Minangkabau sabana-bana syubahat, rasono indak ka mungkin baliau bapasan manyuruah tinggaan juo untuk adiak-adiak jo kamanakan-kamanakan baliau tu doh. Itu jalan pamikiran ambo sajo.' 'Jadi baitu caritono Datuak?' 'Baitu nan ambo danga, wallahu a'lam.' 'Samo kito nanti sin lah Datuak. Kok iyo jadi ado sarasehan itu. Nak kito dangaan pulo apo kiro-kiro kasimpulanno isuak.' 'Iyoolah. Samo basaba kito,' jawek Datuak Panduko. ________ Wassalamu'alaikum, Lembang Alam -------------------------------------------------------------- Website: http://www.rantaunet.org ========================================================= * Berhenti (unsubscribe), berhenti sementara (nomail) dan konfigurasi keanggotaan, silahkan ke: http://rantaunet.org/palanta-setting * Posting dan membaca email lewat web di http://groups.yahoo.com/group/RantauNet/messages dengan tetap harus terdaftar di sini. -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================
